ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
បណ្តាញគ្រឹះស្ថានអប់រំ និងបណ្តុះបណ្តាល វេសឡាញ អេឌ្យូខេសិន គ្រុប កាលពីពេលថ្មីៗនេះ បានចុះអនុស្សារណៈយោគយល់គ្នា ជាមួយសមាគម អុី. អឹម. ឌី. អា កម្ពុជា លើកិច្ចសហប្រតិបត្តិការលើកកលើកកម្ពស់ការយល់ដឹងផ្នែកចិត្តសាស្ត្រ ជូនដល់បុគ្គលិកអប់រំ មាតា បិតា អ្នកអាណាព្យាបាលសិស្ស និងសិស្សានុសិស្សនៃបណ្តាញសាលារៀនទាំងអស់។
ឧកញ៉ា ប៉ិច ប៉ូឡែន អគ្គនាយកក្រុមហ៊ុន វេសឡាញ អេឌ្យូខេសិន គ្រុប មានប្រសាសន៍ថា បញ្ហាសុខភាពផ្លូវចិត្តគឺសំខាន់ណាស់, លោកមើលឃើញថា សម្ពាធផ្លូវចិត្តបានកំពុងកើតឡើងទៅលើប្រជាជននៅក្នុងប្រទេសកំពុងអភិវឌ្ឍ, លោកថា លោកមិនចង់ឃើញរឿងអ្វីមួយដែលអាចការពារបាន អាចដោះស្រាយបាន បែរជាយើងមិនអាចធ្វើកើត អន្តរាគមន៍មិនបាននោះទេ ដូច្នេះហើយបានជាបណ្តាញគ្រឹះស្ថានអប់រំ និងបណ្តុះបណ្តាល វេសឡាញ បង្កើតឱ្យមានអ្នកប្រឹក្សាសុខភាពផ្លូវចិត្តជូនទៅសិស្ស ក៏ដូចជាអ្នកអាណាព្យាបាលផងដែរ។
« ពាក់ព័ន្ធសុខភាពផ្លូវចិត្តខ្ញុំគិតថា ចាំបាច់ សំខាន់មែនទែន… ពេលខ្លះឪពុកម្តាយមិនហ៊ាននិយាយ អញ្ចឹងហើយបានជាយើងផ្តល់ប្រឹក្សាយោបល់ ដូច្នេះហើយទើបយើងត្រូវការអ្នកជំនាញដើម្បីជួយ…»
ឧកញ៉ា ប៉ិច បូឡែន អគ្គនាយកក្រុមហ៊ុនវេសឡាញ
លោក អ៊ំ ផ្លាកទីន ប្រធានសមាគម អុី. អឹម. ឌី. អា កម្ពុជា មានប្រសាសន៍ថា ការសិក្សាមួយនៅសហរដ្ឋអាមេរិកបានរកឃើញថា យុវជនដែលមានអាយុចន្លោះពី ១៣ ទៅ១៧ឆ្នាំ ប្រហែល៤០ភាគរយ បានរាយការណ៍ពីភាពឯកកោ និងខ្វះភាពកក់ក្តៅរបស់ពួកគេ, ភាពឯកកោទាំងនោះ គឺបានកើតឡើងដោយសារតែការរីកចម្រើន នៃបច្ចេកវិទ្យា ហើយក៏មានសម្ពាធនៃការសិក្សាផងដែរ។ លោកបន្តថា អនុស្សារណៈយោគយល់គ្នានេះ មិនមែនផ្តោតតែទៅលើប្អូនៗដែលមានបញ្ហាសុខភាពផ្លូវចិត្ត ប៉ុន្តែពិនិត្យមើលជាមួយគ្នាផងដែរថា តើលោកគ្រូអ្នកគ្រូដែលធ្វើការដោយផ្ទាល់ ដោយប្រយោល តើអាចធ្វើតាមរបៀបម៉េច? ក៏ដូចជាឪពុកម្តាយដែលភាគច្រើនមានពេលនៅជាមួយកូនតែនៅចុងសប្តាហ៍តើត្រូវជួយកូនដោយរបៀបម៉េច? ការថែទាំសុខភាពផ្លូវចិត្តពីសិស្សផ្ទាល់ ពីគ្រូបង្រៀន ពីអ្នកអាណាព្យាបាលដែរ ហើយជាពិសេសការចូលរួមពីគ្រប់ភាគី នេះជាកត្តាដែលយើងគិតថា នឹងអាចចូលរួមលើកកម្ពស់សុខមាលភាពផ្លូវចិត្ត។
បើតាម លោក អ៊ំ ផ្លាកទីន សមាគម អុី. អឹម. ឌី. អា កម្ពុជា នឹងចូលរួមគ្រប់មធ្យោបាយតាមដែលអាចធ្វើទៅបាន ដើម្បីធ្វើយ៉ាងណាលើកកម្ពស់សុខមាលភាពផ្លូវចិត្តពលរដ្ឋ និងយុវជនកម្ពុជា ព្រោះនៅពេលណាដែលមានសុខភាពផ្លូវចិត្តល្អ ការសិក្សាល្អ ទំនាក់ទំនងល្អ និងជាពិសេសទៅជាធនធាន និងជាទំពាំងស្នងឬស្សីមួយ ដើម្បីជួយសង្គមជាតិយើងទាំងមូលផងដែរ៕
