នៅក្នុងដំណើរឆ្ពោះទៅរកការពង្រឹងវិស័យអប់រំ ថ្មីៗនេះ មូលនិធិព្រីនស៍ ជាមូលនិធិមនុស្សធម៌នៃសម្ព័ន្ធក្រុមហ៊ុន ព្រីនស៍ ហូលឌីង គ្រុប បានរៀបចំពិធីប្រគល់ អាហារូបករណ៍ ចេន ហ្ស៊ី ជំនាន់ទី៣ ជូនដល់សិស្សនិស្សិត។ ព្រឹត្តិការណ៍នេះបានប្រារព្ធឡើងដើម្បីអបអរសាទរនិសិ្សតអាហារូបករណ៍ ចំនួន ១០០ នាក់ ដែលបានត្រៀមខ្លួនរួចជាស្រេចក្នុងការចាប់ផ្តើមដំណើរផ្លាស់ប្តូរនៃការសិក្សារបស់ពួកគេ។

ស្របតាមការប្តេជ្ញាចិត្តរបស់ក្រុមហ៊ុន ព្រីនស៍ ហូលឌីង គ្រុប ក្នុងការបណ្ដុះបណ្ដាលអ្នកដឹកនាំសម្រាប់ពេលអនាគត។ នៅក្នុងពិធីប្រគល់ អាហារូបករណ៍ ចេន ហ្ស៊ី ជំនាន់ទី៣ មានការគោរពអញ្ជើញចូលរួមពីសំណាក់ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា ជាភ្ងៀវកិត្តិយសដ៏ខ្ពង់ខ្ពស់ក្នុងកម្មវិធីនេះផងដែរ។ ក្នុងឱកាសនេះផងដែរ ឯកឧត្តមបណ្ឌិតសភាចារ្យ ហង់ជួន ណារ៉ុន បានកោតសរសើរចំពោះអ្នកឧកញ៉ា ចេន ហ្ស៊ី ប្រធានសម្ព័ន្ធក្រុមហ៊ុន ព្រីនស៍ ហូលឌីង គ្រុប ចំពោះគំនិត ផ្ដួចផ្ដើមបង្កើតកម្មវិធីអាហារូបករណ៍នេះឡើងដើម្បីផ្ដល់ឱកាសដល់និសិ្សតឱ្យមានលទ្ធភាពបន្តថ្នាក់ ឧត្តមភាពសិក្សារបស់ខ្លួន ចាប់តាំងពីការបង្កើតឡើងក្នុងឆ្នាំ ២០២១។

ឯកឧត្តមបណ្ឌិតសភាចារ្យ បានមានប្រសាសន៍ថា «ការអប់រំគឺជាកម្លាំងចលនាផ្លាស់ប្តូរសម្រាប់ជីវិតរស់នៅ សហគមន៍ និងអនាគតរបស់ប្រទេសជាតិយើង ដែលជាគន្លឹះឆ្ពោះទៅកាន់អនាគតដ៏ត្រចះត្រចង់»។ ឯកឧត្តមបណ្ឌិតសភាចារ្យ បានមានប្រសាសន៍បន្តថា «ខ្ញុំលើកទឹកចិត្តដល់សិស្សនិស្សិតទាំងអស់គ្នា ឱ្យចាប់យកឱកាសដ៏ល្អមួយនេះ ដែលផ្តល់ដោយក្រុមហ៊ុន ព្រីនស៍ ហូលឌីង គ្រុប សូមសិស្សនិស្សិតទាំងអស់គ្នា ខិតខំប្រឹងប្រែងរៀនសូត្រ និងប្រើប្រាស់ចំណេះដឹងទាំងនេះដើម្បីសម្រេចក្តីសុបិនរបស់ខ្លួន។»

ឯកឧត្តមបណ្ឌិតសភាចារ្យ ក៏បានជំរុញឱ្យនិសិ្សតអាហារូបករណ៍ ចេន ហ្ស៊ី ទាំងអស់ប្រើប្រាស់ឱកាសនេះ ដើម្បីជំរុញការសិក្សាអប់រំរបស់ពួកគេ និងដើរតួនាទីយ៉ាងសំខាន់ក្នុងការកសាងអនាគតរបស់កម្ពុជា។ ឯកឧត្តមបណ្ឌិតសភាចារ្យ បានមានប្រសាសន៍បន្ថែមថា «អាហារូបករណ៍នេះ មិនត្រឹមតែពង្រឹងភាព ជឿជាក់ប៉ុណ្ណោះទេ ថែមទាំងផ្តល់សិទ្ធអំណាចឱ្យសិស្សនិសិ្សតកំណត់ជោគវាសនា របស់ខ្លួន និងរួមចំណែកយ៉ាង សំខាន់ដល់ការអភិវឌ្ឍរបស់ប្រទេសកម្ពុជាផងដែរ»។

លោក Gabriel Tan ប្រធានផ្នែកទំនាក់ទំនងនៃក្រុមហ៊ុន ព្រីនស៍ ហូលឌីង គ្រុបបានសម្តែងការដឹងគុណចំពោះការជ្រុំជ្រែងជាបន្តបន្ទាប់ពីសំណាក់ក្រសួងអប់រំ យុវជន និងកីឡា។ លោក Gabriel Tan លើកឡើងពីលក្ខណៈដ៏ទូលំទូលាយនៃអាហារូបករណ៍ ចេន ហ្ស៊ី ផងដែរ។ ក្នុងនោះលោកបានបន្តថា «អាហារូបករណ៍ ចេន ហ្ស៊ី មិនត្រឹមតែជួយលើថ្លៃសិក្សារបស់និស្សិតប៉ុណ្ណោះទេ ថែមទាំងរួមបញ្ចូលកម្មវិធីផ្សេងៗដែលជួយសម្រួលដល់ ការសិក្សា និងការលូតលាស់របស់សិស្សនិសិ្សត ទៀតផង។ ជាពិសេសអាហារូបករណ៍ក៏ផ្តល់នូវការបណ្តុះបណ្តាល ដល់និសិ្សតពីសំណាក់បុគ្គលិករបស់ព្រីនស៍ ផ្ទាល់រួមទាំងផ្តល់នូវឱកាសកម្មសិក្សា និង ឱកាសការងារដែលមានសក្តានុពលដល់និសិ្សតក្រោយបញ្ចប់ ការសិក្សាផងដែរ»។

នៅក្នុងកម្មវិធីនេះក៏មានការថ្លែងសន្ទរកថាពីតំណាងនិសិ្សតអាហារូបករណ៍គឺ កញ្ញា បូរ លីហ្សា ជានិសិ្សត អាហារូបករណ៍ ចេន ហ្ស៊ី ជំនាន់ទី១ ដែលសព្វថ្ងៃជានិស្សិតឆ្នាំទី៣ នៃសាកលវិទ្យាល័យភូមិន្ទភ្នំពេញ (RUPP) ជំនាញផ្នែកទំនាក់ទំនងប្រព័ន្ធផ្សព្វផ្សាយ។ កញ្ញាបានគូសបញ្ជាក់ពីអត្ថប្រយោជន៍របស់អាហារូបករណ៍ថា «អាហារូបករណ៍ ចេន ហ្ស៊ី មិនត្រឹមតែផ្តល់ការគាំទ្រផ្នែកហិរញ្ញវត្ថុប៉ុណ្ណោះទេ ថែមទាំងបានជំរុញការលូតលាស់ របស់ពួកយើង រួមទាំងពង្រីកទស្សនៈនិងស្គាល់ពីពិភពលោកខាងក្រៅឱ្យកាន់តែទូលំទូលាយ»។

អំឡុងពេលប្រារព្ធកម្មវិធី ក៏មានការផ្ដល់ជូននូវវត្ថុអនុស្សាវរីយ៍ជានាឡិកាដៃ ដែលផលិតដោយអ្នកផលិតនាឡិកាជនជាតិខ្មែរ២រូបដែលបានបញ្ចប់ការសិក្សាពីមជ្ឈមណ្ឌលបណ្តុះបណ្តាលវិជ្ជាជីវៈ ព្រីនស៍ នាឡិកា នៅកម្ពុជា ជូនដល់ ឯកឧត្តមបណ្ឌិតសភាចារ្យ ហង់ជួន ណារ៉ុន ដែលនាឡិការនេះ ជានិមិត្តរូបនៃស្នាដៃរបស់កូនខ្មែរ មានជំនាញខ្ពស់ក្នុងការផលិតនាឡិកាក្រោមការបង្ហាត់បង្រៀនពីអ្នកជំនាញ ជនជាតិស្វីស។

ក្នុងកម្មវិធីនេះក៏មានការចូលរួមដ៏ខ្ពង់ខ្ពស់ពីតំណាងរដ្ឋាភិបាល និងសាកលវិទ្យាល័យទាំងបីរួមមាន៖ ឯកឧត្ដម មក់ ងយ អគ្គនាយកនៃអគ្គនាយកដ្ឋានឧត្តមសិក្សា លោក គង់ ភូមិកា ប្រធាននាយកដ្ឋានឧត្តមសិក្សា លោកបណ្ឌិត សេង ប៊ុនធឿន សាកលវិទ្យាធិការរងនៃសាកលវិទ្យាល័យជាតិគ្រប់គ្រង លោក គៀន តាក់ សាកលវិទ្យាធិការរងនៃសាកលវិទ្យាល័យភូមិន្ទភ្នំពេញ និង លោក សូយ ទី នាយករងវិទ្យាស្ថានបច្ចេកវិទ្យាកម្ពុជា។

អំពីអាហារូបករណ៍ ចេន ហ្ស៊ី៖

កម្មវិធីអាហារូបករណ៍ ចេន ហ្ស៊ី គឺជាគម្រោងកម្មវិធីអាហារូបករណ៍ប្រចាំឆ្នាំដែលត្រូវបានបង្កើតឡើង និងដឹកនាំ ដោយសប្បុរសជន អ្នកឧកញ៉ា ចេន ហ្ស៊ី ប្រធានក្រុមហ៊ុន ព្រីនស៍ ហូលឌីង គ្រុប រួមសហការជាមួយ ក្រសួងអប់រំ យុវជន និងកីឡា (MoEYS) សម្រាប់ផ្តល់អត្ថប្រយោជន៍ដល់និស្សិតសាកលវិទ្យាល័យកម្ពុជាចំនួន ៤០០នាក់ ក្នុងរយៈពេលប្រាំពីរឆ្នាំ។

ចាប់តាំងពីវត្តមានដំបូងរបស់កម្មវិធី អាហារូបករណ៍ ចេន ហ្ស៊ី បានជួយដល់និស្សិតកម្ពុជាជាច្រើននាក់ ដែលផ្តល់ឱកាសនិងអនុញ្ញាតឱ្យពួកគេបន្តមានលិទ្ធិភាពក្នុងការសិក្សានូវជំនាញដែលខ្លួនស្រឡាញ់ដើម្បីមាន ចំណេះជំនាញរួមចំណែកក្នុងការអភិវឌ្ឍប្រទេសកម្ពុជាឱ្យកាន់តែរីកចម្រើននាពេលអនាគត។

អំពីមូលនិធិព្រីនស៍៖

មូលនិធិព្រីនស៍ត្រូវបានបង្កើតឡើងក្នុងឆ្នាំ ២០១៥ គឺជាមូលនិធិសប្បុរសធម៌ឈានមុខគេមួយនៅកម្ពុជា ។ ក្នុងនាមជា សមាជិករបស់ក្រុមហ៊ុន ព្រីនស៍ ហូលឌីង គ្រុប ដែលជាសម្ព័ន្ធក្រុមហ៊ុនដ៏ធំមួយនៅកម្ពុជា មូលនិធិនេះមានគោលបំណងធ្វើការជាមួយសហគមន៍មូលដ្ឋានដើម្បីកសាងការរស់នៅ និងបរិយាកាសការងារដែលលើកកម្ពស់សុខុមាលភាព និងការរស់នៅរបស់ប្រជាជនស្របតាមចក្ខុវិស័យ «រួមគ្នាកសាងអនាគតកាន់តែប្រសើរសម្រាប់កម្ពុជា» ។

ដោយផ្តោតលើវិស័យអប់រំ ការអភិវឌ្ឍយុវជន វិស័យសុខាភិបាល និងកិច្ចផ្តួចផ្តើមសហគមន៍ មូលនិធិព្រីនស៍ បានបន្តធ្វើការជាមួយដៃគូនានាដើម្បីផ្តល់នូវកម្មវិធីដែលមាននិរន្តរភាពនិងឱកាសជាច្រើនដល់យុវជនកម្ពុជា ការបង្កើតសហគមន៍ និងការចូលរួមក្នុងការកសាងហេដ្ឋារចនាសម្ព័ន្ធជានិរន្តរភាព ។

គម្រោងដ៏លេចធ្លោរបស់មូលនិធិ គឺជាគម្រោងកម្មវិធីអាហារូបករណ៍ ចេន ហ្ស៊ី ដែលជាគម្រោងអាហារូបករណ៍ប្រចាំឆ្នាំដែលផ្តល់ជូនការបង់ថ្លៃសិក្សាពេញលេញ ប្រាក់ឧបត្ថម្ភប្រចាំខែ កម្មវិធីអភិវឌ្ឍន៍ខ្លួន ឱកាសកម្មសិក្សា និងឱកាសការងារជូនទៅដល់និស្សិតសាកលវិទ្យាល័យកម្ពុជាចំនួន ៤០០នាក់ ក្នុងរយៈពេលប្រាំពីរឆ្នាំ និងមជ្ឈមណ្ឌលបណ្តុះបណ្ដាលវិជ្ជាជីវៈ ព្រីនស៍នាឡិកា ដែលជាសាលាបណ្ដុះបណ្ដាលតែមួយគត់ក្នុងការផ្ដល់ឱកាសសិក្សាអំពីសិល្បៈនៃការផលិតនាឡិកាស្តង់ដាប្រទេសស្វីស ។ មូលនិធិព្រីនស៍ បានផ្តួចផ្តើមកម្មវិធីមនុស្សធម៌ជាង ២៥០ កម្មវិធី ដែលបានជួយទៅដលប្រជាជនប្រមាណជាង ១.២លាន នាក់ ព្រមទាំងធ្វើការបរិច្ចាគដែលមានតម្លៃជាទឹកប្រាក់សរុបលើសពី ១៦ លានដុល្លារ៕