ភ្នំពេញ – រៀងរាល់ឆ្នាំនៅថ្ងៃទី២០ ខែមីនា ពិភពលោកតែងប្រារព្ធទិវាសុភមង្គលអន្តរជាតិ ឬជាភាសាអង់គ្លេសហៅថា International Day of Happiness ដើម្បីទទួលស្គាល់ពីគុណតម្លៃសុភមង្គល និងសុខុមាលភាពជីវិតដែលជាក្តីប្រាថ្នាដ៏ពិសិដ្ឋរបស់មនុស្សគ្រប់រូប ។ ទិវាប្រារព្ធទិវាសុភមង្គលអន្តរជាតិជាសកល បានទទួលស្គាល់ដោយអង្គការសហប្រជាជាតិ កាលពីថ្ងៃទី១២ ខែកក្កដា ឆ្នាំ២០១២ និងបានអនុវត្តជាផ្លូវការនៅឆ្នាំ២០១៣ ។

បើតាមខ្លឹមសារនៃទិវាសុភមង្គលអន្តរជាតិ ឆ្នាំ២០២៣ របស់អង្គការសហប្រជាជាតិ ប្រធានបទគោល នៃទិវាសុភមង្គលអន្តរជាតិឆ្នាំនេះ ផ្តោតទៅលើ “សេចក្តីស្ងប់ផ្លូវចិត្ត, ការដឹងគុណ, និងអំពើល្អ” ។ កាលពីឆ្នាំ២០២២ ទិវាសុភមង្គលអន្តរជាតិ បានលើកយកប្រធានបទ “កសាងភាពរីករាយឡើងវិញ” ដែលរំលឹកទៅដល់ការស្តារស្ថានភាពឱ្យប្រសើរឡើងវិញបន្ទាប់ពីវិបត្តិសកលកូវីដ-១៩ ។

ទន្ទឹមគ្នានេះ ខ្លឹមសារ នៃទិវាសុភមង្គលអន្តរជាតិ គឺអង្គការសហប្រជាជាតិបានចាត់ទុកថា សេចក្តីសុខគឺជាកត្តាមួយយ៉ាងសំខាន់ដើម្បីជំរុញ និងលើកទឹកចិត្តដល់មនុស្សជាតិ ទាំងអស់នៅលើពិភពលោករស់នៅប្រកបដោយសុខសន្តិភាពទាំងផ្លូវកាយ និងផ្លូវចិត្ត ។

អង្គការសហប្រជាជាតិប្រចាំកម្ពុជា បានបង្ហាញសារថា ទិវាសុភមង្គលអន្តរជាតិ ជាថ្ងៃដែលត្រូវមានភាពរីករាយ ។ សុភមង្គល ឬភាពរីករាយគឺជាគោលដៅសំខាន់របស់មនុស្ស ។ គន្លឹះដើម្បីសុខុមាលភាពផ្លូវចិត្តរបស់មនុស្សប្រសើរឡើងអាស្រ័យលើសកម្មភាពប្រចាំថ្ងៃ ៥ចំណុច រួមមាន ធ្វើលំហាត់ប្រាណទៀងទាត់, បរិភោគអាហារទៀងទាត់, និយាយបីអារម្មណ៍ផ្ទាល់ខ្លួនទៅកាន់អ្នកដទៃ, ព្យាយាមកាត់បន្ថយគ្រឿងស្រវឹង, និងគេងឱ្យបានគ្រប់គ្រាន់ ។

កាលពីឆ្នាំ២០១៥ នាឱកាសអង្គការសហប្រជាជាតិបានដាក់ចេញគោលដៅអភិវឌ្ឍន៍ប្រកបដោយចីរភាព SDGs ចំនួន ១៧ ដើម្បីបញ្ចប់ភាពក្រីក្រ កាត់បន្ថយ វិសមភាព និងការពារភពផែនដី ចំណុចគោលនេះជាទិដ្ឋភាពសំខាន់ដែលនាំទៅរកសុខុមាលភាព និងសុភមង្គល ។ អង្គការសហប្រជាជាតិ ក៏បានអញ្ជើញមនុស្សគ្រប់វ័យ ធុរកិច្ចជន និងតំណាងរដ្ឋាភិបាលនានា ដើម្បីចូលរួមអបអរសាទរទិវាសុភមង្គលអន្តរជាតិ ៕