កញ្ញា សេង ហ្គេកលី ជានិស្សិតកំពុងសិក្សាផ្នែកចិត្តវិទ្យា និងជាអ្នកនិពន្ធសៀវភៅ ព្រមទាំងជាអ្នកបង្កើតមាតិកាវីដេអូលើកទឹកចិត្តនៅលើបណ្តាញសង្គម បាននិយាយថា កត្តាដែលជំរុញឱ្យការស្វែងរកទេពកោសល្យខ្លួនឯងមានប្រសិទ្ធភាព គួរតែកាត់បន្ថយការតាមដានរឿងរ៉ាវឯកជនភាពរបស់អ្នកដទៃ ហើយ​គួរ​ផ្តោត​ចំពោះជីវិត​ពិត​របស់ខ្លួន​ឯង។

ហ្គេកលី លើក​ឡើងថា អ្នកបង្កើតមាតិកាមួយចំនួននៅតាមបណ្តាញសង្គម គ្រាន់តែត្រូវការចំណាប់អារម្មណ៍របស់អ្នកតាមដានប៉ុណ្ណោះ ដោយមិនបានឆ្លុះបញ្ចាំងពីតថពិតនៃការរស់នៅ ហើយថែមទាំងមិនអាចយកទៅអនុវត្តបាន។

ក្រៅតែពីកាត់បន្ថយការតាមដានរឿងរ៉ាវអ្នកដទៃ គឺត្រូវផ្តល់ឱកាសទៅកាន់ខ្លួនឯងឱ្យច្រើនជាងមុនដូចជា ចំណាយពេលជាមួយខ្លួនឯងឱ្យបានច្រើន ឆ្លុះបញ្ចាំង និងសកម្មភាពនានាទៀត។  កញ្ញាយល់ថា វាអាចជាបញ្ហាប្រឈមមួយដែរ សម្រាប់អ្នកដែលមិនសូវបានតាមដានអំពីចំណង់ចំណូលចិត្តខ្លួនឯង ដូច្នេះត្រូវបង្កើត និងបំផុសសំណួរទៅកាន់ខ្លួនឯងឱ្យបានរឿយៗ ដើម្បីរក្សាស្មារតីឱ្យនៅជាមួយនឹងខ្លួនឯង។

កញ្ញា សេង ហ្គេកលី

“ជំនួយឱ្យការតាមដានជីវិតអ្នកដទៃ អាចអង្គុយហើយសួរខ្លួនឯងថា តើស្រឡាញ់អ្វី? តើធ្វើយ៉ាងដូចម្តេចបានសប្បាយចិត្ត? ហើយអ្វីខ្លះដែលនាំឱ្យអារម្មណ៍អ្នកមិនស្បាយចិត្ត? តើនៅថ្ងៃអនាគតចង់បានអ្វីខ្លះ? សំណួរទាំងនេះជួយឱ្យការឆ្លុះបញ្ចាំងអំពីខ្លួនឯង និងនាំទៅរកការស្គាល់ខ្លួនឯង”

កញ្ញា បន្តថា កន្លងមកនាងបានសង្កេតឃើញថា មានយុវជនមួយចំនួយស្គាល់ច្បាស់ពីជីវិតរបស់តារាល្បីៗ ប៉ុន្តែហាក់មិនស្គាល់ពីខ្លួនឯងទៅវិញ ដូច្នេះវាមិនចម្លែកនោះទេ ដែលនៅជាមួយខ្លួនឯងជាង១០ឆ្នាំហើយ នៅតែមិនស្គាល់ខ្លួនឯង។ ការស្គាល់ពីខ្លួនឯង វាទាមទារឱ្យយើងចេះសង្កេត និងសួរខ្លួនឯងជាប្រចាំទើបយើងអាចស្គាល់ពីខ្លួនឯង និងដឹងពីគោលដៅនៃជីវិត ។

និស្សិតផ្នែកចិត្តវិទ្យា រូបនេះបន្ថែមថា កន្លងមកនាងក៏ធ្លាប់ជួបប្រទះនឹងបញ្ហាការបាត់បង់ខ្លួនឯងដែរ ។ នាងរំលឹកថា កាលពីប្រាំមួយឆ្នាំមុន នាងបានយកស្ថានភាពខ្លួនឯងទៅប្រៀបធៀបជាមួយនឹងអ្នកដទៃ ហើយវាក៏បណ្តាលឱ្យនាងកាន់តែលែងស្គាល់ខ្លួនឯង ធ្វើឱ្យលទ្ធផលការងារក៏ថមថយ ផលិតភាពការងារក៏ធ្លាក់ចុះ ប៉ុន្តែអ្វីៗត្រូវបានប្រសើរឡើងពេលដែលនាងចេះស្វែររកចំណុចខ្លាំងរបស់ខ្លួនឯង។ ការស្គាល់ខ្លួនឯង បានផ្តល់នូវគុណតម្លៃ និងបង្កើនស្នាដៃរបស់នាងបានសមប្រកបជាងមុន៕