ចំពោះ​ការ​លើក​ឡើង​របស់ប្រមុខរាជរដ្ឋាភិបាល​​កម្ពុជា ដែល​ចង់​ឱ្យ​មានការ​បង្កើតទារកដ្ឋាន និងមត្តេយ្យសិក្សា​សហគមន៍​នៅ​ក្បែរ​តំបន់​រោងចក្រ, សហជីព​វិស័យកាត់ដេរ បានបង្ហាញការគាំទ្រ ដោយថា គោលនយោបាយនេះនឹងជួយ​សម្រួល និង​ផ្តល់ភាពកក់ក្តៅដល់និយោជិតដែលមានកូនតូច។

លោក ប៉ាវ ស៊ីណា ប្រធានសម្ព័ន្ធសហជីព​ចលនា​កម្មករ មានប្រសាសន៍ថា ការ​បង្កើត​ទារកដ្ឋាន និង​មត្តេយ្យសិក្សា​សហគមន៍​នៅ​ក្បែរ​តំបន់រោងចក្រ ជាចំណុចល្អបំផុត ដែលរាជរដ្ឋាភិបាលបានគិតគូរ​មិន​ត្រឹម​តែ​លើ​ការងារ​របស់កម្មករនិយោជិតនៅ​តាម​សហគ្រាស​ប៉ុណ្ណោះទេ តែក៏​បាន​គិត​គូរ​ដល់​ស្ថានភាពជីវភាព នៃក្រុមគ្រួសារ កម្មករនិយោជិតទៀតផង។

លោក ប៉ាវ ស៊ីណា បន្ថែមថា កន្លងមកកម្មករនិយោជិតដែលមានកូនតូច តែងសម្តែងការព្រួយបារម្ភអំពីបញ្ហាសុខភាព​ សុវត្ថិភាព និង​ការ​មើល​ថែទាំកូនរបស់ខ្លួននៅពេលកំពុងបំពេញការងារ ដូចនេះ ការដែលមានទារកដ្ឋាន និងមត្តេយ្យសហគមន៍​នៅ​ក្នុង​ក្បែរ​រោងចក្រ​សហគ្រាស នឹងធ្វើឱ្យកម្មករនិយោជិតដែលមានកូនតូច មានភាពកក់ក្តៅចិត្ត និងមានការផ្តោត​អារម្មណ៍​ទៅលើការងារ។

កាលពីពេលថ្មីៗនេះ សម្តេចធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា បានថ្លែងថា រាជរដ្ឋាភិបាល​បាន​គិតគូរជាជំហាន ដើម្បីជួយ​សម្រួលដល់​កម្មករ-កម្មការិនីដែល​មក​ធ្វើ​ការ​​ ជួប​ការលំបាកក្នុងការថែទាំកូន ដោយ​ខ្លះ​អាច​យកកូន​ទៅផ្ញើ​អ្នកជិតខាង ឬជួលអ្នកថែទាំ ដែល​ត្រូវ​ចំណាយ​បន្ថែម និង​បារម្ភពីសុវត្ថិភាពកូនផងនោះ។ ដូចនេះ ការបង្កើតទារកដ្ឋាន និងមតេ្តយ្យសិក្សាសហគមន៍ នៅក្បែររោងចក្រសហគ្រាស គឺជាការគិតគូរពីអត្ថប្រយោជន៍ការងារ ក្នុងរយៈពេលវែង និងថែមទាំងសម្រួលបន្ទុកអាណាព្យាបាលក្នុងការមើលថែកូនៗបានមួយកម្រិត ក៏ដូចជាលើកកម្ពស់អត្រាចូលសិក្សារបស់កុមារចាប់ពីកំរិតមត្តេយ្យផងដែរ។ ជាមួយគ្នា ​មត្តេយ្យសហគមន៍ គឺ​មិន​មែន​សម្រាប់តែបងប្អូន​កម្មករកម្មការិនី​ប៉ុណ្ណោះទេ តែក៏​សម្រាប់កូនចៅ​ប្រជាពលរដ្ឋ​នៅ​ក្នុងសហគមន៍​នោះផងដែរ ដែល​អាច​យកកូនចៅទៅដាក់នៅ​មត្តេយ្យ​សហគមន៍នៅក្បែរផ្ទះរបស់ពួកគាត់។ ​​  

គួរបញ្ជាក់ថា ការបង្កើតទារកដ្ឋាន និងមត្តេយ្យសិក្សាសហគមន៍ នៅក្បែរតំបន់រោងចក្រ គឺជាការងារអាទិភាពមួយ ក្នុង​ចំណោមការងារអាទិភាពទាំង ៤ចំនុច នៃគោលនយោបាយរបស់រាជរដ្ឋាភិបាល​អាណត្តិទី៧​ ដែលត្រូវអនុវត្ត​ក្នុងរយៈ​ពេល​ពីរឆ្នាំ​។ ប្រមុខរាជរដ្ឋាភិបាលកម្ពុជា បាន​ស្នើ​ដល់ក្រសួងការងារ និងបណ្តុះបណ្តាលវិជ្ជាជីវៈ ត្រូវ​សហការជាមួយ​ក្រសួងកិច្ច​ការ​នារី ក្រសួងអប់រំ យុវជន និង​កីឡា តំណាង​ភាគី​និយោជក និ​ងតំណាង​ភាគី​កម្មករ​និយោជិត រួមគ្នា​សិក្សា​លទ្ធភាព​បង្កើត​ទារក​ដ្ឋាន និងមត្តេយ្យសហគមន៍ នៅតាម​តំបន់​ដែលមាន​រោងចក្រ។

បើយោងតាមរបាយការណ៍ របស់ក្រសួងការងារ និងបណ្តុះបណ្តាលវិជ្ជាជីវៈ គិតចាប់ពីថ្ងៃទី១ ខែមករា ឆ្នាំ២០១៨ មកដល់ថ្ងៃទី២ ខែតុលា ឆ្នាំ២០២៣ កម្មករនិយោជិតជាស្ត្រី ដែលបានសម្រាលកូនមានចំនួន ៤១៩,០៤៤នាក់ និងសម្រាល​កូនបានចំនួន ៤០៦,០១២នាក់។ ដោយឡែក គិតចាប់ពីថ្ងៃទី១ ខែសីហា ដល់ថ្ងៃទី២ ខែតុលា ឆ្នាំ២០២៣ កម្មការិនី មន្រ្តីរាជការ មន្រ្តីកិច្ចសន្យា ជាស្រ្តីសម្រាលកូនមានចំនួន ១០,០៦២នាក់ សម្រាលកូនបានចំនួន ៩,៦៨៥នាក់៕