អាហារូបករណ៍​សម្តេចអគ្គមហាសេនាបតីតេជោ ហ៊ុន សែន និង​សម្តេចកិត្តិព្រឹទ្ធបណ្ឌិត តាមរយៈ​សម្តេច​មហាបវរធិបតី ហ៊ុន ម៉ាណែត និង​លោកជំទាវបណ្ឌិត ពេជ ចន្ទមុន្នី បានប្រកាស​ផ្តល់​អាហារូបករណ៍​ចំនួន ៨០កន្លែង សម្រាប់​សិក្សា​លើជំនាញជាច្រើន នៅ​តាម​គ្រឹះស្ថាន​សិក្សាចំនួន៦ របស់​សាធារណរដ្ឋ​ប្រជាមានិតចិន សម្រាប់ឆ្នាំសិក្សា​២០២៤-២០២៥។

បើតាមសេចក្តីជូនដំណឹងរបស់​សមាគមសិស្ស-និស្សិត អាហារូបករណ៍​សម្តេចអគ្គមហាសេនាបតីតេជោ អាហារូបករណ៍​ដែលត្រូវផ្តល់ជូននៅគ្រឹះស្ថានសិក្សា​ទាំង៦នោះ​រួមមាន ទី១ សាកលវិទ្យាល័យស៊ុន​យ៉ាត់សេន (Sun Yat-sen University) ផ្តល់ជូនចំនួន១៥កន្លែង សម្រាប់​កម្រិតសិក្សា​ថ្នាក់​បរិញ្ញាបត្រ​ សិក្សា​រយៈពេល ៤-៥ឆ្នាំ ជាភាសាចិន ដោយ​ទទួលបានអត្ថប្រយោជន៍ថ្ងៃសិក្សា ប្រាក់​ឧបត្ថម្ភ​ប្រចាំខែ និង​កន្លែង​ស្នាក់នៅ។ ទី២ សាកលវិទ្យាល័យ​ប៉េកាំង​តិចណូឡូជី ចំនួន ៥កន្លែង សម្រាប់កម្រិតសិក្សា​បរិញ្ញាបត្រ និងបរិញ្ញាបត្រជាន់ខ្ពស់ ជាភាសាចិន ដោយ​ទទួលបានអត្ថប្រយោជន៍ ថ្ងៃសិក្សា ប្រាក់​ឧបត្ថម្ភ​ប្រចាំខែ និង​កន្លែងស្នាក់នៅ។

ទី៣ សាកលវិទ្យាល័យធាងជីង ចំនួន ៥កន្លែង សម្រាប់កម្រិតសិក្សា​បរិញ្ញាបត្រ និង​បរិញ្ញាបត្រជាន់ខ្ពស់ ជា​ភាសាចិន ឬអង់គ្លេស ដោយ​ទទួលបានអត្ថប្រយោជន៍ ថ្ងៃសិក្សា ប្រាក់​ឧបត្ថម្ភ​ប្រចាំ​ខែ និង​កន្លែងស្នាក់នៅ។ ទី៤ សាកលវិទ្យាល័យ​មហាសមុទ្រ​ជើជាំង ចំនួន ៣០កន្លែង សម្រាប់កម្រិតសិក្សា​ថ្នាក់​បរិញ្ញាបត្រ និងបរិញ្ញាបត្រជាន់ខ្ពស់ ជាភាសាចិន ដោយ​ទទួលបានអត្ថប្រយោជន៍ ថ្លៃសិក្សា និង​កន្លែងស្នាក់នៅ ។ ទី៥ សាកលវិទ្យាល័យ​ហ៊ូចូវ ចំនួន ២០កន្លែង កម្រិតសិក្សា​បរិញ្ញាបត្រជាន់ខ្ពស់ ជាភាសាចិន ឬអង់គ្លេស ដោយទទួលបានអត្ថប្រយោជន៍ ថ្លៃសិក្សា និង​កន្លែង​ស្នាក់នៅ និង ទី៦ សាកលវិទ្យាល័យជីវជាំង ចំនួន ៥កន្លែង សម្រាប់​កម្រិតសិក្សា​ថ្នាក់ភាសាចិន ដោយ​ទទួលបានអត្ថប្រយោជន៍ថ្លៃសិក្សា​ ប្រាក់​ឧបត្ថម្ភ​ប្រចាំខែ និង​កន្លែងស្នាក់នៅ។

សម្រាប់លក្ខខណ្ឌ នៃការស្នើសុំចុះឈ្មោះ ៖ បេក្ខជនទាំងពីរភេទ​ត្រូវ​មាន សញ្ជាតិខ្មែរ, មានសញ្ញាបត្រ​មធ្យមសិក្សា​ទុតិយភូមិ ឬសញ្ញាបត្រ​មានតម្លៃស្មើ និង​មាននិទ្ទេសល្អ, មានសញ្ញាបត្រ​បរិញ្ញាបត្រ ឬសញ្ញាបត្រ​ដែលមានតម្លៃស្មើ សម្រាប់ថ្នាក់បរិញ្ញាបត្រជាន់ខ្ពស់, ត្រូវ​មានព្រឹត្តិបត្រពិន្ទុ, មានអាយុក្រោម ២៥ឆ្នាំ គិតត្រឹម​ថ្ងៃដាក់ពាក្យ សម្រាប់ថ្នាក់បរិញ្ញាបត្រ, មានអាយុក្រោម ៣៥ឆ្នាំ គិត​ត្រឹមថ្ងៃ​ដាក់ពាក្យ សម្រាប់​ថ្នាក់បរិញ្ញាបត្រជាន់ខ្ពស់, មានអាយុចាប់ពី ១៦-៣៥ឆ្នាំ (គ្រូបង្រៀនភាសាចិន​អាចពន្យារដល់ ៤៥ឆ្នាំ) សម្រាប់សាកលវិទ្យាល័យ​ជីវជាំង, ត្រូវ​មានចំណេះដឹងភាសាអង់គ្លេស និង​ភាសាចិនល្អ, មានសុខភាព និង​សតិបញ្ញាល្អ។

សិស្ស-និស្សិត​ដែលមានបំណង​ចង់ចូលរួម​ក្នុង​ដំណើរការ​ជ្រើសរើស សូមចូលទៅកាន់លីង https://me-qr.com/yyWlxd5I ដើម្បីទទួលពាក្យស្នើសុំ និង​ប្រគល់​ជូនការងារ​នៅ​ការិយាល័យ​ នៃក្រុមការងារ អ.ម.ត ចិន ស្ថិតនៅផ្លូវ​៣១៥ សង្កាត់បឹងកក់១ ខណ្ឌទួលគោក រាជធានីភ្នំពេញ (ភោជនីយដ្ឋាន​ វ័ន ម៉រ) យ៉ាង​យូរ​បំផុត​ត្រឹម​ថ្ងៃទី៣១ ខែមីនា ឆ្នាំ​២០២៤ វេលាម៉ោង​៥រសៀល។ ​ទំនាក់ទំនងព័ត៌មាន Telegram 061 281 333៕