ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
យើងគ្រប់គ្នាប្រាកដជាដឹងហើយថា ការលេងកីឡា បានផ្តល់អត្ថប្រយោជន៍ជាច្រើន ក្នុងនោះសម្រាប់យុវជន កីឡាបានផ្តល់នូវការអភិវឌ្ឍផ្លូវចិត្ត គំនិត អាកប្បកិរិយា ចំណេះដឹង ក្នុងការដោះស្រាយជំងឺផ្លូវកាយ និងផ្លូវចិត្ត ហើយធ្វើឱ្យពួកគេមានការជឿជាក់លើខ្លួនឯងតាមរយៈសកម្មភាពរាងកាយ ។ ដោយឡែក សិល្បៈ វិញ ក៏បានជួយដល់អភិវឌ្ឍវិជ្ជាសម្បទា បំណិនសម្បទា និងចរិយាសម្បទា តាមរយៈការផ្តោតយកចិត្តទុកដាក់ទៅលើតន្រ្តី ចម្រៀង របាំ គំនូរ និងហត្ថកម្មប្រកបដោយស្មារតីទទួលខុសត្រូវខ្ពស់ ការប្រាស្រ័យទាក់ទងគ្នា គំនិតច្នៃប្រឌិត ការចេះអត់ឱន ការស្រឡាញ់សោភ័ណភាពក្នុងចិត្តអារម្មណ៍។
លោក ពៅ មាសឧត្តម មន្រ្តីនាយកដ្ឋានអប់រំ នៃបណ្តាញសាលារៀនវ៉េស្ទឡាញន៍ មានប្រសាសន៍ថា កីឡា និងសិល្បៈ ពិតជាមានសារៈសំខាន់ក្នុងការជួយទៅដល់យុវជន ដូចជាធ្វើឱ្យរាងកាយមាំមួន មានសុខភាពល្អ ចេះអំណត់ ចេះអធ្យាស្រ័យ មានភាពវាងវៃរហ័សរហួនជាដើម។ ហើយសម្រាប់សិល្បៈវិញ ជួយឱ្យយុវជនមានការ អភិវឌ្ឍវិជ្ជាសម្បទា និងបំណិនសម្បទាមូលដ្ឋានរយៈការសម្តែង , ចេះគោរព និងផ្តល់តម្លៃដល់វប្បធម៌ជាតិ និងអន្តរជាតិ ព្រមទាំងចេះរិះរកមធ្យោបាយដោះស្រាយលើបញ្ហាប្រឈម ដោយឈរលើស្មារតីសហការយ៉ាងជិតស្និទ្ធទាំងក្នុង និងក្រៅសហគមន៍ជាដើម។
លោក មាសឧត្តម បញ្ជាក់ថា ជាលទ្ធផលសម្រាប់សាលារៀនរបស់លោកដែលបានដាក់បន្ថែមមុខវិជ្ជាកីឡា និងសិល្បៈ ឃើញថា យុវជនដែលបានហាត់កីឡា ក៏ដូចជាសិល្បៈ ពួកគេបានចំណាយពេលវេលាមកតាមក្លឹបដែលពួកគេហ្វឹកហាត់ តាមការស្រឡាញ់ និងពេញចិត្ត ដោយចៀសផុតពីការយកពេលវេលាទំនេរទៅលេងហ្គេម ឬចំណាយពេលធ្វើអ្វីដែលគ្មានប្រយោជន៍។ ហើយជាមួយគ្នា សិស្សានុសិស្សភាគច្រើន ពួកគេមានអារម្មណ៍ស្រស់ស្រាយ ។ «ដូចយើងដឹងហើយ គឺកីឡាផ្តល់នូវថាមពល ភាពស្រស់ស្រាយ ក៏ដូចជាធ្វើឱ្យពួកគាត់មានអារម្មណ៍ល្អ និងអារម្មណ៍ធូរស្រាលបានច្រើន»។
យ៉ាងណាក៏ដោយ បើតាមលោក មាសឧត្តម ទាំងកីឡា ទាំងសិល្បៈ សុទ្ធសឹងតែជា Skill ដែលជួយយុវជនមានអារម្មណ៍ស្រស់ស្រាយនៅក្នុងការរៀនសូត្របន្ថែម៕
