គណៈកម្មាធិការអាហារូបករណ៍សិស្ស-និស្សិតក្រីក្រសម្ដេចអគ្គមហាសេនាបតីតេជោ ហ៊ុន សែន និងសម្ដេចកិត្តិព្រឹទ្ធបណ្ឌិតប្រកាសផ្ដល់អាហារូបករណ៍សិក្សាកម្រិតវិស្វករនៅវិទ្យាស្ថានបច្ចេកវិទ្យាកម្ពុជា ១០កន្លែងសម្រាប់ទីតាំងរាជធានីភ្នំពេញ និងមិនកំណត់ចំនួនសម្រាប់សិស្សប្រឡងជាប់នៅសាខាត្បូងឃ្មុំ ឆ្នាំសិក្សា២០២៣-២០២៤។

សម្រាប់សិស្ស-និស្សិតដាក់ពាក្យស្នើសុំប្រឡងអាហារូបករណ៍ ជាបេក្ខជនមកពីទូទាំងប្រទេស បានប្រឡងជាប់សញ្ញាបត្រមធ្យមសិក្សាទុតិយភូមិ ឬសញ្ញាបត្រសមមូល មានឆន្ទៈពិតប្រាកដក្នុងការបន្តការសិក្សា ខិតខំរៀនសូត្រ។ ជាមួយគ្នានេះ សិស្សត្រូវគោរពតាមការណែនាំ និងព្រមទទួលយកលក្ខខណ្ឌដែលមាន​ចែងរបស់គណៈកម្មាធិការអាហារូបករណ៍សិស្ស-និស្សិតក្រីក្រ សម្ដេចអគ្គមហាសេនាបតីតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត និងវិទ្យស្ថានបច្ចេកវិទ្យាកម្ពុជាទាំងពីរទីតាំង។

លក្ខខណ្ឌដែលបេក្ខជនដែលអាចជ្រើសរើស និងទទួលបានអាហារូបករណ៍មាន២ដំណាក់កាលដោយដំណាក់កាលទីមួយ បេក្ខជនដាក់ពាក្យស្នើសុំចូលរួមប្រឡងស្នើសុំសិក្សានៅរាជធានីភ្នំពេញ សូមទំនាក់ទំនងដោយផ្ទាល់ទៅការិយាល័យអាហារូបករណ៍ (៨ព្រឹក-៥ល្ងាច) រៀងរាល់ថ្ងៃ ដែលមានអាសយដ្ឋានផ្ទះលេខ៤ ផ្លូវលេខ៥២២ សង្កាត់បឹងកក់១ ខណ្ឌទួលគោក រាជធានីភ្នំពេញ (សូមភ្ជាប់ជាមួយនូវសេចក្ដីជូនដំណឹងដែលគណៈកម្មាធិការអាហារូបករណ៍សិស្ស-និស្សិតក្រីក្រសម្ដេចអគ្គមហាសេនាបតីតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត)។ សម្រាប់បេក្ខជនស្នើសុំប្រឡងអាហារូបករណ៍សិក្សានៅសាខាត្បូងឃ្មុំ អាចចុះឈ្មោះតាមរយៈ Google Form តាមរយៈ https://shorturl.at/forMN ដោយបំពេញព័ត៌មាន និងភ្ជាប់ជាមួយឯកសារត្រូវ​(សម្រាប់សលាកបត្រឯកត្តជន នឹងត្រូវផ្ញើជូនបេក្ខជនតាមរយៈTelegram)។

ដំណាក់កាលពីពីរបេក្ខជនត្រូវដាក់ពាក្យប្រឡងនៅវិទ្យាស្ថានផ្ទាល់ រាជធានីភ្នំពេញ (សម្រាប់ការប្រឡង និងសិក្សានៅភ្នំពេញ) និងសាខាត្បូងឃ្មុំ(សម្រាប់ការប្រឡង និងសិក្សានៅខេត្តត្បូងឃ្មុំ)ដោយអនុលោមតាមនីតិវិធីរបស់វិទ្យាស្ថាន។

ការប្រឡងនឹងប្រព្រឹត្តនៅថ្ងៃទី២០ ខែធ្នូ ឆ្នាំ២០២៣ ដោយបែកចែកជាមណ្ឌលប្រឡងពីរគឺ នៅវិទ្យស្ថានបច្ចេកវិទ្យាកម្ពុជា រាជធានីភ្នំពេញ(ស្ថិតនៅមហាវិថីសហព័ន្ធរុស្សី សង្កាត់បឹងកក់២ ខណ្ឌទួលគោក រាជធានីភ្នំពេញ) និងការប្រឡងនៅខេត្តត្បូងឃ្មុំ ស្ថិតនៅភូមិនិគមលើ ឃុំស្រឡប់ ស្រុកត្បូងឃ្មុំ ខេត្តត្បូងឃ្មុំ ក្នុងសាកលវិទ្យាល័យ ហេង សំរិន ត្បូងឃ្មុំ។

បេក្ខជនដែលមានបំណងទទួលបានអាហារូបករណ៍ត្រូវអនុវត្តការដាក់ពាក្យទាំងពីរដំណាក់កាលខាងលើមួយណាកមុនក៏បាន។ អាហារូបករណ៍ចាប់ទទួលពាក្យពីថ្ងៃដំណឹងរហូតដល់ថ្ងៃទី១៨​ ខែធ្នូ ឆ្នាំ២០២៣៕