បច្ចុប្បន្ន​ពិភពលោក​កំពុងតែធ្វើការផ្លាស់ប្តូរយ៉ាងលឿន​ទៅ​កាន់យុគសម័យបច្ចេកវិទ្យាឌីជីថល, នៅចុងឆ្នាំ២០២៣ និង​នៅដើមឆ្នាំ២០២៤ វត្តមាននៃបច្ចេកវិទ្យាបញ្ញាសិប្បនិម្មិតចេះនិពន្ធ ឬ Generative AI ចាប់ផ្តើមលេចវត្តមាន ដែលធ្វើឱ្យវិស័យអប់រំចាប់បាច់ត្រូវតែធ្វើបដិវត្តកម្ម។

ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី និង​ជារដ្ឋមន្រ្តីក្រសួងអប់រំ​ យុវជន និងកីឡា មានប្រសាសន៍ថា ការ​វិវឌ្ឍន៍ថ្មីរបស់បញ្ញាសិប្បនិម្មិត (AI) អាចនឹងធ្វើ​បដិវត្តក្នុងវិស័យអប់រំ, ឯកឧត្តមបន្តថា ថ្ងៃអនាគត បញ្ញាសិប្បនិម្មិត អាចជួយ​អ្នកសិក្សា​ឱ្យ​រៀនដោយខ្លួនឯង ហើយ​វាទាមទារ​ឱ្យ​គ្រូបង្រៀន​ត្រូវ​តែចេះប្រើប្រាស់បច្ចេកវិទ្យា និង​បង្រៀន​សិស្ស​ឱ្យ​ចេះបំណិនសតវត្សរ៍ទី២១ ដែលរួមមានការចេះគិតពិចារណា ចេះដោះស្រាយ​បញ្ហា ក៏​ដូចជា​ការ​ចេះប្រើប្រាស់​នូវ​បច្ចេកវិទ្យា ហើយ AI គឺជាជំនួយ​ការ​មួយ​ដ៏សំខាន់។

ដើម្បីឆ្លើយតបទៅនឹងយុគសម័យបច្ចេកវិទ្យាឌីជីថល ប្រព័ន្ធអប់រំត្រូវតែផ្លាស់ប្តូរ មិន​អាចរៀនត្រឹមទន្ទេញចាំបានទេ ហើយចំណេះដឹងទូលំទូលាយ ការចេះត្រិះរិះពិចារណា ការចេះដោះស្រាយបញ្ហា នឹងធ្វើ​ឱ្យ​ការងារយើងកាន់តែមានប្រសិទ្ធភាពខ្លាំងឡើង…

ឯកឧត្តម ហង់ជួន ណារ៉ុន ឧបនាយករដ្ឋមន្រ្តី រដ្ឋមន្រ្តីក្រសួងអប់រំ​ យុវជន និងកីឡា

ឯកឧត្តមបណ្ឌិតសភាចារ្យ ហង់ជួន ណារ៉ុន មានប្រសាសន៍ថា ក្នុងយុទ្ធសាស្រ្តបញ្ចកោណ របស់រាជរដ្ឋាភិបាល បានដាក់ចេញ​នូវ​មុំចំនួន៥ ដែល​ក្នុងនោះ​មុំទី១ គឺការ​អភិវឌ្ឍធនធាន​ម​នុស្ស ហើយមុំទី៥ គឺការ​អភិវវឌ្ឍបច្ចេកវិទ្យា វិទ្យាសាស្រ្តឌីជីថល ។ ដើម្បីឆ្លើយតបទៅនឹងយុទ្ធសាស្រ្តនេះ ក្រសួងអប់រំ យុវជន និងកីឡា បានបង្កើតមហាវិទ្យាល័យ​សេដ្ឋកិច្ចឌីជីថល នៅក្នុងសាកលវិទ្យាល័យជាតិគ្រប់គ្រង ដែល​សម្តេចនាយករដ្ឋមន្រ្តី​ទើប​តែសម្ពោធ​ដាក់​ឱ្យ​ប្រើប្រាស់​កាលពីពេលថ្មីៗនេះ។ ជាមួយគ្នា​នៅ​វិទ្យាស្ថានបច្ចេកវិទ្យាកម្ពុជា ក៏​មានបើកនូវ​ជំនាញថ្មីៗ កម្រិតបរិញ្ញាបត្រ បរិញ្ញាបត្រជាន់ខ្ពស់ ក៏ដូចជាបណ្ឌិត ទៅលើផ្នែក បញ្ញាសិប្បនិម្មិត (AI), ផ្នែកសុវត្ថិភាពបណ្តាញ ឬសន្តិសុខ Cyber, ផ្នែកវិទ្យាសាស្រ្តទិន្នន័យ, ផ្នែក​មេកាត្រូនិច ក៏​ដូចជា​ជំនាញថ្មីៗ​ដែលទាមទារ​សម្រាប់​សេដ្ឋកិច្ច​ឌីជីថល។

ដោយឡែកនៅថ្នាក់មធ្យមសិក្សា​វិញ ក៏​ទាមទារ​ឱ្យ​ផ្លាស់ប្តូរ​នូវ​វិធីសាស្រ្តបង្រៀន ពីការបង្រៀន​ឱ្យសិស្សទន្ទេញចាំ ប៉ុន្ដែ​ត្រូវ​បង្រៀនឱ្យសិស្ស​ចូលរួម​សាកល្បង​អនុវត្ដន៍ ពិសោធន៍​ដោយ​ខ្លួនឯង និង​ឆ្លងកាត់​ការស្រាវជ្រាវ​ដោយ​ខ្លួនឯង​។ ការសិក្សា​ដោយ​ខ្លួនឯង​បែប​នេះ​អាច​ឲ្យ​សិស្ស​ចងចាំ​មេរៀន​បានយូរ និង​បែកគំនិត ព្រោះ​បាន​ឆ្លងកាត់​បទពិសោធ​ផ្ទាល់​។ តាមប្រសាសន៍របស់ ឯកឧត្តម ហង់ជួន ណារ៉ុន ក្នុងពេលថ្មីៗនេះ គេបានរកឃើញរបៀបរៀនតាមបែប EPIC ដែលជាវិធីសាស្រ្តរៀនរបស់យុវជនសម័យថ្មី។

តើវិធីសាស្រ្តរៀន​តាមបែប EPIC មានអ្វីខ្លះ?

ឯកឧត្តមរដ្ឋមន្រ្តីក្រសួងអប់រំមានប្រសាសន៍បញ្ជាក់ថា វិធីសាស្រ្តរៀនតាមបែប EPIC គឺមានដូចជា Experiential Learning រៀនតាមរយៈការពិសោធន៍ ដែលបានន័យថា រៀនហើយ​ត្រូវធ្វើការពិសោធន៍ជាក់ស្តែង ឧទាហរណ៍ ពេលសិស្សរៀន​មុខវិជ្ជាវិទ្យាសាស្រ្ត គឺត្រូវ​ផ្តល់​ឱកាស​ឱ្យ​សិស្ស​ធ្វើពិសោធន៍ ព្រោះ​បើ​មានគំនិតធំៗ ហើយ​មិន​ហ៊ានធ្វើពិសោធន៍ គឺសិស្ស​នឹង​មិន​យល់ស៊ីជម្រៅនោះទេ។

Participant Learning រៀនដោយមានការចូលរួមជាមួយសិស្សដទៃទៀត ជាមួយគ្រូជាអ្នកដឹកនាំ, វិធីសាស្រ្តនេះគឺសិស្សត្រូវ​ចូលរួមជាមួយគ្នាទៅជាក្រុម​មួយ ដើម្បីស្វែង​រក​ចំណេះដឹង ទោះចំណេះដឹងនោះ​មាននៅក្នុងសៀវភៅ​រួចហើយ​ក្តី ប៉ុន្តែប្រសិនបើសិស្សអាច​ស្វែង​រក​ដោយ​ខ្លួនឯង នោះ​នឹង​ធ្វើ​ឱ្យ​ខួរក្បាល​ងាយស្រួលចាំជាង។

Imaginaries Learning រៀនដើម្បី​ឱ្យ​មានការចេះស្រមើស្រមៃ, បើតាម​ប្រសាសន៍របស់ ឯកឧត្តមរដ្ឋមន្រ្តី គ្រូបង្រៀន​អាច​ឱ្យ​សិស្សស្រមើលស្រមៃ ដោយ​មានន័យថា ការរៀន​មិន​មែន​ទន្ទេញចាំនោះទេ ប៉ុន្តែត្រូវរៀនស្រមើស្រមៃទៅថ្ងៃមុខទៀត តើវិទ្យាសាស្រ្ត​អាច​នឹងរីកចម្រើន​យ៉ាង​ដូចម្តេចទៀត?

Connectedness Learning រៀនដោយប្រើប្រាស់នូវបច្ចេកវិទ្យា, គឺជាការប្រើប្រាស់​បច្ចេកវិទ្យាឌីជីថល អ៊ីនធឺណេត នៅក្នុងការរៀនសូត្រ។

សរុបជារួម បើតាមប្រសាសន៍របស់ ឯកឧត្តម ហង់ជួន ណារ៉ុន ឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និងកីឡា ក្នុងយុគសម័យថ្មី យុគសម័យបច្ចេកវិទ្យាឌីជីថល គឺទាមទារ​ឱ្យ​យើង​ធ្វើការផ្លាស់ប្តូរវិធីសាស្រ្តបង្រៀន ពីតាមបែបទន្ទេញចាំមាត់ ទៅជាការបង្រៀនឱ្យយល់ស៊ីជម្រៅ ហើយ​ជាមួយ​គ្នា​នេះ ក្រសួងក៏​កំពុងតែធ្វើការពិនិត្យឡើងវិញនូវ​សៀវភៅ​សិក្សា​គោល និងវិធីសាស្រ្តបង្រៀនផងដែរ៕