ការបង្កើតទំនាក់ទំនង ឬមិត្តភាពនៅកន្លែងការងារ មិនត្រឹមតែជះផលល្អសម្រាប់អាជីពប៉ុណ្ណោះទេ ប៉ុន្តែវាក៏ល្អសម្រាប់ការបង្កើនបាននូវសុភមង្គលសម្រាប់ខ្លួនឯង និងមនុស្សជុំវិញខ្លួនដូចគ្នាដែរ។

យោងតាមគេហទំព័រ fastcompany បានឱ្យដឹងថា នៅពេលមនុស្សមានវ័យកាន់តែចំណាស់ ពួកគេកាន់តែពិបាកក្នុងការបង្កើតមិត្តភាព មិនថានៅក្នុងការិយាល័យ ឬនៅខាងក្រៅនោះទេ នេះបើប្រៀបធៀបទៅនឹងគ្រាកាលវ័យក្មេង ឬវ័យជំទង់។ វាមិនមែនជាហេតុចម្លែកពេកនោះទេ ប៉ុន្តែវាជាកត្តាធម្មជាតិរបស់មនុស្សមួយចំនួនបានវិវឌ្ឍន៍ទៅយ៉ាងដូច្នោះ។ នៅពេលដែលមនុស្សហាក់មានវ័យចាស់ទៅៗ ឬក៏ជាពេលដែលត្រូវចាកចេញពីសាលាដើម្បីបន្តលើវិថីជីវិតថ្មី មនុស្សម្នាក់ៗ តែងផ្តោតពេលវេលាជាមួយខ្លួនឯងច្រើនជាងមុន បើទោះបីជានៅក្បែរមនុស្សម្នាដទៃក៏ដោយ ដែលនេះក៏ជាដើមហេតុមួយធ្វើឱ្យបាត់បង់ឱកាសក្នុងការបង្កើត និងរក្សាមិត្តភាព ឬទំនាក់ទំនងមួយផ្នែកដែរ។

ការថែរក្សាមិត្តភាព ឬទំនាក់ទំនងទាមទារនូវកិច្ចខិតខំប្រឹងប្រែងខ្ពស់ ប៉ុន្តែវាក៏ផ្តល់នូវគុណតម្លៃខ្ពស់ដូចគ្នា។ ការសិក្សាមួយក៏បានបង្ហាញដែរថា មិត្តរួមអាជីពអាចជួយឱ្យអ្នកមានកិច្ចសហការប្រសើរជាងមុន និងជំរុញភាពច្នៃប្រតិដ្ឋ រួមទាំងបង្កើនផលិតភាពការងារ និងបង្កភាពសប្បាយរីករាយជាមួយកាតព្វកិច្ចដែលកំពុងបំពេញទៀតផង។

យ៉ាងណាមិញ នៅកន្លែងការងារមនុស្សបានចំណាយពេលជាច្រើន ហើយប្រសិនបើទីនោះសម្បូរទៅដោយកិច្ចសហការគ្នា ក៏ដូជាការចេះសរសើរគ្នាទៅវិញទៅមក គឺជួយឱ្យការចំណាយពេលទាំងអម្បាលមាណប្រកបដោយអត្ថន័យ។ មួយវិញទៀតក៏អាចរៀនសូត្រពីគ្នាបានទូលាយជាងមុន និងមានឱកាសស្គាល់ពីផ្នត់គំនិតដែលស្រដៀងគ្នាក្នុងវិស័យការងារ។ ត្រង់ចំណុចនេះ ស្ដាប់ទៅហាក់សាមញ្ញបន្តិច ប៉ុន្តែវាជាចំណុចសំខាន់នៅក្នុងការបង្កើតទំនាក់ទំនង និងការភ្ជាប់ខ្លួនទៅក្នុងបរិយាកាសការងារ។

ប្រសិនបើអ្នកមិនទម្លាប់មានមិត្តចំនួនច្រើនកាលពីមុនទេ អ្នកប្រហែលជាត្រូវរឭកខ្លួនឯងឱ្យចូលរួមជារឿយៗ ដូចជាកំណត់ពេល ឬកាលវិភាគដើម្បីហៅទូរស័ព្ទទៅជជែក ឬក៏ដាក់គម្រោងការទៅពិសាកាហ្វេជុំគ្នា។ សូមកុំរំពឹង តែការចាប់ផ្តើមពីអ្នកដទៃមុន គួរមានការចូលរួមទៅវិញទៅមក ហើយបើរកឃើញចំណុចល្អៗ ខណៈជជែកពិភាក្សានៅហាងកាហ្វេ ឬសកម្មភាពដទៃទៀត គួរតែព្យាយាមធ្វើវាជាបន្តបន្ទាប់គ្នា។ លោកអ្នកក៏មិនចាំបាច់ត្រូវចាប់ផ្តើមទាំងបង្ខំនោះដែរ មានន័យថា មិនចាំបាច់ប្រើពេលតែមួយ ទៅបង្កើតមិត្តភាពជាមួយអ្នករួមអាជីពទាំងអស់គ្នាដែរ គប្បីសង្កេតអំពីពេលវេលា ឬកាលៈទេសៈផងដែរ៕