«កុំយកពាក្យខ្លាចធ្លាក់បាក់ឌុបធ្វើជាឧសគ្គសម្រាប់អនាគតខ្លួនឯង ព្រោះកាលណាមានផ្នត់គំនិតអវិជ្ជមាននឹងធ្វើឱ្យបាត់បង់នូវសក្កដានុពល» ។ នេះជាការលើកឡើងរបស់យុវជន ប៊ុណ្ណា ហេងឡុង ជាអតីតសិស្សនិទ្ទេស C ឆ្នាំ២០២២ នៃសាលារៀនជំនាន់ថ្មី វិទ្យាល័យព្រែកលាប ហើយបច្ចុប្បន្នជានិស្សិតឆ្នាំទី១ សិក្សាជំនាញគ្រប់គ្រងពាណិជ្ជកម្មអន្តរជាតិ នៃវិទ្យាស្ថាន CEO ។

យុវជន ប៊ុណ្ណា ហេងឡុង លើកឡើងថា ប្រសិនបើសិស្សានុសិស្សដែលជាបេក្ខជនប្រឡងរវល់តែគិតថា ខ្លាចប្រឡងធ្លាក់បាក់ឌុប ហើយមិនយកពេលទៅមើលមេរៀនទេ នោះនឹងនាំឱ្យខាតបង់ពេលវេលា ដូច្នេះយើងគួរជំនួសមកវិញដោយមើលមេរៀនត្រៀមប្រឡង ឬសួរលោកគ្រូ អ្នកគ្រូ លើចំណុចដែលយើងចេះមិនទាន់ច្បាស់។ ហេងឡុង បន្តថា កាលណាយើងប្រឡងបាក់ឌុបទទួលបាននិទ្ទេសល្អ ឬអាចទទួលបាននូវអាហារូបករណ៍ផ្សេងៗ ពិតជាមានកិត្តិយខ្លាំងសម្រាប់គ្រួសារ និងខ្លួនឯង ក៏ប៉ុន្តែប្រសិនបើយើងមិនទទួលបាននិទ្ទេសដែលយើងចង់បានទេ ត្រូវគិតឡើងវិញថា​ និទ្ទេសទាំងនោះក៏មិនបានកំណត់អនាគតរបស់យើងទាំងស្រុងនោះដែរ។ សំខាន់បច្ចុប្បន្ន យើងត្រូវធ្វើសកម្មភាពប្រចាំថ្ងៃឱ្យបានល្អប្រសើរបំផុត ព្រោះកម្មភាពរបស់យើងនាពេលបច្ចុប្បន្នវាអាចបង្ហាញលទ្ធផលនាពេលអនាគត ក៏ដូចជាលទ្ធផលប្រឡងបាក់ឌុបខាងមុខដែរ។ 

«ការប្រឡងបាក់ឌុប មានអត្ថន័យសម្រាប់មនុស្សម្នាក់ៗផ្សេងៗគ្នា ប៉ុន្តែសម្រាប់ខ្ញុំវិញអត្ថន័យនៃការប្រឡងបាក់ឌុបវាអាចបញ្ជាក់ពីការខិតខំប្រឹងប្រែងរបស់យើងពីជីវិតបឋមសិក្សារហូតដល់មធ្យមសិក្សារយៈពេល១២ឆ្នាំ »

យុវជន ប៊ុណ្ណា ហេងឡុង ជាអតីតសិស្សនិទ្ទេស C ឆ្នាំ២០២២

យុវជន ប៊ុណ្ណា ហេងឡុង បានចែករំលែកបទពិសោធន៍របស់ខ្លួន ដោយថា អំឡុងពេលត្រៀមប្រឡងសិស្សានុសិស្សអាចស្វ័យសិក្សាដោយខ្លួនឯង ដោយអាចរៀនតាម App ក្រសួងអប់រំ, App ទូរសិក្សា រំលឹកមេរៀនពីសៀវភៅក្រសួងអប់រំ ឬធ្វើវិញ្ញាសាចាស់ៗដែលធ្លាប់ចេញឱ្យបានច្រើនបន្ថែមទៀត ឬអនុវត្តការប្រឡងសាកល្បងឱ្យដូចការប្រឡងបាក់ឌុប។

ជាមួយ​គ្នានេះ បើតាមយុវជន ហេងឡុង មុនពេលប្រឡង សិស្សានុសិស្សគួរបរិភោគអាហារដែលជួយបំប៉នសុខភាព មានសារធាតុចិញ្ចឹមខួរក្បាល ហើយគេងឱ្យបានគ្រប់គ្រាន់ កាត់បន្ថយភេសជ្ជគ្រឿងកំប៉ុងមានជាតិផ្អែមខ្លាំង និងត្រូវញ៉ាំទឹកឱ្យបានច្រើន។ 

«ខ្ញុំលើកទឹកចិត្តប្អូនៗសិស្សានុសិស្សដែលត្រៀមប្រឡងបាក់ឌុបខាងមុខនេះ កុំរៀនច្រើនពេករហូតដល់ដាក់សម្ពាធលើខ្លួនឯង ត្រូវចេះស្វែងរកកន្លែងរៀនដែលស្ងប់ស្ងាត់អាចផ្ចង់អារម្មណ៍បានល្អ និងបរិយាកាសរៀនមានផាសុភាព»

យុវជន ប៊ុណ្ណា ហេងឡុង ជាអតីតសិស្សនិទ្ទេស C ឆ្នាំ២០២២

យុវជនវ័យ១៨ឆ្នាំរូបនេះ ក៏​បានប្រាប់ចំណុច​ដែលត្រូវប្រុងប្រយ័ត្ន​សម្រាប់​បេក្ខជន​ត្រៀមប្រឡងបាក់ឌុប នោះ​គឺត្រូវត្រៀមសម្ភារៈសម្រាប់ប្រឡងឱ្យបានគ្រប់គ្រាន់ដូចជា ប៊ិក បន្ទាត់ ជាដើម ព្រោះប្រសិនជាភ្លេចរបស់ទាំងនេះ វាអាចនាំឱ្យបែកអារម្មណ៍ ពិបាកផ្ដោតអារម្មណ៍លើការប្រឡង ហើយក៏មិនអាចខ្ចីពីបេក្ខជនដទៃក្នុងម៉ោងប្រឡងបានដែរ។  

ក្នុងនាមជាសិស្សច្បងម្នាក់ យុវជន ប៊ុណ្ណា ហេងឡុង លើទឹកចិត្តប្អូនៗជាបេក្ខជនប្រឡង ត្រូវរៀនតាមសម្រួល កុំបង្ខំឬដាក់សម្ពាធខ្លួនឯងដែលអាចនាំឱ្យប៉ះពាល់ដល់សុខភាព ជាពិសេសធ្វើយ៉ាងណាឱ្យជីវិតរៀននៅវិទ្យាល័យមានអត្ថន័យបំផុត និងត្រូវមានផ្នត់គំនិតថា កាលណាយើងជោគជ័យលើការប្រឡងបាក់ឌុប យើងបាននាំកិត្តិយស ក៏ដូចជាកេរ្តិ៍ឈ្មោះជាច្រើនដល់គ្រួសារ ប៉ុន្តែបើមិនទទួលបានលទ្ធផលដូចការរំពឹងទុក សូមកុំបាក់ទឹកចិត្ត ហើយត្រូវចេះចាប់យកឱកាសផ្សេងៗទៀតក្នុងការធ្វើឱ្យគ្រួសារមានកិត្តិយសដូចគ្នាតាមរយៈការប្រឡងអាហារូបករណ៍ផ្សេងៗ រៀនជំនាញបច្ចេកទេស និងវិជ្ជាជីវៈ ឬចូលរួមប្រកួកម្មវិធីយុវជនផ្សេងៗកាន់តែល្អ៕