ភ្នំពេញ – ពលករបរទេសដែលបម្រើ​ការងារ​នៅ​សាធារណរដ្ឋកូរ៉េ ក្នុងនោះក៏​រួម​មានទាំង​កម្ពុជាផង នឹង​ទទួលបាននូវ​ការ​បណ្តុះបណ្តាលជំនាញ ព្រមទាំង​មានការ​ផ្តល់ប្រាក់កម្ចីសម្រាប់​បើក​អាជីវកម្មសមរម្យ ​អាចទទួលបានប្រាក់ចំណូល ក្រោយ​ពី​បញ្ចប់​អាណត្តិ​ការងារ ។ នេះ​ជា​ការ​លើក​ឡើង​របស់​ ឯកឧត្តម UH SOOBONG  ប្រធានអង្គភាពអភិវឌ្ឍន៍ធនធានមនុស្សនៃសាធារណរដ្ឋកូរ៉េ ក្នុង​ជំនួប​ជាមួយ ឯកឧត្តម អ៉ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ កាលពីពេលថ្មីៗនេះ។

បើតាម​ការ​បញ្ជាក់របស់ ឯកឧត្តម UH SOOBONG កម្មវិធីបណ្តុះបណ្តាលជំនាញដល់ពលករបរទេស ដែលចប់អាណត្តិការងារនៅកូរ៉េ នឹងអនុវត្ត​នៅពេលឆាប់ៗ ហើយ​ដោយក្នុងនោះកម្ពុជាអាចនឹងក្លាយជាប្រទេសអាទិភាពដែលទទួលបានពីគម្រោងថ្មីនេះ។

ជាមួយ​គ្នា​នេះ បើតាម ឯកឧត្តម UH SOOBONG សាធារណរដ្ឋកូរ៉េ ក៏​នឹង​បង្កើនកូតាពលករកម្ពុជាឱ្យលើសមួយម៉ឺននាក់ ក្នុងឆ្នាំ២០២៣ និងកាន់តែច្រើននៅឆ្នាំបន្តបន្ទាប់ទៅមុខទៀត ខណៈក្នុងឆ្នាំ២០២២កន្លងទៅ កម្ពុជាទទួលបានចំណាត់ថ្នាក់ល្អ ក្នុងវិស័យបញ្ជូនពលករទៅធ្វើការនៅសាធារណរដ្ឋកូរ៉េ ហើយ​ពលករកម្ពុជាត្រូវ​បានវាយតម្លៃខ្ពស់​ចំពោះភាពស្មោះត្រង់ ឧស្សាហ៍ព្យាយាម យកចិត្តទុកដាក់នឹងការងារ។

ជាការឆ្លើយតប ឯកឧត្តម អ៉ិត សំហេង រដ្ឋមន្រ្តីក្រសួងការងារ និង​បណ្តុះបណ្តាល​វិជ្ជាជីវៈ បានថ្លែងអំណរគុណដល់ ក្រសួងមុខរបរ និងការងារ នៃសាធារណរដ្ឋកូរ៉េ ដែលបានយកចិត្តទុកដាក់ផ្តល់សេវាការងារជូនដល់ពលករកម្ពុជា បានយ៉ាងល្អ ដោយនៅក្នុងឆ្នាំ២០២៣នេះ ភាគីកូរ៉េសន្យា ផ្តល់កូតាជូនពលករកម្ពុជា ជាងមួយម៉ឺននាក់ទៀតនោះ តាមរយៈគណៈកម្មាធិការបណ្តុះបណ្តាល និងបញ្ជូនពលករទៅបរទេស (MTOSB) នៃក្រសួងការងារ និងបណ្តុះបណ្តាលវិជ្ជាជីវៈ ដែលនឹងធ្វើការជ្រើសរើសពលករកម្ពុជា ដែលមានសមត្ថភាព និងឧស្សាហ៍ព្យាយាមក្នុងការបំពេញការងារជូនដល់និយោជកកូរ៉េ ឱ្យកាន់តែមានផលិតភាពខ្ពស់។ 

ជាមួយ​គ្នា​ ឯកឧត្តម អ៉ិត សំហេង ក៏​បានសម្តែងក្តីរីករាយចំពោះគម្រោងដែលភាគីកូរ៉េជួយបណ្តុះបណ្តាលជំនាញដល់ពលករបរទេសដែលចប់អណត្តិការងារនៅកូរ៉េ ទទួលបានការបណ្តុះបណ្តាលជំនាញដ៏ជាក់លាក់មួយ ដើម្បីមានលទ្ធភាពគ្រប់គ្រាន់ក្នុងការបង្កើតអាជីវកម្មផ្ទាល់ខ្លួន។ ឯកឧត្តមរដ្ឋមន្ត្រី ចង់ឱ្យពលករកម្ពុជា ស្ថិតក្នុងអាទិភាពខ្ពស់មួយ ក្នុងចំណោមប្រទេសដទៃទៀត ដែលកូរ៉េគិតថា នឹងធ្វើការជ្រើសរើស។

យោង​តាម​របាយការណ៍បានបង្ហាញថា បច្ចុប្បន្ន​កម្ពុជា​មានពលករ​ចំណាកស្រុក​ជាង១លាន​៣សែននាក់​បាន​ធ្វើការ​នៅ​ក្រៅប្រទេស ក្នុងនោះ​សម្រាប់​ប្រទេស​កូរ៉េ​មានពលករ​កម្ពុជា​ទៅ​បម្រើ​ការងារ​ប្រហែល ៥ម៉ឺននាក់៕