ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
តើអ្នកចង់ចិញ្ចឹមកូនរបស់អ្នក តាមរបៀបដែលឪពុកម្ដាយ Bill Gates ចិញ្ចឹមគាត់ដែរឬទេ? យោងតាម CNBC បានបង្ហាញពី វិធីសាស្ត្រ ដែលម្ដាយឪពុក Bill Gates ចិញ្ចឹមកូន។ លោក William Gates និងភរិយារបស់គាត់ឈ្មោះ Mary មានវិធីសាស្ត្រសំខាន់ៗ ចំនួន ៤ ដែលអាចជួយឱ្យកូនរបស់គាត់ ក្លាយជាបុគ្គលអស្ចារ្យម្នាក់។
១. ផ្ដល់ឯករាជ្យភាព ៖ លោក Bill Gates កាលនៅក្មេង គឺជាកុមារ ដែលចង់បានឯករាជ្យភាព ហើយឪពុកម្ដាយរបស់គាត់ ក៏បានផ្ដល់សេរីភាពឱ្យគាត់ ធ្វើអ្វីដែលគាត់ចង់ធ្វើដូចគ្នា។ នៅអាយុ ១៣ឆ្នាំ កុមារ៉ា Gates បានចំណាយពេលយ៉ាងច្រើននៅឆ្ងាយពីផ្ទះ។ បើយោងតាមការសម្ភាសន៍ឪពុក របស់លោក Gates បានប្រាប់សារព័ត៌មាន Wall Street Journal ថា មានយប់ខ្លះ កូនរបស់គាត់មិនគេងនោះទេ ព្រោះរីករាយ នឹងការប្រើប្រាស់ និងស្រាវជ្រាវអំពីបបច្ចេកវិទ្យាគ្មានដែនកំណត់ នៅសាកលវិទ្យាល័យ។
២. មិនអនុញ្ញាតឱ្យបោះបង់ នូវអ្វីដែលកូនមិនពូកែ ៖ កុមារ Gates មានជំនាញក្នុងរឿងជាច្រើន ប៉ុន្តែឪពុកម្ដាយរបស់គាត់ ក៏បានជំរុញឱ្យគាត់ធ្វើអ្វី ដែលគាត់មិនចូលចិត្ត និងពូកែផងដែរ។ ជំនាញទាំងនោះមានដូចជា ជំនាញហែលទឹក បាល់ទាត់ និងរៀនតន្រី្តជាដើម។ ផ្ទុយពីម្ដាយឪពុកមួយចំនួនដែលយល់ឃើញថា ការជំរុញឱ្យកូនធ្វើសកម្មភាពដែលគេមិនពូកែ អាចធ្វើឱ្យប៉ះពាល់ដល់ផ្លូវចិត្ត និងភាពជឿជាក់។ ឪពុកម្ដាយ លោក Bill Gates យល់ថា ការសាកល្បងធ្វើរឿងថ្មី បានអនុញ្ញាតឱ្យកូនរបស់គាត់អភិវឌ្ឍផ្នត់គំនិតរីកចម្រើន និងរៀនពីសារៈសំខាន់នៃភាពបរាជ័យ។
៣. មិនបង្ខំឱ្យកូន បំពេញតាមការរំពឹងរបស់ពួកគាត់ ៖ ឪពុកម្ដាយរបស់លោក Bill Gates មិនរំពឹងថា កូនប្រុសរបស់គាត់ក្លាយជាមហាសេដ្ឋីនោះទេ។ បើតាមសម្ដីរបស់ឪពុក Bill Gates បានឱ្យដឹងថា គាត់ និងប្រពន្ធគាត់ រំពឹងថា គាត់នឹងបញ្ចប់ថា្នក់មហាវិទ្យាល័យដោយជោគជ័យ ប៉ុន្តែកូនរបស់គាត់បានធ្វើការសម្រេចចិត្តដ៏គួរឱ្យភ្ញាក់ផ្អើលមួយគឺ ចាកចេញពី Harvard មុនពេលបញ្ចប់ការសិក្សា។ លោកបន្តថា នេះគឺជាការសម្រេចចិត្តដ៏តានតឹងមួយ ប៉ុន្តែទីបំផុតគាត់នៅតែគាំទ្រការសម្រេចចិត្តរបស់កូនគាត់។ គាត់បន្តថា ចំណុចដែលនាំឱ្យគាត់សម្រេចចិត្តគាំទ្រកូនរបស់គាត់ ព្រោះកូនរបស់គាត់ ដឹងច្បាស់ថាខ្លួនឯងកំពុងតែធ្វើអ្វី និងចង់បានអ្វី។ ក្រោមពីឈប់រៀន លោក Bill Gates បានផ្លាស់ទៅទីក្រុង Seattle ជាមួយសហស្ថាបនិករបស់គាត់គឺ Paul Allen ដើម្បីផ្តោតលើការកសាងក្រុមហ៊ុន Microsoft ។
៤. លើកទឹកចិត្តឱ្យកូនចូលរួមការងារក្នុងសហគមន៍ ៖ ឪពុកម្ដាយរបស់ Gates បានចូលរួម យ៉ាងសកម្មក្នុងការងារមនុស្សធម៌ និងសហគមន៍ ហើយពួកគាត់ ក៏បានជំរុញឱ្យកូនចូលរួមក្នុងសកម្មភាពនេះដែរ។ ឪពុកម្ដាយរបស់ Bill Gates បានឱ្យតម្លៃខ្លាំងលើការជួយអ្នកដទៃ ហើយក៏បានបង្រៀនកូនរបស់គាត់ អំពីគុណតម្លៃនៃសេចក្ដីសប្បុរសដែរ៕
