ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – រាជរដ្ឋាភិបាលតាមរយៈរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងក្រសួងអប់រំ យុវជន និងកីឡា បានសម្រេចដាក់ឱ្យអនុវត្តកម្មវិធីផ្តល់អាហារតាមសាលារៀនដោយប្រើប្រាស់កសិផលក្នុងសហគមន៍ក្នុងគោលបំណងលើកកម្ពស់ការសិក្សារបស់កុមារក្នុងតំបន់ក្រីក្រ និងភាពងាយរងគ្រោះខ្ពស់ ព្រមទាំងរួមចំណែកលើកកម្ពស់ផលិតភាពស្បៀងអាហារសហគមន៍ ។ នេះបើផ្អែកតាមអនុក្រឹត្យស្តីពីការអនុវត្តកម្មវិធីផ្តល់អាហារតាមសាលារៀនដោយប្រើប្រាស់កសិផលក្នុងសហគមន៍ ចេញនៅថ្ងៃទី១៣ ខែមីនា ឆ្នាំ២០២៣ ។
អនុក្រឹត្យស្តីពីការអនុវត្តកម្មវិធីផ្តល់អាហារតាមសាលារៀនដោយប្រើប្រាស់កសិផលក្នុងសហគមន៍ បានចុះហត្ថលេខាដោយសម្តេចតេជោនាយករដ្ឋមន្ត្រី, រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ, និងរដ្ឋមន្ត្រីក្រសួងអប់រំ យុវជន និងកីឡា ។ អនុក្រឹត្យនេះមានវិសាលភាពអនុវត្តចំពោះសាលារៀនសាធារណៈដែលក្រសួងអប់រំបានជ្រើសរើសឱ្យអនុវត្តកម្មវិធី ។
អនុក្រឹត្យថ្មីនេះ បានបញ្ជាក់ថា ក្រសួងអប់រំ យុវជន និងកីឡា ត្រូវរៀបចំលិខិតបទដ្ឋានគតិយុត្ត ប្រព័ន្ធគ្រប់គ្រង ការបណ្តុះបណ្តាល និងការអភិវឌ្ឍសមត្ថភាពរាល់ឯកសារពាក់ព័ន្ធនឹងការអនុវត្តកម្មវិធី ដើម្បីគ្រប់គ្រងនិងអនុវត្តកម្មវិធីប្រកបដោយប្រសិទ្ធភាព និងប្រសិទ្ធផល ។ មិនតែប៉ុណ្ណោះ ប្រមុខរាជរដ្ឋាភិបាលក៏បានកំណត់ក្នុងអនុក្រឹត្យនេះ អំពីហេដ្ឋារចនាសម្ព័ន្ធរូបវន្ត ស្តង់ដាសំណង់ផ្ទះបាយ និងកន្លែងសិស្សទទួលទានអាហារនៅតាមសាលារៀនគោលដៅមាននៅក្នុងសៀវភៅណែនាំប្រតិបត្តិកម្មវិធី ។
កសិផលក្នុងសហគមន៍សំដៅលើផលិតផលក្នុងសហគមន៍ដែលមានដូចជា អង្ករ សាច់ ត្រី ស៊ុត ទឹកដោះសត្វ បន្លែ ផ្លែឈើ គ្រាប់ធញ្ញជាតិ ចំណីអាហារដែលបញ្ចូលមីក្រូសារជាតិជាដើម ដែលមានប្រភពពីផលិតកម្មដំបូងសម្រាប់ផ្គត់ផ្គង់តាមសាលារៀនសាធារណៈ ។ កម្មវិធីផ្តល់អាហារតាមសាលារៀនដោយប្រើប្រាស់កសិផលក្នុងសហគមន៍ ត្រូវមានអានុភាពអនុវត្តបន្តរហូតដល់មានលិខិតបទដ្ឋានគតិយុទ្ធថ្មីមកជំនួស ។
គួរបញ្ជាក់ថា តាមអនុក្រឹត្យបានតម្រូវឱ្យក្រសួង-ស្ថាប័នមួយចំនួនចូលរួមអនុវត្ត មានដូចជា ក្រុមប្រឹក្សាជាតិគាំពារសង្គម,ក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ, ក្រសួងមហាផ្ទៃ, ក្រសួងសុខាភិបាល, ក្រសួងកសិកម្ម រុក្ខាប្រមាញ់ និងនេសាទ, ក្រសួងផែនការ, ក្រសួងសង្គមកិច្ច អតីតយុទ្ធជន និងយុវនីតិសម្បទា, ក្រសួងកិច្ចការនារី និងរដ្ឋបាលក្រុង-ស្រុក ៕
