យើងគ្រប់គ្នាសុទ្ធតែបានដឹងហើយថា ទម្លាប់អាន និងការសរសេរ អាចជួយឱ្យកុមាររីកចម្រើននៅក្នុងសាលា និងមានភាគរយទទួលភាពជោគជ័យ ក្នុងអាជីពនាពេលអនាគត ។ ប៉ុន្តែឥឡូវនេះ ការអាន និងសរសេរ មានអត្ថប្រយោជន៍លើសពីភាពជោគជ័យ ក្នុងការសិក្សា និងអាជីព, ទម្លាប់នៃការចាត់ទុកការអាន និងសរសេរ ជាការកម្សាន្ត ដើរតួនាទីយ៉ាងសំខាន់ ក្នុងការជួយកុមារឱ្យដឹកនាំជីវិតខ្លួនឯង ឆ្ពោះទៅរកសុភមង្គលជីវិត និងមានសុខភាពល្អ។

យោងតាមរបាយការណ៍របស់ National Literacy Trust របស់ចក្រភពអង់គ្លេស មានចំណងជើងថា «ទំនាក់ទំនងរវាង សុខុមាលភាពផ្លូវចិត្ត នឹងការអាន និងសរសេរ – Mental wellbeing, reading and writing» បានរកឃើញថា កុមារដែលចូលចិត្តអាន និងសរសេរនៅពេលទំនេរ មានសុខុមាលភាពផ្លូវចិត្តល្អប្រសើរជាងកុមារ ដែលមិនមានទម្លាប់មួយនេះ។

លទ្ធផលនៃការសិក្សាបង្ហាញថា កុមារដែលចូលចិត្តអាន និងសរសេរ នៅពេលទំនេរ ក្រៅម៉ោងសិក្សា មានអាកប្បកិរិយាវិជ្ជាចំពោះអក្ខរកម្ម និងទំនងជាមានកម្រិតសុខុមាលភាពផ្លូវចិត្តខ្ពស់ជាងមិត្តភក្តិរបស់គេបីដង (៣៩,៤ ភាគរយ ទល់នឹង ១១,៨ ភាគរយ)។ ផ្ទុយមកវិញ បើនិយាយចំពោះកុមារ ដែលមិនចូលចិត្តអាន និងសរសេរ គឺងាយរងគ្រោះនឹងបញ្ហាផ្លូវចិត្ត ជាមិត្តភក្ដិរបស់គេរហូតដល់ ២ ដង (៣៧,៤ភាគ ទល់នឹង ១៥ ភាគរយ)។

លទ្ធផលនេះ គឺផ្អែកលើការស្ទង់មតិប្រចាំឆ្នាំមួយ ដែលមានឈ្មោះថា «ការស្ទង់មតិអក្ខរកម្មប្រចាំឆ្នាំ – Annual Literacy Survey» ដែលសិក្សាលើកុមារ និងមនុស្សវ័យក្មេងចំនួន ៤៩,០៤៧ នាក់ ដែលមានអាយុ ចន្លោះពី ៨ ទៅ ១៨ ឆ្នាំ នៅទូទាំងប្រទេសអង់គ្លេស។ បន្ថែមពីលើការស្ទង់មតិចំពោះកុមារ អំពីអាកប្បកិរិយា ការអាន និងសរសេរ, ក្រុមអ្នកស្រាវជ្រាវ ក៏បានសួរអំពីអារម្មណ៍របស់ពួកគេផងដែរថា តើកុមារទាំងនេះ មានភាពរីករាយក្នុងការរស់នៅកម្រិតណា?

ផ្អែកការឆ្លើយតបនឹងសំណួររបស់កុមារ ក្រុមអ្នកស្រាវជ្រាវ អាចបង្កើតសន្ទស្សន៍សុខុមាលភាពផ្លូវចិត្តថ្មីមួយ (Mental Wellbeing Index)។ នៅលើមាត្រដ្ឋាន ពី ១ ដល់ ១០ សន្ទស្សន៍នោះ បានបង្ហាញអ្នកស្រាវជ្រាវអំពីកម្រិតនៃភាពរីករាយរបស់កុមារ ក្នុងការរស់នៅរបស់ពួកគេ និងរបៀបដែលពួកគេអាច ស៊ូទ្រាំនឹងស្ថានភាពលំបាក និងរបៀបដែលពួកគេមានអារម្មណ៍មកលើខ្លួនឯង។

លទ្ធផលជារួម កុមារ និងយុវជន នៅទូទាំង ចក្រភពអង់គ្លេស មានសុខុមាលភាពផ្លូវចិត្តល្អប្រសើរ (ទទួលបានពិន្ទុ ៧,៣ លើ ១០)។ ទោះជាយ៉ាងណាក៏ដោយ កុមារម្នាក់ក្នុងចំណោម ១០នាក់ ទទួលបានពិន្ទុទាបជាងពាក់កណ្ដាល នៃសន្ទស្សន៍សុខុមាលភាពផ្លូវចិត្ត ដែលបានកំណត់ដោយក្រុមអ្នកស្រាវជ្រាវ ហើយទិន្នន័យនេះ បង្ហាញថា កុមារទាំងនោះ មិនពេញចិត្តចំពោះជីវិតរបស់ខ្លួនឯង។ ដូច្នេះ អ្នកស្រាវជ្រាវអាចសន្និដ្ឋានបានថា កាលណា កុមារ និងយុវជនកាន់តែច្រើន ឱ្យតម្លៃលើការអាន និងសរសេរ នាពេលទំនេរ កម្រិតនៃសុខភាពផ្លូវចិត្តរបស់ពួកគេ ក៏កាន់តែល្អប្រសើរតាមនោះដែរ។

ហេតុអ្វី? ព្រោះថា តាមរយៈការចាត់ទុកការអាន និងសរសេរ ជាការកម្សាន្ត នាពេលទំនេរ អាចជួយឱ្យកុមារអភិវឌ្ឍជំនាញអក្ខរកម្ម ដែលពួកគេត្រូវការ ដើម្បីគ្រប់គ្រងស្ថានការណ៍តានតឹងណាមួយ ក្នុងជីវិត។ ព្រមទាំងជួយឱ្យកុមារយល់អំពីលំហូរនៃអារម្មណ៍ខ្លួនឯង និងដឹងពីរបៀបបង្ហាញគំនិត និងអារម្មណ៍ នៅពេលដែលពួកគេត្រូវការមតិយោបល់ ឬការគាំទ្រពីអ្នកដទៃ។

អ្វីដែលរឹតតែពិសេសនោះគឺ ការចាត់ទុក ការអាន និងសរសេរ ជាការកម្សាន្តនៅពេលទំនេរ ក៏ផ្ដល់អត្ថប្រយោជន៍ សម្រាប់ការព្យាបាលផ្លូវចិត្តផងដែរ ព្រោះទម្លាប់នេះ អាចជួយកុមារ បង្កើតទំនុកចិត្ដលើខ្លួនឯង យល់ពីខ្លួនឯង កាត់បន្ថយអារម្មណ៍តានតឹង និងថប់បារម្ភ ព្រមទាំងជំរុញស្មារតីឱ្យចង់រៀនសូត្រ និងឆាប់យល់ទស្សនៈរបស់អ្នកដទៃ។

បច្ចុប្បន្ន កុមារ និងយុវជន កំពុងប្រឈមមុខនឹងសម្ពាធជាច្រើន ទាំងនៅសាលារៀន ផ្ទះ និងសង្គម។ ដូច្នេះ ការកសាងភាពធន់ ផ្នែកផ្លូវកាយ និងអារម្មណ៍របស់ពួកគេ គឺជារឿងសំខាន់ ដើម្បីអនុញ្ញាតឱ្យពួកគេអាចប្រឈមមុខនឹងបញ្ហាក្នុងជីវិត។ ខណៈក្រុមអ្នកស្រាវជ្រាវ ជឿជាក់ថា បុគ្គល ដែលមានទម្លាប់ អាន និងសរសេរ អាចដោះស្រាយបញ្ហារបស់ខ្លួនបានច្រើន៕