ភ្នំពេញ – នៅ​ក្នុង​បរិបទ នៃសម័យ​ឧស្សាហកម្ម៤.០ ជំនាញបច្ចេកវិទ្យាបានដើរតួនាទីយ៉ាងសំខាន់ ដោយ​ស្ទើ​រតែ​គ្រប់វិស័យ​ទាំងអស់មិនថា សំណង់ អគ្គិសនី ធុរកិច្ច ទេសចរណ៍ គឺ​មិន​អាច​ខ្វះ​បាន​ឡើយនូវ​ជំនាញ និង​ចំណេះដឹង​ផ្នែកបច្ចេកវិទ្យា ។

បើតាមការ​លើក​ឡើង​លោកស្រីបណ្ឌិត ព្រហ្ម សុភា ប្រធាន​ផ្នែក​អភិវឌ្ឍន៍​អាជីវកម្ម និងជា​សហស្ថាបនិក នៃ Elite Vigour វិស័យនីមួយៗប្រៀបដូចជាអាវៈយវៈ ហើយបច្ចេកវិទ្យា គឺប្រៀបដូចជាសរសៃឈាម ដោយ​មានន័យថា គ្មានអាវៈយវៈណាមួយអាចរីកចម្រើនបានដោយអត់មានសរសៃឈាមទៅដល់ទេ ។ ​លោកស្រីបណ្ឌិតសង្កត់ធ្ងន់ថា នៅក្នុងសម័យ​ឧស្សាហកម្ម៤.០ ទោះជ្រើសរើសជំនាញ​ខាងវិស័យហិរញ្ញវត្ថុ ឬទេសចរណ៍ ឬផ្នែកផ្សេងក៏ដោយ ក៏​ត្រូវតែស្វែងយល់ឱ្យបានច្រើនពីបច្ចេកវិទ្យាដែរ។

តើធ្វើម្ដេចទើបអាចរៀនជំនាញបច្ចេកវិទ្យាបានពូកែ? ឆ្លើយនឹងសំណួរនេះ លោកស្រីបណ្ឌិត ព្រហ្ម សុភា បានប្រាប់ពីគន្លឹះមួយចំនួនដែល​អាចជួយសិស្សានុសិស្សពូកែលើមុខវិជ្ជាបច្ចេកវិទ្យា ដោយ​រួមមាន៖

ទី១. ចូលចិត្តបច្ចេកវិទ្យា ៖ ការរៀនផ្នែកបច្ចេកវិទ្យាពិតជាមានការលំបាក ប៉ុន្តែអាស្រ័យលើយើងពិតជាចូលចិត្តវាឬអត់? ក្នុងនោះការរៀនបច្ចេកវិទ្យាឱ្យពូកែមិនមែនបានន័យថា ផ្ដោតលើការរៀន​ឱ្យបានពិន្ទុខ្ពស់តែមួយមុខនោះទេ ប៉ុន្តែយើងសប្បាយនៅក្នុងការរៀន និងធ្វើការងារទាក់ទងនឹងបច្ចេកវិទ្យា។

លោកស្រីបណ្ឌិត ព្រហ្ម សុភា

“សម្រាប់ខ្ញុំមិនមែនរៀនព្រោះចង់បានពិន្ទុទេ ដោយសារខ្ញុំសប្បាយចិត្តនៅក្នុងការធ្វើការងារនោះ ដែលជាការអប់រំមួយបង្ហាញថា ខ្ញុំចូលចិត្តខាងផ្នែកបច្ចេកវិទ្យា”

ទី២. យកចិត្តទុកដាក់សុខភាព ៖ ដើម្បីរៀនពូកែផ្នែកបច្ចេកវិទ្យាសិស្សានុសិស្សក៏ត្រូវយកចិត្តទុកដាក់លើសុខភាពទាំងផ្លូវកាយ និងផ្លូវចិត្ត។ សម្រាប់ខ្ញុំសុខភាពគឺជាអាទិភាពទី១ ព្រោះប្រសិនបើសុខភាពមិនល្អទេ យើងធ្វើអ្វីក៏អត់ជោគជ័យដែរ។

ទី៣. វិធីសាស្រ្តរៀនមានប្រសិទ្ធភាព៖ ការរៀនឱ្យពូកែលើផ្នែកបច្ចេកវិទ្យា យើងអាចបែងចែកវិធីសាស្រ្តរៀនជា ៣ប្រភេទ គឺទី១. ការរៀនដោយចាំ មានន័យថា ជាការរៀនដែលផ្ដោតលើការទន្ទេញ ដែលមានភាពងាយស្រួល ធ្វើយ៉ាងណាឱ្យមានការចងចាំបានល្អ។ ២. រៀនឱ្យយល់ មានន័យថា រៀនយល់ពីខ្លឹមសារ ឬវិធីសាស្រ្តដោយមិនផ្ដោតលើការទន្ទេញ និង ៣.ការរៀនឱ្យចេះគិត ការបង្រៀនមនុស្សឱ្យចេះគិតគឺជាចំណុចដែលពិបាក ហើយដើម្បីរៀនឱ្យចេះគិតបាន គឺត្រូវអនុវត្តទៅលើការសិក្សាផ្នែកបច្ចេកវិទ្យាឱ្យបានច្រើន ព្រោះកាលណាយើងចំណាយពេលច្រើនអនុវត្តនឹងនាំឱ្យរៀនពូកែ។ ប្រធានផ្នែកអភិវឌ្ឍន៍អាជីវកម្ម និងសហស្ថាបនិក នៃ Elite Vigour បន្ថែមថា បច្ចុប្បន្ន​នេះមានភាពងាយស្រួលនៅក្នុងការរៀនបច្ចេកវិទ្យា ដោយសារយើងមានអ៊ីនធឺណិត មានតិចណូឡូជី ដែលអាច​ឱ្យ​សិស្សានុសិស្សព្យាយាមរៀន ព្យាយាមស្វែងយល់ ចូលសិក្ខាសាលា និងរៀនពីបច្ចេកវិទ្យាបានច្រើន ទោះយើងមិនចេះធ្វើប៉ុន្តែយើងអាចយល់បានថា តើបច្ចេកវិទ្យាទាំងអស់នោះយើងអាចយកមកបម្រើបម្រាស់របៀបម៉េចនៅក្នុងវិស័យដែលយើងកំពុងធ្វើការ៕