ទម្លាប់ស្ដាប់ដោយយកចិត្តទុកដាក់ (Active listening) នៅកន្លែងធ្វើការពិតជាមានសារៈសំខាន់ សម្រាប់ក្រុមការងារគ្រប់លំដាប់ថ្នាក់។ ការអនុវត្តជំនាញនេះ គឺជាការបង្ហាញទៅអ្នកធ្វើការជាមួយអ្នកថា អ្នកកំពុងគោរព និងឱ្យតម្លៃចំពោះអ្វីដែលគេកំពុងនិយាយ ព្រមទាំងបង្ហាញពីសីលធម៌ផ្ទាល់ខ្លួនផងដែរ ។

អ្វីជា ការស្ដាប់ដោយយកចិត្តទុកដាក់ (Active Listening)?

បើតាមវិទ្យាសា្ថនសន្តិភាពសហរដ្ឋអាមេរិក (United State Institute of Peace) បានឱ្យនិយមន័យ នៃការស្ដាប់ដោយយកចិត្តទុកដាក់ (Active Listening) ថា គឺជាវិធីប្រាស្រ័យទាក់ទង ដែលបង្ហាញថា អ្នកបានយល់អំពីអ្វី ដែលអ្នកដទៃនិយាយមកកាន់អ្នក ហើយអ្នកដឹងពីរបៀបឆ្លើយតបជាមួយគេបានត្រឹមត្រូវ ស្របតាមកាលៈទេសៈចំពោះមុខ។ ការស្ដាប់ដោយយកចិត្តទុកដាក់ (Active Listening) គឺលើសពីការស្ដាប់ពាក្យពេចន៍ធម្មតា ប៉ុន្តែវារួមបញ្ចូលទាំងការសង្កេតកាយវិការ និងទឹកមុខអ្នកដទៃ ព្រមទាំងសម្មភាពផ្សេងៗទៀត ហើយដឹងអំពីរបៀបឆ្លើយតប ឬប្រតិកម្មចំពោះស្ថានភាពនោះយ៉ាងល្អ។

បើតាមគេហទំព័រ Indeed ការអនុវត្តតាមជំហានចំនួន ៦ខាងក្រោមនេះ នឹងជួយពង្រឹងសមត្ថភាពស្ដាប់នៅកន្លែងធ្វើការ ព្រមទាំងជួយឱ្យការបំពេញការងារមានប្រសិទ្ធភាពខ្ពស់ ៖

១. ចៀសពីការរំខាន ៖ ខណៈពេលប្រជុំ ឬមានកិច្ចសន្ទនាអ្វីមួយ អ្នកគួរចៀសពីការរំខានគ្រប់ប្រភេទទៅតាមលទ្ធភាពដែលអ្នកធ្វើបាន ដូចជា ការដាក់កុំព្យូទ័រឱ្យស្លីប (Sleep) បិទសំឡេងទូរស័ព្ទ ឬបិទទ្វារការិយាល័យជាដើម។ ប្រសិនបើអ្នកមានគម្រោងប្រជុំ សូមព្យាយាមកក់បន្ទប់ណាដែលមិនមានសំឡេងរំខានពីខាងក្រៅ ព្រោះវាជួយឱ្យអ្នកអាចផ្ដោតអារម្មណ៍ ១០០ភាគរយលើការស្ដាប់។

២. ចេះប្រើភាសាកាយវិការ ៖ ខណៈពេលអ្នកដទៃ និយាយមកកាន់អ្នក ចូលបង្ហាញពួកគេថា អ្នកកំពុងស្ដាប់យ៉ាងយកចិត្តទុកដាក់បំផុត តាមរយៈកាយវិការ។ អ្នកអាចងក់ក្បាល ញញឹម ឬនិយាយបង្ហាញគំនិតយល់ស្របត្រង់ចំណុចណាមួយក៏បាន ដើម្បីបញ្ជាក់ថា អ្នកបានដាក់ចិត្តដាក់កាយស្ដាប់ការបង្ហាញគំនិតរបស់គេ។ ទង្វើនេះ ធ្វើឱ្យ​បុគ្គលដែលនិយាយមកកាន់អ្នកមានអារម្មណ៍កក់ក្ដៅ និងចង់និយាយអំពីអ្វីដែលគេចង់ចែករំលែករហូតដល់ចប់។

៣. ផ្ដោតលើការស្ដាប់តែមួយមុខគត់ ៖ ជំនួសឱ្យការគិតពីអ្វីដែលអ្នកត្រូវឆ្លើយតប អ្នកគួរផ្ដោតលើការស្ដាប់អ្វីដែលគេកំពុងនិយាយឱ្យបានល្អ ។ ត្រូវព្យាយាមបញ្ឈប់ការគិតរបស់អ្នក បន្ទាប់មកប្រមូលអារម្មណ៍ផ្ដោតលើការស្ដាប់តែមួយមុខគត់ ។ ក្រោយពីគេចែករំលែកគំនិតគេរួចរាល់ស៊ឹមចាប់ផ្ដើមគិតអំពីអ្វីដែលអ្នកអាចផ្ដល់ជាមតិយោបល់បន្ថែម។ លើសពីនេះ នៅពេលប្រជុំ អ្នកគួរមានកូនសៀវភៅមួយ ដើម្បីកត់ចំណាំរាល់សំណួរដែលអ្នកចង់សួរ ដូច្នេះអ្នកនឹងផ្តោតអារម្មណ៍លើការប្រជុំបានកាន់តែល្អ។

៤. យល់ន័យស៊ីជម្រៅពេលក្រោយ ៖ ព្យាយាមយល់អំពីអ្វី ដែលគេកំពុងនិយាយជាមុនសិនចាំស្វែងយល់អត្ថន័យស៊ីជម្រៅពេលក្រោយ ។ នៅពេលអ្នកយល់អំពីអ្វីដែលគេនិយាយ អ្នកក៏អាចកំណត់ពីគោលគំនិតចម្បងដែលគេបង្ហាញប្រាប់អ្នកផងដែរ ។ ម្យ៉ាងវិញទៀតការសង្កេតទឹកមុខវាគ្មិន ឬអ្នកធ្វើបទបង្ហាញក៏ជួយអ្នកឱ្យចងចាំ និងយល់ពីគំនិតគេបានច្រើនផងដែរ ។ លើសពីនេះ ករណីដែលអ្នកព្យាយាមរំលឹកអំពីអ្វីដែលគេនិយាយ ចូលគិតដល់ការលើកដាក់សំឡេង អាកប្បកិរិយា និងទឹកមុខរបស់គេ។

៥. សង្ខេបចំណុចគោលៗដែលគេនិយាយ ៖ វិធីសាស្ត្រមួយបង្ហាញថា អ្នកយល់ និងចាំ អ្វីដែលអ្នកដទៃនិយាយប្រាប់អ្នក គឺនិយាយសង្ខេបឡើងវិញ នូវអ្វីដែលគេបាននិយាយប្រាប់ឡើងវិញ។ ប្រសិនបើអ្នកនិយាយខុស គេអាចពន្យល់អ្នកសារដើម ត្រង់ចំណុចដែលអ្នកមិនយល់ ហើយសកម្មភាពនេះនឹងជួយឱ្យអ្នកយល់ពីគំនិតអ្នកដទៃកាន់តែប្រសើរ។

៦. ចេះសួរសំណួរ ៖ ការចេះសួរសំណួរប្រកបដោយការគិតត្រិះរិះ ជាវិធីមួយដែលបង្ហាញថា អ្នកបានយកចិត្តទុកស្ដាប់ការបកស្រាយរបស់គេ។ លើសពីនេះ នៅពេលសួរ ចូរសួរអំពីអ្វីដែលអ្នកនិយាយ ទើបតែបកស្រាយរួច ហើយសុំឱ្យគេជួយពន្យល់លម្អិត ។ ម្យ៉ាងវិញទៀត វិធីសួរសំណួរ ចូរសួរជាសំណួរបើក និងកំណត់ចំណុចឱ្យបានជាក់លាក់ ដើម្បីឱ្យគេងាយឆ្លើយ ហើយអ្នកក៏អាចទទួលបានព័ត៌មានបន្ថែមពីគេផងដែរ។

សរុបមក ការយកចិត្តទុកដាក់ស្ដាប់ គឺជាទង្វើដ៏គួរឱ្យគោរព និងតម្លៃបំផុតដែលមនុស្សត្រូវអនុវត្តជាប្រចាំ ព្រោះវាធ្វើឱ្យអ្នកក្លាយជាមនុស្សមានសីលធម៌ និងចេះគោរព និងឱ្យតម្លៃគំនិត និងការយល់ដឹងរបស់អ្នកដទៃ។ ការធ្វើបែបនេះ នឹងជួយឱ្យអ្នកមានទំនាក់ទំនងល្អជាមួយមនុស្សជុំវិញខ្លួន និងបំពេញការងារដោយជោគជ័យផងដែរ៕

ប្រភព៖

១. https://www.indeed.com/career-advice/career-development/listening-in-the-workplace

២. https://www.usip.org/public-education-new/what-active-listening