ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ប្រសិនបើអ្នកកំពុងព្យាយាមយកឈ្នះទម្លាប់ពន្យារពេល និងកង្វះការលើកទឹកចិត្តខ្លួនឯង អ្នកប្រហែលជាមិនមែនប្រឈមនឹងបញ្ហានេះតែម្នាក់ឯងនោះទេ។ មានមនុស្សជាច្រើន ក៏កំពុងព្យាយាមស្វែងរកវិធីជំរុញទឹកចិត្ត ដើម្បីយកឈ្នះលើបញ្ហាមួយនេះដូចគ្នា។ យ៉ាងណាមិញ ជនជាតិជប៉ុនបានបង្កើតឱ្យមានបច្ចេកទេសចំនួន ៨ ដែលអាចជួយអ្នកដោះស្រាយបញ្ហានេះបាន។
១. អ៊ីគិកៃ (Ikigai) ៖ បច្ចេកទេសនេះ គឺតម្រូវឱ្យអ្នកកំណត់គោលបំណងជីវិតជាចាំបាច់ ។ អ្នកត្រូវស្វែងរកមូលហេតុដែលនាំឱ្យអ្នកក្រោកពីដំណេកជារៀងរាល់ព្រឹក ព្រោះវាគឺជាកម្លាំងជំរុញដ៏សំខាន់។ ហើយគោលបំណងនោះទៀតសោត ត្រូវស្របជាមួយនឹងកម្លាំង និងចំណង់ចំណូលចិត្តផ្ទាល់ខ្លួន និងតម្រូវការរបស់សង្គម។ ទស្សនៈវិជ្ជា អ៊ីគិកៃ នឹងជួយឱ្យអ្នកអាចកំណត់និយមន័យសម្រាប់ជីវិតខ្លួនឯងបាន និងរស់នៅក្នុងជីវិតមួយដែលមានន័យ។
២. ខៃហ្ស៊ីន (Kaizen) ៖ បច្ចេកទេស ខៃហ្ស៊ីន (Kaizen) គឺតម្រូវឱ្យអ្នកផ្ដោតលើការពង្រឹងខ្លួនឯងជាប្រចាំ និងជារៀងរាល់ថ្ងៃ ទោះជាពង្រឹងក្នុងកម្រិតតិចតួចក្ដី។ អ្នកមិនចាំបាច់ត្រូវសម្រេចកិច្ចការធំភ្លាមៗ ឬធ្វើអ្វីគ្រប់យ៉ាងឱ្យសម្រេចក្នុងរយៈពេលខ្លីនោះទេ។ ប៉ុន្តែត្រូវអភិវឌ្ឍ និងពង្រឹងខ្លួនឯងម្ដងបន្តិចៗ ហើយមានភាពស្ថិតស្ថេរ។
៣. ប៉ូម៉ូដូរ៉ូ (Pomodoro) ៖ ប៉ូម៉ូដូរ៉ូ (Pomodoro) គឺជាបច្ចេកទេសធ្វើការ ដែលជួយឱ្យអ្នកផ្ដោតអារម្មណ៍បានល្អ និងជៀសផុតពីបញ្ហា Burn Out ព្រមទាំងជួយបង្កើនផលិតភាពការងារ។ អ្នកអាចអនុវត្តបច្ចេកទេសនេះ ដោយធ្វើការ ២៥នាទី និងសម្រាក ៥នាទី ហើយអនុវត្តវាសារចុះសារឡើងរហូតក្លាយជាទម្លាប់។
៤. ហារ៉ា ហាឈី ប៊ូ (Hara Hachi Bu) ៖ នេះជាបច្ចេកទេសញ៉ាំអាហារងាយៗ ដែលជួយឱ្យអ្នកសកម្មជាងមុន។ ដោយគ្រាន់តែញ៉ាំអាហារ ចំនួន ៨០ភាគរយ នៃភាពឆ្អែតប៉ុណ្ណោះ។ ដូច្នេះ អ្នកនឹងមិនមានអារម្មណ៍ថាឆ្អែតខ្លាំង ឬខ្ជិលក្រោយញ៉ាំអាហារនោះទេ។
៥. សូស៊ីន (Shoshin) ៖ សូស៊ីន មានន័យជាភាសាខ្មែរថា គំនិតនៃការចាប់ផ្ដើមដំបូង (Beginner’s mind)។ នេះគឺជាទស្សនៈដែលបង្រៀនឱ្យមនុស្សហ៊ានបើកចិត្ត រៀនសូត្រចំណេះដឹង និងសាកល្បងធ្វើរឿងថ្មីៗ ដោយមិនចាំបាច់ខ្វល់ ឬគិតច្រើន អំពីភាពល្អឥតខ្ចោះ។ ប៉ុន្តែអ្វីដែលសំខាន់ គឺត្រូវធ្វើឱ្យអស់ពីលទ្ធភាព។
៦. វ៉ាប៊ិ សាប៊ិ (Wabi-sabi) ៖ ការទទួលយកភាពមិនល្អឥតខ្ចោះ! ជំនួសឱ្យការតានតឹងទៅលើ រឿងដែលយើងធ្វើមិនបានល្អឥតខ្ចោះ ជនជាតិជប៉ុនបានណែនាំឱ្យផ្ដោតទៅលើការធ្វើរឿងដែលសំខាន់ និងទទួលស្គាល់សម្រស់នៃភាពសាមញ្ញ។ ក្នុងទស្សនៈចង់បង្ហាញថា ការសម្រេចការងារឱ្យបានជោគជ័យ គឺប្រសើរជាងចង់ឱ្យលទ្ធផលដែលចេញមកល្អឥតខ្ចោះ។ ដូច្នេះ ត្រូវហ៊ានចាប់ផ្ដើមសកម្មភាព។
៧. ហ្វ័ររ៉េស បេដស៊ីង (Forest Bathing) ៖ ចំណាយពេលខ្លះជាមួយធម្មជាតិ! ការកាត់បន្ថយភាពតានតឹង និងពង្រឹងអារម្មណ៍វិជ្ជមាន ពិតជាមានសារៈសំខាន់ខ្លាំងណាស់។ ដូច្នេះ ជនជាតិជប៉ុន បានណែនាំថា គួរចំណាយពេលខ្លះ ដើម្បីដើរនៅកន្លែងដែលមានដើមឈើ ស្រូបយកខ្យល់អាកាសបរិសុទ្ធ និងអនុញ្ញាតឱ្យធម្មជាតិសាកថ្មឱ្យអ្នក។
៨. កាកៃបុ (Kakeibo) ៖ បង្កើតទម្លាប់សន្សំ ហើយត្រូវអនុវត្តជាប្រចាំ! ជនជាតិជប៉ុនជាជនជាតិ ដែលពូកែសន្សំប្រាក់បំផុត ព្រោះគេយល់ថា នៅពេលដែលហិរញ្ញវត្ថុរបស់គេមានសុវត្ថិភាព គេនឹងអាចកាត់បន្ថយអារម្មណ៍តានតឹងបានមួយកម្រិត។ ដូច្នេះ គេនឹងមានកម្លាំងជំរុញកាន់តែខ្លាំង ក្នុងការសម្រេចគោលដៅសំខាន់ៗផ្សេងទៀត៕
