ឱកាសសិក្សាអាហារូបករណ៍ថ្នាក់ភាសាចិននៅសាកលវិទ្យាល័យសៀងហៃឆ្នាំសិក្សា២០២៤-២០២៥។ អាហារូបករណ៍សិក្សាមាន ថ្នាក់ភាសាចិនថ្នាក់បរិញ្ញាបត្រជាន់ខ្ពស់​ ថ្នាក់ភាសាចិនថ្នាក់បរិញ្ញាបត្រ ថ្នាក់ភាសាចិន១ឆ្នាំ (រយៈពេល១១ខែ) និងថ្នាក់ភាសាចិន១ឆមាស (រយៈពេល៥ខែ)។

លក្ខខណ្ឌនៃការដាក់ពាក្យ ៖ ជាបេក្ខជនមិនមានសញ្ជាតិចិន មានអាយុចន្លោះពី១៦ ទៅ៣៥ឆ្នាំ (គិតត្រឹមថ្ងៃទី១ ខែកញ្ញា ឆ្នាំ២០២៤) មានភាពរួសរាយរាក់ទាក់ មិនធ្លាប់មានបទឧក្រិដ្ឋព្រហ្មទណ្ឌ គោរពច្បាប់និងបទបញ្ញាត្តិរបស់ប្រទេសចិន និងបទប្បញ្ញត្តិរបស់វិទ្យាស្ថានសិក្សា ឬសាកលវិទ្យាល័យ។ ជាមួយគ្នានេះ ត្រូវមានសុខភាពល្អទាំងកម្លាំងកាយ និងស្មារតី មានអាកប្បកិរិយាល្អ និងមានចំណាប់អារម្មណ៍លើការសិក្សាភាសាចិន និងការងារពាក់ព័ន្ធ។

អាហារូបករណ៍សម្រាប់ថ្នាក់អនុបណ្ឌិតផ្នែកអប់រំភាសាចិននឹងចាប់ផ្ដើមសិក្សានៅខែកញ្ញា ឆ្នាំ២០២៤ មានរយៈពេលសិក្សាអតិបរមា២ឆ្នាំ។ បេក្ខជនត្រូវមានសញ្ញាបត្របរិញ្ញាបត្រ មានពិន្ទុHSK កម្រិត៥ និងHSKK កម្រិតមធ្យម។ សម្រាប់បេក្ខជនថ្នាក់ភាសាចិនថ្នាក់បរិញ្ញាបត្រក្នុងការអប់រំអន្តរជាតិនឹងចាប់ផ្ដើមនៅដើមខែកញ្ញាឆ្នាំ២០២៤ដែលមានអតិបរមាសិក្សា៤ឆ្នាំ។ បេក្ខជនត្រូវមានសញ្ញាបត្រមធ្យមសិក្សាទុតិយភូមិ និងមាន HSK កម្រិត៤ និង HSKKកម្រិតមធ្យម។

អាហារូបករណ៍សម្រាប់កម្មវិធីសិក្សាមួយឆ្នាំ (រយៈពេលសិក្សា១១ខែ) បេក្ខជនត្រូវមាន HSK កម្រិត៣ និង HSKK ជាបេក្ខជនដែលសិក្សា អក្សរសិល្ប៍ចិន ប្រវត្តិសាស្ត្រចិន ឬកម្មវិធីទស្សនៈវិជ្ជាចិនដែលមានពិន្ទុអប្បបរមា HSK កម្រិត៤ និង HSKK កម្រិតមធ្យម។ សម្រាប់ថ្នាក់ភាសាចិន១ឆមាសមានរយៈពេល៥ខែ បេក្ខជនត្រូវមានHSK កម្រិត៣ និង HSKK (ត្រូវបានទាមទារ)។

ដើម្បីធ្វើការដាក់ពាក្យបេក្ខជនត្រូវមានច្បាប់ថតចម្លងលិខិតឆ្លងដែន ច្បាប់ចម្លងនៃរបាយការណ៍ពិន្ទុតេស្ត HSK/HSKK (រយៈពេល២ឆ្នាំក្រោយ)។ ជាមួយគ្នានេះ បេក្ខជនត្រូវមានលិខិតបញ្ជាក់ពីថ្នាក់ដឹកនាំនៃស្ថាបនការងារ ឬសាលារៀន និងមានសញ្ញាបត្រដែលបានកំណត់ខាងលើ និងប្រតិចារិកផ្លូវការ។

សម្រាប់ព័ត៌មានលម្អិតនៃការដាក់ពាក្យអាចចូលទៅកាន់ https://mp.weixin.qq.com/s/yrxRl6IFWQ8t_aNxibRX0g ។ ចាប់ទទួលពាក្យពីថ្ងៃផ្សាយដំណឹងរហូតដល់ថ្ងៃទី១៥ ខែឧសភា និងថ្ងៃទី១៥ ខែកញ្ញា ឆ្នាំ២០២៤ តាមកម្រិតសិក្សា៕