ការប្រឡង​ប្រជែង​ជ្រើសរើស​គ្រូ​បង្រៀន​អនុវិទ្យាល័យ គ្រោង​នឹង​ប្រព្រឹត្ត​ទៅ​នៅ​ដើម​ខែក្រោយ​នេះ ដោយ​មាន​បេក្ខជន​ដាក់ពាក្យ​ប្រឡង​សរុបចំនួន ៣៣ ៣១៤នាក់ ខណៈ​ដែល​ការ​ជ្រើសរើស​មានចំនួន ៤៤១កន្លែង។

ឯកឧត្តមឧបនាយករដ្ឋមន្ត្រី ហ៊ុន ម៉ានី រដ្ឋមន្រ្តីក្រសួងមុខងារសាធារណៈ និង​ជា ប្រធានគណៈកម្មការការប្រឡងប្រជែង មានប្រសាសន៍ថា ចំនួនដាក់ពាក្យ​ដ៏​ច្រើន​លើសលប់នេះ បាន​ឆ្លុះ​បញ្ចាំង​ពី​ការ​ជឿទុក​ចិត្ត​​មក​លើប្រព័ន្ធនៃការប្រឡងប្រជែងជ្រើសរើស​មន្រ្តីរាជការស៊ីវិល តាមនិយាម​ដែលបានដាក់ចេញ។ ឯកឧត្តមបន្ថែមថា លទ្ធផលនៃការជឿទុកចិត្តនេះ ឆ្លុះបញ្ចាំងពីការខិតខំប្រឹងប្រែង និងការលះបង់របស់ថ្នាក់ដឹកនាំ ជាពិសេសសមាជិក សមាជិកា នៅក្នុងគណៈកម្មការ និងអនុគណៈកម្មការរៀបចំការប្រឡង។

ការប្រឡងប្រជែង​ជ្រើសរើស​គ្រូបង្រៀនអនុវិទ្យាល័យ គ្រោង​នឹង​ប្រើប្រាស់​រយៈពេល៤ថ្ងៃ គឺពីថ្ងៃទី២ ខែឧសភា រហូត​ដល់ថ្ងៃទី៥ ខែឧសភា ដោយ​ប្រើប្រាស់មណ្ឌលប្រឡងចំនួន៣ ដើម្បីសម្របខ្លួន​ទៅតាម​បេក្ខជន​ដែលមាន​ចំនួន​ច្រើន គឺសាកលវិទ្យាល័យភូមិន្ទភ្នំពេញ, សាលា​ភូមិន្ទរដ្ឋបាល និង​សាកលវិទ្យាល័យ​ភូមិន្ទនីតិសាស្រ្ត និង​វិទ្យាសាស្រ្តសេដ្ឋកិច្ច។

កាលពីពាក់កណ្តាលខែកុម្ភៈ ឆ្នាំ២០២៤ ក្រសួងមុខងារសាធារណៈ បានប្រកាស​ពីការជ្រើសរើស​គ្រូបង្រៀន​សម្រាប់បង្រៀន​នៅអនុវិទ្យាល័យ ចំនួន៤៤១នាក់ ​ក្នុង​ក្របខណ្ឌ​ក្រសួងអប់រំ យុវជន និងកីឡា ក្នុងនោះ​តាមប្រព័ន្ធបណ្តុះបណ្តាល បរិញ្ញាបត្រ+១ ជំនាន់ទី១ ចំនួន ១០៩នាក់, ប្រព័ន្ធបណ្តុះបណ្តាល ១២+៤ ជំនាន់ទី៤ ចំនួន ៨៩នាក់ និង​តាមប្រព័ន្ធបណ្តុះបណ្តាល ១២+២ ជំនាន់ទី៣២ ចំនួន ២៤៣នាក់។

បេក្ខជនដែលអាចដាក់ពាក្យ​ប្រឡង​ គឺត្រូវ​មានកម្រិតវប្បធម៌​ចាប់ពីសញ្ញាបត្រ​មធ្យមសិក្សា​ទុតិយភូមិ ឬសញ្ញាបត្រ​សមមូល ឬសញ្ញាបត្រ​បច្ចេកទេស​វិជ្ជាជីវៈកម្រិត៣ សម្រាប់ប្រព័ន្ធបណ្តុះបណ្តាល ១២+២ និង ១២+៤ និងសញ្ញាបត្រ​បរិញ្ញាបត្រឡើងទៅសម្រាប់ប្រព័ន្ធបណ្តុះបណ្តាលបរិញ្ញាបត្រ+១ ។ បេក្ខជនដែលប្រឡងជាប់ នឹងទទួលការបណ្តុះបណ្តាល​រយៈពេល ១ឆ្នាំ ៤ឆ្នាំ និង២ឆ្នាំ ដោយចាប់ផ្តើម​នៅ​ដើម​ឆ្នាំ​២០២៤ នៅតាម​វិទ្យាស្ថានគរុកោសល្យ និង​មជ្ឈមណ្ឌល​គរុកោសល្យ​ភូមិភាគ៕