ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ដើម្បីជាការលើកកម្ពស់អក្ខរកម្ម បណ្តុះទម្លាប់ការអាន ជំរុញវប្បធម៌អាន និងលើកកម្ពស់សមត្ថភាពអានរបស់សិស្សានុសិស្ស ក្រសួងអប់រំយុវជន និងកីឡា កាលពីថ្ងៃទី១ ខែមេសា បានធ្វើការណែនាំមួយទៅកាន់មន្ទីរអប់រំគ្រប់រាជធានីខេត្ត គណៈកម្មការអភិវឌ្ឍន៍កម្រងសាលារៀន គណៈគ្រប់គ្រងគ្រឹះស្ថានបឋមសិក្សា លោកគ្រូ អ្នកគ្រូ មាតាបិតា អ្នកអាណាព្យាបាល សហគមន៍ រៀបចំឱ្យមានការប្រឡងប្រណាំងអំណាននៅកម្រិតបឋមសិក្សា។
បើយោងតាមសេចក្តីណែនាំដែលចុះហត្ថលេខាដោយ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី និងជារដ្ឋមន្រ្តីក្រសួងអប់រំ យុវជន និងកីឡា ការប្រឡងប្រណាំងអំណាន ត្រូវរៀបចំអនុវត្តតាមកម្រិតថ្នាក់រៀន សាលារៀន កម្រងសាលារៀន និងក្រុង ស្រុក ខណ្ឌ ។ ក្នុងនោះនៅកម្រិតថ្នាក់រៀន គ្រូបង្រៀនត្រូវដឹកនាំរៀបចំការប្រឡងប្រណាំងអំណាននៅកម្រិតថ្នាក់រៀនប្រចាំសប្តាហ៍ ឬស្របតាមខ្លឹមសារមេរៀនអំណាន ហើយរៀបចំបញ្ជីឈ្មោះដែលទទួលជ័យលាភីក្នុងថ្នាក់ ដើម្បីចូលរួមប្រឡងប្រណាំងនៅកម្រិតសាលារៀន។
សម្រាប់កម្រិតសាលារៀន គណៈគ្រប់គ្រងសាលា សហការជាមួយគណៈកម្មការគ្រប់គ្រងសាលារៀន ដឹកនាំរៀបចំការប្រឡងប្រណាំងអំណាននៅកម្រិតសាលារៀនប្រចាំខែ ហើយផ្តល់រង្វាន់លើកទឹកចិត្តដល់ជ័យលាភី ទៅតាមលទ្ធភាព និងធនធានដែលមាន និងអាចលើកសរសើរជាសាធារណៈតាមបណ្តាញសង្គមជាដើម បន្ទាប់មកគណៈគ្រប់គ្រងសាលា ពិនិត្យនិងអនុម័តលើបញ្ជីឈ្មោះសិស្សដែលទទួលជ័យលាភីក្នុងសាលារៀន ដើម្បីចូលរួមប្រឡងប្រណាំងកម្រិតកម្រងសាលារៀន។
ដោយឡែកការប្រឡងប្រណាំងកម្រិតកម្រងសាលារៀន ប្រធានកម្រងត្រូវដឹកនាំរៀបចំការប្រឡងប្រណាំងអំណានប្រចាំត្រីមាស ឬឆមាស ហើយផ្តល់រង្វាន់លើកទឹកចិត្តដល់ជ័យលាភីទៅតាមលទ្ធភាព ហើយប្រធានកម្រងសាលារៀនពិនិត្យ និងអនុម័តលើបញ្ជីឈ្មោះសិស្សដែលទទួលជ័យលាភីក្នុងកម្រងសាលារៀន ដើម្បីចូលរួមប្រឡងប្រណាំងកម្រិតក្រុង ស្រុក ខណ្ឌ។ ហើយសម្រាប់ការប្រឡងប្រណាំងកម្រិតក្រុង ស្រុក ខណ្ឌ គណៈអភិបាល នៃរដ្ឋបាលក្រុង ស្រុក ខណ្ឌ ត្រូវដឹកនាំរៀបចំការប្រឡងប្រណាំងប្រចាំឆមាស ឬប្រចាំឆ្នាំ ហើយផ្តល់រង្វាន់លើកទឹកចិត្តដល់ជ័យលាភីទៅតាមលទ្ធភាព និងធនធានដែលមាន និងអាចលើកសរសើរជាសាធារណៈតាមរយៈបណ្តាញសង្គមជាដើម។
គួរបញ្ជាក់ដែរថា ក្រសួងអប់រំ យុវជន និងកីឡា បានកំណត់ធ្វើការពង្រឹងការបង្រៀន និងរៀនភាសាខ្មែរនៅកម្រិតអប់រំបឋមសិក្សា ដោយផ្តោតទៅលើសមត្ថភាពអាន សរសេរ ស្តាប់ និងនិយាយ ជាអាទិភាពគន្លឹះ ។ បើតាមលោកជំទាវ ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា គោលបំណងនៃការពង្រឹងការបង្រៀន និងរៀនភាសាខ្មែរនេះ គឺដើម្បីធានាឱ្យសិស្សម្នាក់ៗ ទទួលបានចំណេះដឹង និងបំណិនភាសាខ្មែររឹងមាំ, មានសមត្ថភាពពិពណ៌នា វិភាគ វិនិច្ឆ័យ ពន្យល់ បកស្រាយបានត្រឹមត្រូវ និងសមហេតុផល, អនុវត្តចំណេះដឹង បំណិនភាសាខ្មែរក្នុងការសិក្សាមុខវិជ្ជាដទៃទៀត និងការរស់នៅប្រចាំថ្ងៃ, ស្គាល់ និងលើកកម្ពស់តម្លៃមុខវិជ្ជាភាសាខ្មែរ និងមានមោទនភាពក្នុងការប្រើប្រាស់ភាសាខ្មែរ៕
