យុវតី សឺង សួនរ៉ូហ្សា មកពីសាលាប៊ែលធីអន្តរជាតិ ជាម្ចាស់ជ័យលាភីលេខ១ ផ្នែកវោហារស័ព្ទឆ្នើមលើប្រធានបទ «អាវុធមុខពីរ» ក្នុងកម្មវិធីជជែកដេញដោលថ្នាក់ជាតិ ឆ្នាំ២០២៣។ ទន្ទឹមនឹងលទ្ធផលល្អប្រសើរនេះ រ៉ូហ្សា បានលើកឡើងថា រូបគេពិតជាសប្បាយចិត្ត និងរំភើបខ្លាំង ព្រោះត្រូវទន្ទឹងរងចាំលទ្ធផលរហូតដល់មួយខែ។ ម្យ៉ាងលទ្ធផលនេះ មិនមែនគ្រាន់តែជោគជ័យសម្រាប់ខ្លួនឯង និងគ្រួសារនោះទេ ប៉ុន្តែក៏ជាការតំណាងសាលាផងដែរ។

យុវតីរូបនេះបន្ថែមថា ចំពោះកម្មវិធីតម្រូវឱ្យលើកប្រធានបទ ទាក់ទងនឹងវិស័យអប់រំ ហើយប្រធានបទ រ៉ូហ្សា លើកឡើងនៅក្នុងការប្រកួតនោះ គឺពាក់ព័ន្ធនឹងសុខភាពផ្លូវចិត្ត ទោះវាគឺជាបញ្ហាតូចមួយ ប៉ុន្តែវាកើតឡើងពិតជាក់ស្ដែង និងចាក់ដោតសម្រាប់យុវជន និងសង្គម ។

រ៉ូហ្សា បញ្ជាក់ថា ប្រធានបទ «អាវុធមុខពីរ» ដែលខ្លួនលើកយមកនិយាយនោះ គឺមានគោលបំណងធំបំផុត ដើម្បីបញ្ជ្រៀបឱ្យយុវជនយល់អំពីឥទ្ធិពលសុខភាពផ្លូវចិត្តចំពោះការសិក្សារបស់ពួកគេ។

ប្រធានបទ ដែលខ្ញុំបានលើកឡើងក្នុងការប្រកួតជជែកដេញដោល គឺគោលដៅរបស់ខ្ញុំ ចង់បញ្ជ្រាបឱ្យយុវជនទាំងអស់ គាត់បានដឹងអំពីបញ្ហាតួចៗមួយ ប៉ុន្តែវាជះឥទ្ធិពលខ្លាំងទៅដល់ការសិក្សារបស់គាត់។

យុវតី សឺង សួនរ៉ូហ្សា ម្ចាស់ជ័យលាភី វោហារស័ព្ទឆ្នើម ឆ្នាំ ២០២៣

បើតាមការបញ្ជាក់របស់រ៉ូហ្សា មានបីកត្តាដែលធ្វើឱ្យរូបគេទទួលបានលទ្ធផលល្អប្រសើរក្នុងការនិយាយជាសាធារណៈ ទី១ គឺកត្តាខ្លួនឯង ៖ រ៉ូហ្សា ថា មែនទែនទៅ រូបគេក៏ធ្លាប់បរាជ័យក្នុងកម្មវិធីជជែកដេញដោលផ្សេងៗពីមុនមកដែរ ហើយក៏ធ្លាប់បាក់ទឹកចិត្តទៀតផង, ទី២ គឺកត្តាគ្រួសារ ៖ ប៉ាម៉ាក់នៅតែបន្តនៅក្បែរ និងលើកទឹកចិត្ត ដែលធ្វើឱ្យគេមានកម្លាំងចិត្ត ហើយនៅពេលដែលរូបគេទៅផ្ទះ ប៉ាម៉ាក់គេតែងតែនិយាយថា គេនឹងធ្វើបាន, ទី៣ គឺកត្តា សមាជិកក្រុម និងមិត្តភក្តិ។

យុវតីឆ្នើមខាងលើបន្ថែមថា សម្រាប់យុវជនជំនាន់ក្រោយ ដែលចង់ចូលរួមប្រកួតនិយាយជាសាធារណៈ គួរមានលក្ខណៈចំនួនបី ទី១ គួរតែមានសិល្បៈក្នុងការនិយាយ ហើយ រ៉ូហ្សា ជឿថា ទាំងអស់គ្នាសុទ្ធតែមានសិល្បៈ និងទេពកោសល្យនិយាយរៀងខ្លួន គ្រាន់តែថា យើងខ្លួនឯងមិនទាន់ដឹងថា គួរនិយាយបែបណាទើបទាក់ទាញ។ ជាក់ស្ដែង សិល្បៈក្នុងការនិយាយរបស់ រ៉ូហ្សា មានទំនោក្នុងការនិយាយបែបអារម្មណ៍មនោសញ្ជេតនា។ ដូច្នេះ ភាគច្រើន ប្រធានបទដែលយុវតីរូបនេះ និយាយគឺតែងតែផ្ដោតទៅលើរឿងបែបហ្នឹង ដើម្បីផ្ដល់ភាពងាយស្រួលក្នុងការនិយាយ។ ទី២ ភាពក្លាហានក្នុងការបង្ហាញ ព្រោះថា អ្នកខ្លះមានសមត្ថភាព ប៉ុន្តែគាត់មិនបានបង្ហាញ។ ចំណែកទី៣ គឺ ទាំងសមត្ថភាព ទាំងឱកាស ទាំងលទ្ធភាព ត្រូវតែដើរទន្ទឹមគ្នា មិនអាចខ្វះមួយណាបាននោះទេ។

ជាមួយគ្នានេះ រ៉ូហ្សា ក៏បានបង្ហាញការអរគុណចំពោះអគ្គនាយដ្ឋានយុវជន សម្រាប់ការបង្កើតនូវកម្មវិធីនេះឡើង ហើយកម្មវិធីវោហារស័ព្ទឆ្នើ​មនេះទៀតសោត គឺជាលើកទី១ ក្នុងរដូវកាលទាំង៤ ​នៃកម្មវិធីជជែកដេញដោល។ ជាមួយគ្នានេះ យុវតីរូបនេះ បានបង្ហាញក្តីសង្ឃឹមថា នៅរដូវកាលបន្ទាប់នឹងមានអ្នកផ្សេងៗទៀត ធ្វើបានល្អ ឬក៏មានភាពទាក់ទាញលើសរូបគេ ដែលជាម្ចាស់ជ័យលាភីក្នុងឆ្នាំនេះថែមទៀត៕