យើងទាំងអស់គ្នាសុទ្ធតែធ្លាប់ឮប្រយោគមួយឃ្លាថា ការញ៉ាំទឹកឱ្យគ្រប់គ្រាន់គឺជារឿងល្អ ព្រោះវាជួយឱ្យយើងអាចរក្សាជាតិទឹកក្នុងខ្លួន និងមានសុខភាពល្អ។ ប៉ុន្តែបើទោះជាដឹងថា ការទទួលទានទឹកមានភាពសំខាន់ក៏ដោយ ក៏មនុស្សមួយចំនួន នៅតែទទួលទានទឹកមិនគ្រប់គ្រាន់ដដែល។ ចំណុចនេះបង្កឱ្យមានបញ្ហាមួយចំនួន ដែលប៉ះពាល់ដល់សុខភាព និងការរស់នៅប្រចាំថ្ងៃ។

យោងតាម AWARENESS ACT បានបង្ហាញអំពីសញ្ញាទាំង ១០ដែលបញ្ជាក់យើង​ទទួលទានទឹកមិនគ្រប់៖

១. ស្បែកស្ងួត ​៖ សញ្ញាដំបូងដែលបង្ហាញថារាងកាយរបស់អ្នកកំពុងតែខ្វះជាតិទឹក គឺវាប្រែទៅជាស្ងួត និងគ្មានសំណើម។ លើសពីនេះ ប្រសិនបើស្បែករបស់អ្នកមិនបានទទួលជាតិទឹកគ្រប់គ្រាន់ វានឹងពិបាករក្សាភាពស្អាត និងពិបាកបន្សាបជាតិពុលក្នុងកោសិកា។ នៅពេលដែលបណ្ដោយឱ្យបញ្ហានេះបន្តកើតឡើង វាអាចបង្កឱ្យស្បែកឡើងកន្ទួលក្រហម និងមានជំងឺផ្សេងៗ។

២. ភ្នែកស្ងួត ៖ ភាពខ្សោះជាតិទឹកអាចបណ្ដាលឱ្យភ្នែករបស់អ្នកស្ងួត និងហូរឈាម។ រាងកាយរបស់អ្នកត្រូវការទឹក ដើម្បីផ្ដល់សំណើមដល់បំពង់បង្ហូរទឹកភ្នែក ដែលចាំបាច់ដើម្បីរក្សាសុខភាពភ្នែក និងធ្វើឱ្យភ្នែកមើលឃើញច្បាស់។

៣. ឈឺក្បាលជាប្រចាំ ៖ នៅពេលដែលមានបញ្ហាខ្វះជាតិទឹក វាធ្វើឱ្យខ្សោះជាតិទឹកក្នុងរាងកាយ ដែលបណ្ដាលឱ្យលំហូរឈាម និងអុកស៊ីសែន ដែលឆ្ពោះទៅកាន់ខួរក្បាលធ្លាក់ចុះ។ បញ្ហានេះ អាចបណ្ដាលឱ្យមានអាការឈឺក្បាល និងរលាក។ បញ្ហារលាកក្នុងខួរក្បាល គឺមានគ្រោះថ្នាក់ខ្លាំង វាមិនគ្រាន់តែធ្វើឱ្យឈឺក្បាលប៉ុណ្ណោះទេ ប៉ុន្តែវាក៏ធ្វើឱ្យខូចខួរក្បាលផងដែរ។

៤. មានក្លិនមាត់មិនល្អ ៖ ការទទួលទានទឹកគ្រប់គ្រាន់ នឹងជំរុញឱ្យការផលិតទឹកមាត់ក្នុងក្រពេញទឹកមាត់បន្តសកម្មភាពជាប្រចាំ។ ប៉ុន្តែកាលណា ដែលយើងទទួលទានទឹកមិនគ្រប់គ្រាន់ វានឹងបណ្ដាលឱ្យមាត់របស់អ្នកប្រែជាស្ងួត​ ព្រោះក្រពេញទឹកផលិតទឹកមាត់មិនគ្រប់គ្រាន់។ ជាពិសេស វានាំឱ្យបាក់តេរី និងអាស៊ីតក្នុងមាត់កើនឡើង ដែលបណ្ដាលឱ្យមានក្លិនមាត់មិនល្អ និងមានបញ្ហាពុកធ្មេញ។

៥. ទឹកនោមប្រែពណ៌ ៖ អ្នកអាចដឹងថារាងកាយរបស់អ្នកត្រូវការទឹកបន្ថែម ឬអត់ តាមរយៈការពិនិត្យមើលពណ៌ទឹកនោម។ ពណ៌ទឹកនោមលឿងក្រម៉ៅ មានន័យថារាងកាយអ្នកកំពុងខ្សោះជាតិទឹក។ ម្យ៉ាងទៀត នៅពេលដែលអ្នកខ្សោះជាតិទឹក ទឹកនោមរបស់អ្នកតិចតាមនោះដែរ។

៦. ទល់លាមក ៖ នៅពេលដែលមានបញ្ហាខ្សោះជាតិទឹក អ្នកប្រហែលជាមិនអាចបន្ទោបង់បានតាមចិត្ត ដែលអ្នកចង់នោះទេ។ លាមករបស់អ្នកប្រែជាស្ងួត ហើយនៅពេលដែលបន្ទោបង់មកក្រៅ លាមកនោះគឺជាដុំតូចៗ និងមានសភាពរឹង។ ចំណុចនេះបង្ហាញថា ទឹកដើរតួនាទីយ៉ាងសំខាន់ក្នុងការសម្រួលដល់ការរំលាយអាហារ។ ដូច្នេះប្រសិនបើអ្នកមិនចង់មានបញ្ហាទល់លាមក អ្នកត្រូវទទួលទានទឹកឱ្យបានគ្រ​ប់គ្រាន់។

៧. មានអារម្មណ៍ឃ្លាន និងស្រេកទឹកគ្រប់ពេល ៖ ការខ្វះជាតិទឹកក៏បណ្ដាលឱ្យស្រេកទឹក និងឃ្លានខ្លាំងដែរ ហើយវានឹងធ្វើឱ្យអ្នកមានអារម្មណ៍ថាចង់ញ៉ាំគ្រប់ពេល។ ហេតុនេះ នៅក្នុងករណីដែលអ្នកចេះតែឃ្លានចំណីគ្រប់ពេល អ្នកគួរតែព្យាយាមទទួលទានទឹកឱ្យបានច្រើន ព្រោះវាអាចកាត់បន្ថយអារម្មណ៍ឃ្លានបានមួយកម្រិត។

៨. បញ្ហាឈឺសន្លាក់ ៖ ឆ្អឹងខ្ចី និងឆ្អឹងខ្នង គឺត្រូវការទឹកជាប្រចាំ ដើម្បីដំណើរការបានដោយរលូន។ កង្វះជាតិទឹក មិនត្រឹមតែបង្ករការឈឺចាប់ដល់ឆ្អឹងប៉ុណ្ណោះទេ វាក៏អាចធ្វើឱ្យឆ្អឹងខូចផងដែរ។

៩. ម៉ាស់សាច់ដុំរួមតូច ៖ មិនខុសគ្នាពីផ្នែកផ្សេងៗនៃរាងកាយនោះទេ សាច់ដុំរបស់អ្នកក៏ត្រូវការជាតិទឹកជាចាំបាច់ដែរ។ កាលណា អ្នកទទួលទានមិនគ្រប់គ្រាន់ វាអាចបណ្ដាលឱ្យម៉ាស់សាច់ដុំរបស់អ្នករួមតូច។ ម្យ៉ាង ការទទួលទានទឹកគ្រប់គ្រាន់មានសារៈសំខាន់ខ្លាំងណាស់សម្រាប់សាច់ដុំ ព្រោះវាការពារការអស់កម្លាំងសាច់ដុំ ការរលាក និងការឈឺចាប់ដែលបណ្ដាលមកពីការលើសទម្ងន់។

១០. មានអារម្មណ៍ហត់នឿយ ៖ នៅពេលដែលរាងកាយរបស់យើង មិនត្រូវបានបំពេញជាតិទឹកគ្រប់គ្រាន់ពីខាងក្រៅ វានឹងស្រូបជាតិពីក្នុងឈាមមកវិញ ដែលបណ្ដាលឱ្យអុកស៊ីសែននៅក្នុងរាងកាយ និងក្នុងឈាមថយចុះ។ ដំណើរការនេះ នាំឱ្យអ្នកមានអារម្មណ៍ថាហត់នឿយ និងមិនសូវមានកម្លាំង។ ប្រសិនបើ អ្នកមានអារម្មណ៍ថាអស់កម្លាំងជាប្រចាំ មានន័យថា ដល់ពេលហើយដែលអ្នកត្រូវបង្កើនការញ៉ាំទឹក៕