អាការថប់បារម្ភ អាចបណ្តាលមកពីសម្ពាធស្ត្រេសរ៉ាំរ៉ៃ ឬតានតឹងក្នុងរយៈពេលយូរអង្វែង ! ចំណែកស្រ្តេសវិញ គឺតែងកើតឡើងចំពោះមនុស្សគ្រប់គ្នា គ្រាន់តែតិច ឬច្រើន​ទៅតាមស្ថានភាពជាក់ស្ដែងរបស់បុគ្គលម្នាក់ៗប៉ុណ្ណោះ។ ការដែលបណ្តោយឱ្យភាពតានតឹងបង្កើតបានទៅជាជំងឺថប់បារម្ភ មិនមែនជាផលល្អសម្រាប់សុខុមាលភាពនោះទេ។ ហើយអាការៈប្រភេទនេះក៏មិនងាយស្រួលក្នុងការកត់សម្គាល់នោះដែរ។ ដូច្នេះ គឺត្រូវការឱ្យបុគ្គលខ្លួនឯងផ្ទាល់គួរមានកាតព្វកិច្ច ព្យាយាមកត់សម្គាល់អំពីអាការៈនេះដោយខ្លួនឯង ដើម្បីបញ្ចៀស ឬកាត់បន្ថយនូវផលពិបាកចំពោះសុខភាព មិនថាក្នុងពេលបច្ចុប្បន្ន និងអនាគត។

តាមរយៈគេហទំព័រ healthline បានឱ្យដឹងបន្ថែមថា អាការៈថប់បារម្ភ ជារឿយៗ នាំឱ្យមនុស្សមានភាពភ័យខ្លាច និងព្រួយបារម្ភច្រើនជ្រុល ។ ចំពោះកត្តាដែលអាចកត់សម្គាល់ និងសង្កេតដឹងអំពីសភាពថប់បារម្ភ គឺមានដូចជា សុខភាពបេះដូងមិនប្រក្រតី (ចង្វាក់បេះដូងដើរខុសធម្មតា) ចាប់ផ្តើមដកដង្ហើមលឿនជាងមុន នឿយណាយនឹងការទទួលទានអាហារ និងពិបាកក្នុងការផ្តោតចំពោះកិច្ចការអ្វីមួយ មិនថាការងារនោះសំខាន់បែបណានោះទេ។

យ៉ាងណាក៏ដោយ គួររំឮកបន្ថែមថា ជំងឺថប់បារម្ភ អាចបង្ហាញចេញមកក្នុងសភាពផ្សេងៗគ្នា ទៅតាមសុខភាពរបស់មនុស្សម្នាក់ៗ ដោយមនុស្សមួយចំនួនទៀតអាចនឹងជួបប្រទះបទពិសោធន៍ខុសប្លែក និងមានអាការៈមិនស្រួលក្នុងពោះជាដើម ដែលបង្ហាញបន្ថែមដូចជា លាមកមិនប្រក្រតី ​​​​​​​​​​​​​កើតរមាស់ ឆាប់ភ័យខ្លាច ក្អក បែកញើស សុបិនមិនល្អ ហើយតែងទទួលបានអារម្មណ៍ឈឺចាប់ពេលគិតដល់រឿងអ្វីមួយ។

តើគួរតែបញ្ចៀស ឬក៏ព្យាបាលអាការៈថប់បារម្ភដោយរបៀបណា?

គន្លឹះក្នុងការ ធ្វើឱ្យជំងឺថប់បារម្ភ ត្រូវបានកាត់បន្ថយ ឬក៏ព្យាបាលក្នុងរូបភាពណាមួយ គឺមានលក្ខណៈខុសគ្នា ពីមនុស្សម្នាក់ ទៅកាន់មនុស្សម្នាក់ទៀត។ ជំងឺថប់បារម្ភ អាចត្រូវបានព្យាបាល តាមវិធីផ្សេងៗគ្នាដែរ មានជម្រើសមួយដែលគេប្រើជាទូទៅ គឺ រក្សាអាកប្បកិរិយារស់នៅឱ្យមានភាពវិជ្ជមាន អនាម័យល្អ ហើយទទួលស្គាល់ពីស្ថានភាពជាក់ស្ដែង ឬក៏ទៅជួបជាមួយអ្នកជំនាញដើម្បីទទួលបានការប្រឹក្សា ហើយបើក្នុងករណីធ្ងន់ធ្ងរណាមួយនោះអាចនឹងទទួលបានឱសថដើម្បីរំងាប់អារម្មណ៍ជាដើម។

ប៉ុន្តែបើងាកទៅមើលគន្លឹះ ឬការគ្រប់គ្រងជំងឺថប់បារម្ភ ដោយវិធីសាស្រ្តធម្មជាតិវិញ នោះលោកអ្នកអាចចាប់ផ្តើមពង្រឹងទម្លាប់រស់នៅប្រចាំថ្ងៃដូចជា ៖ ការហាត់ប្រាណ ការគេងឱ្យបានគ្រប់គ្រាន់តាមតម្រូវការរាងកាយ ការធ្វើសមាធិ ឬការបង្កើនបរិយាកាសល្អៗ ចំពោះកន្លែងដែលប្រើប្រាស់ក្នុងពេលច្រើនជាងគេ ថែមទាំងយកចិត្តទុកដាក់នឹងរបបអាហារមានជីវជាតិហើយទទួលទានមិនច្រើនពេក ឬតិចពេក៕