ភាពមមាញឹករបស់មនុស្សម្នាក់ៗកាន់តែកើនឡើងពីមួយថ្ងៃ ទៅមួយថ្ងៃ នាពេលបច្ចុប្បន្ននេះ ហើយកាតព្វកិច្ចការងារ និងទំនួលខុសត្រូវជាច្រើនបានទាញយកពេលវេលានៃការរស់នៅបានយ៉ាងងាយ។ ដូច្នេះហើយ ការថែរក្សាខ្លួនជាភារកិច្ចកាន់តែសំខាន់ជាងមុន ហើយ​ប្រសិនបើធ្វេសប្រហែស វាអាចនាំឱ្យខ្សោះថាមពល បង្កភាពតានតឹង ចំណែកឯសុខុមាលភាពវិញក៏ថយចុះដែរ។  ទន្ទឹមគ្នានោះបច្ចុប្បន្ន​មនុស្សបានជួបប្រទះនូវបញ្ហាជាច្រើនដូចជា ការធ្វើការងារច្រើនម៉ោង ប្រឈមនឹងវិបត្តិសេដ្ឋកិច្ច ភាពច្របូកច្របល់នឹងព័ត៌មាននៅក្នុងបណ្តាញសង្គមជាច្រើន ដោយ​កត្តាទាំងនេះ បាននាំឱ្យមនុស្ស ហាក់ពិបាកនឹងអនុវត្តន៍ការថែទាំខ្លួនឱ្យបានជាប្រចាំ ខណៈវាជាសកម្មភាពមិនអាចកាត់ផ្តាច់បានពីការរស់នៅ។

និយមន័យការថែទាំខ្លួនគឺជា សកម្មភាពទាំងឡាយណា ដែលជំរុញ ឬលើកកម្ពស់ដល់រាងកាយឱ្យមានសុខភាពល្អ និងការពង្រឹងសុខភាពផ្លូវចិត្ត ។ ហើយដើម្បីពង្រឹងបាននូវចំណុចនេះ គឺត្រូវការវិធីសាស្រ្តដែលត្រឹមត្រូវ និងពេលវេលាដ៏យូរ ក៏ដូចជាការកំណត់យកសុខុមាលភាពជាកិច្ចអាទិភាពក្នុងការប្រតិបត្តិ ទើបការអនុវត្តកាន់តែមានប្រសិទ្ធភាព។ បើតាមគេហទំព័រ The Guardian បានបង្ហាញវិធីសាស្រ្ត៨ចំណុចដើម្បីសម្រេចបាននូវសុខដុមរមនាក្នុងជីវិតការងារ ព្រមទាំងបង្កើតបានសុខមាភាពចំពោះជីវិតផ្ទាល់ខ្លួន ៖

១. ចាត់ទុកការថែខ្លួនជាអាទិភាព ៖ ថែទាំខ្លួន គឺជារឿងហេតុដែលមិនអាចបដិសេធបាន និងជាចំណែកមួយអាទិភាពក្នុងការរស់នៅប្រចាំថ្ងៃ ដូចជាការសម្អាតខ្លួន ដុសធ្មេញ និងបរិភោគអាហារពេលព្រឹកឱ្យបានទៀងទាត់ និងកិច្ចការដទៃជាច្រើនទៀត។ អនុវត្តន៍សកម្មភាពទាំងនោះឱ្យទៅជាអាទិភាពក្នុងការថែរក្សាខ្លួនជាប្រចាំ ទោះបីជាមានពេលវេលាតិចតួចក៏ដោយ។

២. គេងឱ្យបានគ្រប់គ្រាន់ ៖ ការគេងពិតជាមានភាពចាំបាច់ចំពោះសុខភាពរាងកាយ និងសុខភាពផ្លូវចិត្ត ប៉ុន្តែជារឿយៗសកម្មភាពនេះត្រូវធ្វើជាចាំបាច់បំផុតនៅពេលដែលអ្នកមានការងាររវល់ច្រើនហើយសម្រាកបានតិច ឬកំពុងមានភាពតាងតឹង។ ត្រូវធ្វើឱ្យប្រាកដថាអ្នកអាចទទួលទានដំណេកយ៉ាងហោចណាស់ ៧ ទៅ ៨ ម៉ោងក្នុងមួយយប់ ដើម្បីជួយឱ្យអ្នកមានអារម្មណ៍ស្រស់ស្រាយ និងត្រៀមខ្លួនដើម្បីបំពេញការងារនៅថ្ងៃថ្មីមានប្រសិទ្ធភាព។

៣. ហាត់ប្រាណឱ្យបានទៀងទាត់ ៖  ជាទូទៅយើងបានដឹងហើយថា ការហាត់ប្រាណមានប្រយោជន៍ជាច្រើន រួមបញ្ចូលទាំងការកាត់បន្ថយភាពតានតឹង អភិវឌ្ឍន៍ ឬរក្សាថាមពលបានល្អ និងបង្កើនថាមពលមួយកម្រិតបន្ថែមទៀត។ ការហាត់ប្រាណគួរតែធ្វើឱ្យបានក្នុងរយៈពេលយ៉ាងហោចណាស់៣០នាទី ក្នុងមួយថ្ងៃ ទោះបីជាតាមរយៈការដើរ ឬហាត់យូហ្គាក៏ដោយ។

៤. ភ្ជាប់ទំនាក់ទំនងជាមួយមនុស្សដែលខ្លួនស្រឡាញ់ ៖ ការចំណាយពេលជាមួយដែលយើងស្រឡាញ់ គឺជាវិធីសាស្រ្តដ៏ប្រសើរមួយ ក្នុងការកាត់បន្ថយភាពតាងតឹង និងលើកកម្ពស់សុភមង្គល។ ទំនាក់ទំនងមិនថា តាមរយៈទូរស័ព្ទ និយាយតាមវីដេអូ ឬតាមរយៈការសួរសុខទុក្ខផ្ទាល់ អ្វីដែលសំខាន់ត្រូវឱ្យប្រាកដថាការភ្ជាប់ទំនាក់ទំនងនោះមានភាពទៀងទាត់។

៥. ស្វែងរកសកម្មភាពដែលនាំឱ្យអ្នករីករាយ ៖ សកម្មភាពថែទាំខ្លួនឯងដូចជា កម្សាន្តពេលងូតទឹកដោយការច្រៀងលេងជាដើម ឬអានសៀវភៅ និងធ្វើសកម្មភាពដែលនាំឱ្យមានភាពច្នៃប្រឌិត ដែលជួយឱ្យកាត់បន្ថយស្រ្តេស និងជំរុញសុខុមាលភាពរស់នៅ។

៦. ធ្វើសកម្មភាពរំឮកស្មារតី ៖ ការស្មឹងស្មាធិ៍ និងរលឹកដឹងសតិជារឿយៗ ជាវិធីសាស្រ្តដែលកាត់បន្ថយស្រ្តេស និងលើកម្ពស់សុខុមាលភាព ហើយវាគឺជាវិធីសាស្រ្តដ៏សាមញ្ញធ្វើឡើងតាមរយៈការផ្តោតទៅលើស្ថានភាពបច្ចុប្បន្ន និងការកាត់ផ្តាច់នូវការបារម្ភ ឬការរំខាននានា។ ព្យាយាមអនុវត្តន៍សម្មភាពរំលឹកដឹងបែបនេះជារៀងរាល់ថ្ងៃ មិនថាតាមរយៈសមាធិ ហាត់យូហ្កា  ឬការអង្គុយដកដង្ហើមមួយៗ វែងៗ។

៧. កំណត់ព្រំដែលផ្ទាល់ខ្លួន ៖ វាពិតជាសំខាន់ណាស់ដែលត្រូវមានការចេះកំណត់ព្រំដែននៃខ្លួនឯង រវាងការងារ និងជីវិតផ្ទាល់ខ្លួន ដើម្បីធានាថា អ្នកបានយកចិត្តទុកដាក់ចំពោះសុខុមាភាព និងនាំប្រយោជន៍ដល់ការបំពេញអាជីពការងារផងដែរ។ មានន័យថា បែងចែកពេល និងសកម្មភាពនៅកន្លែងធ្វើការ និងរឿងផ្ទាល់ខ្លួនឱ្យដាច់ស្រេចពីគ្នា។ រួមបញ្ចូលទាំងការសម្រាកពីការលេងបណ្តាញសង្គមដ៏លើសលប់ផងដែរ។

៨. ស្វែងរកជំនួយពីអ្នកជំនាញ  ៖ នៅពេលដែលអ្នកមានអារម្មណ៍ថា ការងាររបស់អ្នកហាក់ផ្ទុកលើសចំណុះ តាងតឹង ឬក៏ថាមពលចាប់ផ្តើមចុះថមថយ និងមិនអាចទ្រទ្រង់បាន អាចថា វាជាពេលដែលត្រូវស្វែងរកអ្នកជំនាញដើម្បីជួយហើយ។ គួរទៅជជែកជាមួយអ្នកឯកទេស ឬអ្នកប្រឹក្សា ដែលមានសមត្ថភាពផ្តល់នៅយោបល់ និងជួយអ្នកក្នុងការអភិវឌ្ឍន៍វិធីសាស្រ្តក្នុងការដោះស្រាយ ជាមួយការប្រឈមនានាក្នុងជីវិត ហើយត្រូវចាំថា ការថែរក្សាខ្លួនគឺជាគន្លឹះសំខាន់ក្នុងការពង្រឹងសុខភាពរាងកាយ និងសុខភាពផ្លូវចិត្ត៕