មាតាបិតាភាគច្រើនតែងតែចង់ឱ្យ​បុត្រធីតារបស់ខ្លួនមានរាង្គកាយមាំមួន សុខភាពល្អ មានបញ្ញាឆ្លាសវៃ និងរៀនសូត្រទទួលបានចំណាត់ថ្នាក់ល្អ ដើម្បីទទួលបានជោគជ័យក្នុងជីវិត។ ប៉ុន្តែអ្នកជំនាញក្នុងវិស័អប់រំលើកឡើងថា “កុមារ និងយុវជនត្រូវការអភិវឌ្ឍផ្នែករាង្គកាយ បញ្ញា អារម្មណ៍ និងទំនាក់ទំនងទន្ទឹមគ្នា ដើម្បីទទួលជោគជ័យក្នុងអាជីពការងារ និងមុខបរបអាជីវកម្មនៅពេលអនាគត”។

ថ្លែងក្នុងពិធីប្រគល់វិញ្ញាបនបត្របញ្ចប់ភូមិសិក្សាកម្រិតមត្តេយ្យសាលារៀនសហគមន៍២១ កាលពីថ្មីៗនេះ ឧកញ៉ា ប៉ិច បូឡែន អគ្គនាយបណ្តាញគ្រឹះស្ថានអប់រំ វេសឡាញ អេឌ្យូខេសិន គ្រុប បានមានប្រសាសន៍ថា ឪពុកម្តាយភាគច្រើនផ្តោតសំខាន់លើការអភិវឌ្ឍផ្នែករាង្គកាយ ដោយបរិភោគអាហារបំប៉នផ្សេងៗតាំងពីទារកចាប់កំណើតនៅក្នុងផ្ទៃ រហូតទារកប្រសូត អ្នកអាណាព្យាបាលខិតខំស្វែងរកអាហារល្អៗ ដើម្បីជំរុញឲ្យកុមារមានរាង្គកាយលូតលាស់ ធំធាត់ មានសុខភាពល្អមាំទាំ និងមានបញ្ញាវៀងវៃផងដែរ។

លោកឧកញ៉ាបានបន្ថែមទៀតថា នៅពេលកុមារគ្រប់អាយុចូលរៀន មាតាបិតាស្វះស្វែងរកសាលារៀនដែលមានកម្មវិធីល្អ និងមានតម្លៃថ្លៃ ដើម្បីធានាថាកូនៗទទួលបានចំណេះដឹងទូលំទូលាយ មានបញ្ញាឆ្លាសវៃ និងទទួលបានជោគជ័យក្នុងការសិក្សា រហូតដាក់សម្ពាធកូនត្រូវយកចំណាត់ថ្នាក់លេខ១ ឬលេខ២ឱ្យ​យខាងតែបាន។

លោកឧកញ៉ាបានសង្កត់ធ្ងន់ថា មនុស្សមួយចំនួនមានរាង្គកាយ សុខភាពល្អ បញ្ញាឆ្លាសវៃ រៀនសូត្របានខ្ពង់ខ្ពស់មានចំណេះដឹង ជំនាញគ្រាន់បើ ប៉ុន្តែការអភិវឌ្ឍផ្នែកអារម្មណ៍ ស្មារតីទន់ជ្រាយ ឆាប់ខឹង ឆាប់អន់ចិត្ត ឆាប់តូចចិត្ត បាក់ទឹកចិត្ត ស្រងាកចិត្ត ខ្វះភាពអំណត់តស៊ូព្យាយាម ខ្វះការប្រាស្រ័យទាក់ទងល្អជាមួយមនុស្សនៅជុំវិញ ធ្វើការងារជាក្រុមតែងតែមានបញ្ហាជាមួយអ្នកដទៃ ដែលកត្តានេះភាគច្រើននាំឲ្យបរាជ័យក្នុងអាជីពការងារ ក៏ដូចជាមុខរបរអាជីវកម្មផ្សេងៗផងដែរ។

ដើម្បីជំរុញកុមារ និងយុវជនទទួលបានការអភិវឌ្ឍពេញលេញ លោកឧកញ៉ាបានបញ្ជាក់ថា អ្វីដែលយើងត្រូវធ្វើ គឺផ្តល់ការអប់រំ និងការអភិវឌ្ឍផ្នែកអារម្មណ៍ ស្មារតី និងទំនាក់ទំនងសម្រាប់កុមារក្រោមអាយុ៦ឆ្នាំ ចំណែកកុមារអាយុពី ៦ ដល់១២ឆ្នាំ គឺផ្តោតជាសំខាន់លើការអភិវឌ្ឍផ្នែកចំណេះដឹង និងភាពមាំទាំផ្នែកអត្តចរិត។ រីឯយុវជនចាប់ពីអាយុ១៣ឆ្នាំ ដល់១៨ឆ្នាំ គឺជាវ័យមួយត្រូវតម្រង់ទិសផ្នែកចំណេះដឹង ជំនាញមួយចំនួន ដើម្បីឆ្ពោះទៅចាប់យកជំនាញសិក្សានៅកម្រិតឧត្តមសិក្សា ហើយវ័យនេះក៏នៅតែបន្តអភិវឌ្ឍផ្នែកអត្តចរិត ផ្នត់គំនិត ការស្រឡាញ់សង្គមជាតិ និងចេះជួយអ្នកដទៃ។

ទន្ទឹមនឹងនេះ ដើម្បីសម្រេចបានកត្តាខាងលើនេះ លោកឧកញ៉ាបានជំរុញ និងលើកទឹកចិត្តអ្នកអាណាព្យាបាលចូលរួមសហការធ្វើសកម្មភាពជាមួយសាលារៀន និងទាមទារបទពិសោធន៍ និងចំណេះដឹងអប់រំបុត្រធីតាផងដែរ៕