ការគ្មានផលិតភាពក្នុងការបំពេញការងារ អាចធ្វើឱ្យអ្នកមានអារម្មណ៍ខកចិត្តចំពោះខ្លួន​ឯង ឬគិតថាខ្លួនឯងជាបុគ្គលមិនបានការ ព្រមទាំងអាចប៉ះពាល់សុខភាពផ្លូវចិត្តផងដែរ។ ដូច្នេះ អ្នកគួរយកចិត្តទុកដាក់ចំពោះបញ្ហានេះ ដោយអនុវត្តទៅតាមជំហានចំនួន ៦ ដើម្បីទទួលបានផលិតភាពរបស់អ្នកមកវិញ។

១. ឆ្លុះបញ្ចាំងពីគោលដៅខ្លួនឯង ៖ អ្នកគួរចំណាយពេលខ្លះ ដើម្បីសួរ និងឆ្លុះបញ្ចាំងពីខ្លួនឯងថា តើ​អ្នកមានគោលដៅបែបណា និងចង់សម្រេចអ្វីនៅក្នុងជីវិត។ ការខ្វះភាពច្បាស់លាស់អំពីគោលដៅជីវិត អាចជះឥទ្ធិពលអវិជ្ជមានចំពោះកម្លាំងជំរុញផ្លូវចិត្ត និងផលិតភាពការងារ។ ដូច្នេះ អ្នកអាចពិចារណាអំពីអ្វី ដែលមានសារៈសំខាន់បំផុតក្នុងជីវិតអ្នក។ បន្ទាប់មកត្រូវកំណត់គោលដៅឱ្យបានច្បាស់លាស់ និងសមាមាត្រទៅនឹងសក្តានុពលដែលអ្នកមាន។ ក្រោយពីកំណត់គោលដៅរួចរាល់ អ្នកត្រូវដាក់ចេញផែនការសកម្មភាព ដើម្បីអនុវត្តឆ្ពោះទៅរកគោលដៅដែលបានកំណត់។ ផែនការសកម្មភាពនោះទៀតសោតត្រូវមានផែនការរយៈពេលវែង និងរយៈពេលខ្លី ដែលកំណត់ថា តើអ្នកត្រូវសម្រេចអ្វីខ្លះ និងចង់បានអ្វីខ្លះក្នុងពេលវេលាជាក់លាក់ណាមួយ។

២. បំបែកគោលដៅទៅជាកិច្ចការតូចៗ ៖ កិច្ចការធំ និងលំបាក អាចធ្វើឱ្យអ្នកមានអារម្មណ៍ភ័យខ្លាចក្នុងការសម្រេច ហើយជាលទ្ធផលអ្នកអាចនឹងពន្យាពេល។ ដូច្នេះ អ្នកគួរបំបែកគោលដៅនោះទៅជាកិច្ចការតូចៗ និងអាចគ្រប់គ្រងបាន ហើយបំពេញវាម្ដងមួយជំហានៗ។ ការផ្ដោតអារម្មណ៍លើកិច្ចការតូចៗ អាចធ្វើឱ្យសន្ទុះ និងល្បឿនការងាររបស់អ្នករីកចម្រើនជាលំដាប់។

៣. កំណត់កិច្ចការអាទិភាព ៖ ការកំណត់ការងារអាទិភាព គឺជាកិច្ចការចាំបាច់សម្រាប់អ្នកធ្វើការ ព្រោះវាអាចកាត់បន្ថយអារម្មណ៍ធុញថប់ ខណៈពេលមានកិច្ចការជាច្រើនដែលត្រូវធ្វើ។ អ្នកអាចផ្ដល់អាទិភាពការងារតាមរយៈវិធីសាស្ត្រ Superstructure Method ដែលតម្រូវឱ្យបែងចែកប្រភេទកិច្ចការជា ៣រួមមាន ត្រូវតែធ្វើ (Must Have) ,  គួរតែធ្វើ (Should Have) និងល្អប្រសិនបើធ្វើ Good to Have​ ។

• កិច្ចការ Must Have សំដៅលើកិច្ចការសំខាន់ខ្លាំងបំផុត ដែលត្រូវបំពេញឱ្យខានតែបាន
• កិច្ចការ Should Have គឺជាកិច្ចការសំខាន់ ប៉ុន្តែមិនសំខាន់ខ្លាំង
• កិច្ចការ Good to Have សំដៅលើកិច្ចការសំខាន់ តែមិនធ្វើក៏បាន ប៉ុន្តែប្រសិនបើធ្វើនឹងទទួលបានផលច្រើន។

៤. អនុវត្តបច្ចេកទេស Pomodoro ៖ ការអនុវត្តបច្ចេកទេសនេះ តម្រូវឱ្យអ្នកផ្ដោតអារម្មណ៍ធ្វើការដោយយកចិត្តទុកដាក់ក្នុងរយៈពេល ២៥នាទីពេញ ហើយប្រើពេល ៥នាទី ដើម្បីសម្រាក។ បច្ចេកទេសនេះ ជួយឱ្យអ្នកបំពេញផ្តោតអារ​ម្មណ៍បានល្អ និងមានពេលវេលាទៀងទាត់ដើម្បីសម្រាក។ ការបន្តអនុវត្តបច្ចេកទេសនេះជាប់លាប់ អាចបង្កើនផលិតភាពការងារ និងជួយឱ្យអ្នកជៀសផុតបញ្ហាអស់ថាមពលក្នុងខ្លួន (Burn Out)។ យ៉ាងណាមិញ ចូរកត់ចំណាំថា អ្នកអាចសម្រាកយូរជាង ៥នាទី បន្ទាប់ពីអនុវត្តបានដងជាប់ៗគ្នា។

៥. ជៀសវាងការបែកអារម្មណ៍ ៖ បុព្វហេតុដ៏ធំមួយដែលនាំឱ្យផលិតភាពការងារធ្លាក់ចុះ គឺបែកអារម្មណ៍​ ហើយការបែកអារម្មណ៍កើតចេញពីកត្តា ២គឺ កត្តាខ្លួន​ឯង និងកត្តាមជ្ឈដ្ឋានខាងក្រៅ។

• កត្តាខ្លួនឯង គឺជាការបែកអារម្មណ៍ដោយសារការគិតអវិជ្ជមាន ដែលបណ្ដាលមកពីបញ្ហាផ្សេងៗដែលអ្នកបានជួបប្រទះ។ អារម្មណ៍អវិជ្ជមានទាំងនេះ ធ្វើដែលអ្នកលែងចង់ធ្វើកិច្ចការសំខាន់ដែលអ្នកត្រូវធ្វើ ហើយងាកទៅធ្វើកិច្ចការផ្សេងដែលធ្វើឱ្យអ្នកធូរស្បើយអារម្មណ៍។
• កត្តាមជ្ឈដ្ឋានខាងក្រៅ គឺជាការបែកអារម្មណ៍ដោយសារឥទ្ធិពលពីមជ្ឈដ្ឋានខាងក្រៅ ដែលក្នុងនោះមានដូចជា ទូរស័ព្ទ បណ្ដាញសង្គម ឬសំឡេងរំខានផ្សេងៗជាដើម។

ដូច្នេះ អ្នកត្រូវហ្វឹកហាត់ផ្ដោតអារម្មណ៍ឱ្យបានល្អ ដើម្បីធានាឱ្យបាននូវការបង្កើនផលិតភាពការងារ។

៦. រក្សាតុល្យភាពថាមពល ៖ កម្រិតថាមពលក្នុងមួយថ្ងៃរបស់យើងគឺប្រែប្រួលជានិច្ច សកម្មភាពខ្លះអាចបង្កើនថាមពល ខណៈសកម្មភាពខ្លះទៀត អាចធ្វើឱ្យថាមពលអ្នកកើនឡើង។ ដូច្នេះ ដើម្បីរក្សាកម្រិតថាមពលឱ្យមានតុល្យភាព អ្នកអាចរៀបចំកាលវិភាគសកម្មភាព និងការបំពេញកិច្ចការ ដោយផ្អែកលើថាមពលជាក់ស្ដែងរបស់អ្នក។ អ្នកគួរចំណាយពេលខ្លះ ដើម្បីសម្រាក និងបញ្ចូលថាមពលឱ្យខ្លួនឯងតាមរយៈការហាត់ប្រាណ ការអាន ឬចំណាយពេលនៅខាងក្រៅជាដើម៕