ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
យុវជនដែលកំពុងសិក្សាជំនាញធុរកិច្ចភេសជ្ជៈ នៅវិទ្យាស្ថានជាតិសហគ្រិនភាព និងនវានុវត្តន៍ ក្រោមកម្មវិធីបណ្តុះបណ្តាលជំនាញបច្ចេកទេស វិជ្ជាជីវៈ ១.៥លាននាក់ របស់រាជរដ្ឋាភិបាល បានបង្ហាញក្តីរំពឹងថា ខ្លួននឹងអាចមានសមត្ថភាពប្រើប្រាស់ជំនាញមួយនេះទៅបម្រើការងារជាបុគ្គលិកនៅហាងកាហ្វេណាមួយ ឬក៏អាចទៅបើកហាងដោយខ្លួនឯងបាន ក្រោយពីបញ្ចប់ការសិក្សារយៈពេល៤ខែ។
យុវតីមកពីខេត្តបន្ទាយមានជ័យ កញ្ញា ហៀត រក្សា ដែលកំពុងសិក្សាជំនាញវិជ្ជាជីវៈផ្នែកធុរៈភេសជ្ជៈនៅវិទ្យាស្ថានជាតិសហគ្រិនភាព និងនវានុវត្ត បានលើកឡើងថា ការជ្រើសយកជំនាញកាហ្វេនេះ ក៏ដោយសារនៅកម្ពុជានាពេលបច្ចុប្បន្ន កាហ្វេគឺជាភេសជ្ជៈមួយដែលពេញនិយមសម្រាប់ពលរដ្ឋកម្ពុជា ដូច្នេះទីផ្សារការងារផ្នែកកាហ្វេក៏ល្អដែរនាពេលបច្ចុប្បន្ននេះ។ ជាមួយគ្នាការរៀនជំនាញធុរៈកិច្ចកាហ្វេនេះ រក្សា សង្ឃឹមថា ខ្លួននឹងអាចមានការងារមួយច្បាស់លាស់ និងប្រាក់ចំណូលសមរម្យដែលធ្វើឱ្យជីវភាពគ្រួសារបានប្រសើជាងនេះនៅពេលអនាគត។
រៀនចប់រយៈពេល៤ខែផ្នែកជំនាញកាហ្វេនៅទីនេះខ្ញុំអាចទៅបម្រើការងារនៅហាងកាហ្វេបានដែលវាជាជំហានដំបូងរបស់ខ្ញុំ និងបន្ទាប់មកទៀតខ្ញុំមានក្តីបំណងចង់បើកជាហាងកាហ្វេតូចៗដោយខ្លួនឯងបាន
កញ្ញា ហៀត រក្សា
យុវជន ព្រំ ពេជ្រ មកពីគ្រួសារក្រីក្រនៅរាជធានីភ្នំពេញ ដែលក៏កំពុងសិក្សាជំនាញធុរៈកិច្ចភេសជ្ជៈ លើកឡើងដែរថា ជំនាញឆុងកាហ្វេនេះ គឺជាជំនាញមួយនៅក្នុងក្តីស្រមៃរបស់ខ្លួន ហើយខ្លួនសង្ឃឹមថា អាចបើកហាងកាហ្វេតូចមួយសម្រាប់ខ្លួនឯងនៅពេលអនាគត។
យុវជនរូបនេះបន្ថែមថា កម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេស ជាក្តីសង្ឃឹមតែមួយគត់ដែលអាចឱ្យខ្លួនបានសិក្សាជំនាញមួយច្បាស់លាស់ អាចរកការងារបានធ្វើ មានប្រាក់ចំណូមសមរម្យ។
គូរបញ្ជាក់ផងដែរថា កម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេសដល់យុវជនមកពីគ្រួសារក្រីក្រ និងគ្រួសារងាយរងហានិភ័យដែលបានដាក់ឱ្យអនុវត្តជាផ្លូវការកាលពីថ្ងៃទី១៤ វិច្ឆិកា ឆ្នាំ២០២៣ ហើយការបណ្តុះបណ្តាលវគ្គទី១ បានចាប់ផ្តើមកាលពីថ្ងៃទី១៥ មករា ឆ្នាំ២០២៤កន្លងទៅ៕
