ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ផ្នត់គំនិតចម្រូងចម្រាសក្នុងការជ្រើសសៀវភៅឱ្យក្មេងអាន និងទុកឱ្យក្មេងជ្រើសដោយខ្លួនឯង បង្កើតជាក្តីមន្ទិលចំពោះអាណាព្យាបាលមួយចំនួន ខណៈការផ្តល់សិទ្ធឱ្យកុមារអាចអានតាមចិត្តចង់ បានដើរតួនាទីសំខាន់ក្នុងការពង្រឹងដល់ជំនាញ នៃការសម្រេចចិត្ត ឯករាជ្យភាព និងស្មារតីផ្តួចផ្តើម។
យោងតាមគេហទំព័រ OXFORDOWL បានឱ្យដឹងថា បើសិនជាអាណាព្យាបាល ផ្តល់សិទ្ធិសេរីភាពពេញលេញឱ្យកុមារមានឱកាសក្នុងការជ្រើសរើសសៀវភៅដែលពួកគេចង់អានដោយខ្លួនឯង គឺជាឱកាសជួយឱ្យពួកគេពង្រឹងនូវឯករាជ្យភាព បង្កភាពរីករាយ ជំរុញឱ្យស្គាល់ពាក្យប្លែកៗ និងស្គាល់អំពីចំណូលចិត្តផ្ទាល់ខ្លួន និងចំណូចចិត្តថ្មីៗបន្ថែមដើម្បីរុករកសក្តានុពលក្នុងខ្លួន ។ កាលដែលក្មេងៗមានសិទ្ធគ្រប់គ្រាន់ដើម្បីជ្រើសរើសអំណានដោយសេរី ជាវិថីមួយជួយកុមារឱ្យទទួលបានលទ្ធផលល្អក្នុងសាលា និងការត្រៀមខ្លួនឈានជើងចូលទៅដំណើរជីវិតនៅវ័យជំទង់ផងដែរ។
បន្ថែមពីនោះ នៅពេលដែលកុមារទទួលបានសិទ្ធជ្រើសរើសអ្វីដែលគេចង់អានដោយសេរី ប្រៀបដូចជាការបង្ហាញពិភពលោកយ៉ាងទូលាយទៅកាន់កុមារ ហើយថែមទាំងផ្តល់ឱកាសឱ្យពួកគេមានសមត្ថភាពគិតបែបស្រមើស្រមៃខ្ពស់ក្នុងការបំផុសគំនិតថ្មីៗ។ ការទុកពេលឱ្យកុមារជ្រើសយកអ្វីដែលគេចាប់អារម្មណ៍ទាំងការអាន ឬស្តាប់ គឺប្រៀបដូចជាការទុកចន្លោះឱ្យពួកគេទៅទស្សនាបរិយាកាសដែលមិនធ្លាប់ឃើញពីមុនមក និងការស្កាល់អំពីបុគ្គលិកលក្ខណៈនៃបុគ្គលនីមួយៗ ដែលនេះជាចំណែកមួយធ្វើឱ្យពួកគេងាយចុះសម្រុងជាមួយមនុស្សដទៃ។
ហើយអ្វីដែលគួរឱ្យចាប់អារម្មណ៍បន្ថែមទៅទៀតនោះ គឺភាពឯករាជ្យនៅក្នុងការជ្រើសសៀវភៅអាន ជួយឱ្យកុមារមានសុខភាពផ្លូវចិត្តរឹងមាំ និងមានសមត្ថភាពខ្ពស់ក្នុងការយល់ចិត្តយល់អារម្មណ៍អ្នកដទៃ។ ទន្ទឹមគ្នានោះ ការទុកឱកាសឱ្យកុមារជ្រើសអំណានដោយខ្លួនឯង កាន់តែធ្វើឱ្យពួកគេស្គាល់អំពីខ្លួនឯងបានលឿន រួមទាំងការទទួលយកទស្សនៈចម្រុះទៅកាន់មជ្ឈដ្ឋានជុំវិញខ្លួនដែលពួកគេរស់នៅប្រចាំថ្ងៃ៕
