ក្នុងគោលបំណងដើម្បីរួមគ្នាលើកកម្ពស់ការអាននៅតាមសហគមន៍ សៀវភៅមួយសហគមន៍មួយ ប្រកាសជ្រើសរើសយុវជនចូលរួមកម្មវិធីប្រកួតប្រជែងអាន ដោយ​កម្មវិធីនឹង​រៀបចំឡើងនៅថ្ងៃទី ៤ ដល់ ថ្ងៃ ៧ មេសា នៅវិទ្យាល័យចំណេះដឹងទូទៅ និងបច្ចេកទេសហ៊ុនសែនជម្ពូវ័ន។

កម្មវិធីប្រកួតប្រជែងអាននេះ រៀបចំឡើងដោយ «សៀវភៅមួយសហគមន៍មួយ» រួមទាំងមានការសហការពី JCI, Sipar, និងស្ថាប័នផ្សេងៗទៀតជាច្រើន ថែមទាំងមានការគាំទ្រដោយក្រសួងអប់រំផងដែរ។ ដើម្បីអាចចូលរួមការប្រកួតនេះបានយុវជនត្រូវមានអាយុចន្លោះ ១៥ ទៅ ៣០ ឆ្នាំ ដែលមានទីតាំងកំណើត ឬ រស់នៅទីក្រុងភ្នំពេញស្រាប់ អាចនិយាយ និងសរសេរភាសាខ្មែរបានច្បាស់។

កញ្ញា Kiriku Shirono មន្ត្រីទំនាក់ទំនងសាធារណ:នៃយុទ្ធនាការ សៀវភៅមួយ សហគមន៍មួយ ប្រចាំរាជធានីភ្នំពេញ បានឱ្យដឹងថា គោលបំណងសំខាន់នៃការរៀបចំកម្មវិធីប្រកួតប្រែងអាន គឺដើម្បីលើកកម្ពស់យុវជន សិស្សនិស្សិតអានសៀវភៅ ទទួលបានភាពរីកចម្រើន រៀនសូត្រអ្វីថ្មីៗបន្ថែម, ក្នុងពេលជាមួយគ្នាពួកគាត់ចូលចិត្តអាន និងមានអារម្មណ៍រីករាយពេលអានសៀវភៅ។ កញ្ញាបន្តថា ការអាន គឺជាវិធីដ៏ល្អមួយនៃជីវិត តាមរយៈការរៀនសូត្រ មនុស្សអាចរីកចម្រើន និងរៀនបាន។ ហើយកម្មវិធីនេះ នឹងជួយមនុស្សឱ្យយល់ដឹងអំពីសារៈសំខាន់នៃការអានកាន់តែច្បាស់។

មន្ត្រីទំនាក់ទំនងសាធារណ:នៃយុទ្ធនាការ សៀវភៅមួយសហគមន៍​មួយ រូបនេះបន្ថែមថា បេក្ខជនដែលចូលរួមមិនត្រឹមតែអាចមានឱកាសទៅប្រទេសជប៉ុន ឬទទួលបានរង្វាន់ប៉ុណ្ណោះទេ ប៉ុន្តែពួកគាត់ក៏អាចដឹងពីសារៈសំខាន់ និងភាពរីករាយនៃការអានផងដែរ។ លើសពីនេះ តាមរយៈការអានសៀវភៅយុវជនអាចរៀនសូត្រ ហើយក៏អាចទទួលបានសមត្ថភាពក្នុងការគិតពិចារណាផងដែរ។

គួរបញ្ជាក់ផងដែរថា ការប្រកួតមានពីរដំណាក់កាល គឺ សង្ខេបអត្ថន័យ នៃសៀវភៅណាមួយ និងប្រកួតប្រជែងនិយាយជាសាធារណៈ ដែលគេនឹងជ្រើសរើសអ្នកដាក់ពាក្យ១០០នាក់ ហើយអ្នកដែលមានឱកាសអាចឡើងនិយាយជាសាធារណៈ មានចំនួន១០ នាក់ តែប៉ុណ្ណោះ។ ចំណែកឯលទ្ធផលនឹងត្រូវបានប្រកាសនៅថ្ងៃទី ០៥ មេសា ឆ្នាំ២០២៤។

ក្នុងការប្រកួតនេះ នឹងមានការផ្តល់រង្វាន់ជូនបេក្ខជនឆ្នើម ក្នុងនោះ ជ័យលាភីលេខ១ ទទួលបានទឹកប្រាក់ចំនួន ៦០ម៉ឺនរៀល, ជ័យលាភីលេខ២ ទទួលបានទឹកប្រាក់ ៤០ ម៉ឺនរៀល និងជ័យលាភីលេខ ៣ ទទួលបានទឹកប្រាក់ ២០ម៉ឺនរៀល និងរង្វាន់ផ្សេងៗទៀត។

យុវជនដែលមានចំណាប់អារម្មណ៍ចូលរួមប្រកួតប្រជែងអាន អាចដាក់ពាក្យរហូតដល់ថ្ងៃទី ២៥ មីនា ឆ្នាំ២០២៤ តាមរយៈតំណភ្ជាប់ https://bit.ly/ppreadingcontest?r=qr​​ ៕