ភ្នំពេញ – កម្មវិធីអាហារូបករណ៍ Amgen បើកផ្ដល់អាហារូបករណ៍ខ្លីរយៈពេល២ខែដោយ​មានការគាំទ្រពី Tokyo Scholarship សម្រាប់និស្សិតបរទេសដែលបានបញ្ចប់ថ្នាក់បរិញ្ញាបត្រ និងកំពុងសិក្សាថ្នាក់បរិញ្ញាបត្រ ។ អាហារូបករណ៍ផ្ដល់ជូនការសិក្សាផ្នែក ស្រាវជ្រាវវិទ្យាសាស្ត្រ ចំនួន២០កន្លែងនៅប្រទេសជប៉ុន និងឱកាសចុះស្រាវជ្រាវផ្សេងៗ ។

លំនាំនៃការសិក្សាស្រាវជ្រាវក្នុងអាហារូករណ៍រួមមាន ទទួលបានឱកាសទៅទស្សនកិច្ចសិក្សាដើម្បីបញ្ចប់ការសិក្សានៅសាលាស្រាវជ្រាវជីវវេជ្ជសាស្រ្ត, មានឱកាសចូលរួមសិក្ខាសាលានិងវគ្គពិសេសសម្រាប់សិស្សានុសិស្សដែលរៀបចំឡើងដោយមូលនិធិ, វគ្គបណ្ដុះបណ្ដាលព័ត៌មាននៃការដាក់ពាក្យចូលរៀននៅសាកលវិទ្យាល័យតុក្យូ (UTokyo) និងទស្សនាបណ្ណាល័យសាកលវិទ្យាល័យតូក្យូ មណ្ឌលថែទាំសុខភាព និងកន្លែងហាត់ប្រាណ ។ លើសពីនេះមានឱកាសបានចូលរួមក្នុងព្រឹត្តិការណ៍វប្បធម៌ជប៉ុន និងដំណើរកំសាន្តដែលមូនិធិជាអ្នករៀបចំ ។

បេក្ខជនដែលទទួលបានអាហារូបករណ៍នឹងទទួលបានការគាំទ្រដូចជា កន្លែងស្នាក់នៅដែលមានទីតាំងនៅជិតអគារសិក្សា ទទួលបានទឹកប្រាក់សម្រាប់ចំណាយជិត២ពាន់ដុល្លារអាមេរិក សំបុត្រយន្តហោះសម្រាប់សិស្សបរទេសក្រៅស្រុក ឬសំបុត្ររថភ្លើងសម្រាប់សិស្សក្នុងស្រុក ។ ប៉ុន្តែមិនមានការធានារ៉ាប់រងផ្នែកសុខភាពនោះឡើយ បេក្ខជនត្រូវថែរក្សា ឬចំណាយថ្លៃព្យាបាល ក្នុងករណីណាមួយដោយខ្លួនឯង ។

រយៈពេលនៃការឈប់ទទួលពាក្យថ្ងៃទី០១ ខែកុម្ភៈ ឆ្នាំ២០២៣ ម៉ោងនៅប្រទេសជប៉ុន ។ នៅពាក់កណ្ដាលខែមីនា បេក្ខភាពនឹងទទួលបានដំណឹងពីការសម្រេចចិត្តរបស់អាហារូបករណ៍។ នៅថ្ងៃទី០៥ ខែមិថុនា បេក្ខជនត្រូវទៅដល់ប្រទេសជប៉ុន និងចាប់ផ្ដើមចូលវគ្គសិក្សានៅថ្ងៃទី០៦ ខែមិថុនា និងបញ្ចប់នៅថ្ងៃទី៣១ ខែកក្កដា ។ ថ្ងៃទី០១ ដល់ ០៥ បេក្ខជនអាចនឹងមានឱកាសទៅប្រទេសសិង្ហបុរីក្នុងកម្មវិធីរបស់អាហារូបករណ៍ Amgen ។

សម្រាប់ព័ត៌មានបន្ថែមអាចចូលទៅកាន់តំណភ្ជាប់ https://b4unew.com/amgen-scholars-program-in-japan/ និងបំពេញពាក្យតាមរយៈ https://www.u-tokyo.ac.jp/contact/news_mail_e.php?dir=h-0110 ៕