ភេសជ្ជៈដែលមានជាតិស្ករខ្ពស់ត្រូវគេដឹងជាទូទៅថា វាជំរុញឱ្យមនុស្សធាត់ ព្រមទាំងប្រឈមនឹងជំងឺតម្រង់នោមប្រភេទ២ , ជាមួយ​គ្នា ការស្រាវជ្រាវថ្មីមួយក៏​បានរកឃើញដែរថា ការញ៉ាំភេសជ្ជៈប្រភេទនេះ ក៏ពន្លឿនភាពចាស់នៃកោសិកា DNA មនុស្សផងដែរ ។ ការសិក្សាទៅលើមនុស្សចំនួន ៥០០០នាក់ តាមរយៈការទទួលទានភេសជ្ជៈហ្គាស ដែលមានជាតិស្ករខ្ពស់ចំនួន ៣៥០មីលីលីត្ររាល់ថ្ងៃ អាចពន្លឿនភាពចាស់នៃកោសិកា DNA មនុស្សរហូតដល់ ៤,៦ឆ្នាំឯណោះ។

លោកស្រីបណ្ឌិត អេលីហ្សា អេភែល (Elissa Epel) ដែលធ្វើការ​ស្រាវជ្រាវលើរឿងនេះបានលើកឡើងថា

“ការញ៉ាំភេសជ្ជៈដែលមានជាតិស្ករខ្ពស់ និងហ្គាសខ្លាំង មិនគ្រាន់តែបង្ករឱ្យមានជំងឺច្រើនមុខ និងរំខានដល់ការរំលាយប៉ុណ្ណោះទេ វាថែមទាំងអាចពន្លឿនភាពចាស់នៃកោសិកាទៀតផង។”

នេះបើយោងតាមការសិក្សាដែលបានស្ទង់មតិទៅលើមនុស្សចំនួន ៥៣០៩នាក់ ដែលមានអាយុចន្លោះពី ២០ ដល់ ៦៥ឆ្នាំ ដោយឱ្យពួកគេញ៉ាំភេសជ្ជៈ ដែលមានជាតិស្ករខ្ពស់ បន្ទាប់មកធ្វើការពិនិត្យមើល DNA នៃកោសិកាឈាមសរបស់ពួកគេ។

ក្រុមអ្នកស្រាវជ្រាវបានរកឃើញថា ការផឹកភេសជ្ជៈមានជាតិស្ករ និងហ្គាសខ្ពស់ជាប្រចាំ នាំឱ្យតេឡូមែ (Telomere) ដែលជាម៉ូលេគុល DNA នៅខាងចុងក្រូម៉ស្យូម នៃកោសិកាមនុស្សរួញខ្លី ។ ដោយម៉ូលេគុលនេះមានតួនាទីការពារ DNA នៅក្នុងក្រូម៉ូសូម ហើយរាល់ពេលកោសិកាធ្វើចំណែក មីតូស(Meiosis) តេឡូមែ(Telomere) កាន់តែខ្លីទៅៗ រហូតដល់ពេលមួយអស់តេឡូមែ(Telomere) កោសិកានឹងងាប់តែម្ដង។ លើសពីនេះ នៅក្នុង DNA ក៏មានកូដកំណត់អាយុរបស់មនុស្សផងដែរ កាលណាតេឡូមែ(Telomere) ដែលជាម៉ូលេគុណ DNA អស់ មនុស្សក៏ស្លាប់ដែរ។ ម្យ៉ាងវិញទៀត កោសិកាតេឡូមែ (Telomere) ក៏ជាប់ទាក់ទងនឹងបញ្ហាជំងឺមហារីក បញ្ហាបេះដូង និងជំងឺទឹកនោមផ្អែមផងដែរ។

អ្នកស្រី អេលីហ្សា អេភែល (Elissa Epel) បានសង្កត់ធ្ងន់ថា ការសិក្សានេះគ្រាន់តែបង្ហាញពីទំនាក់ទំនងនៃ DNA និងរបបអាហាររបស់មនុស្សតែប៉ុណ្ណោះ ហើយមិនមានភស្តុតាងបង្ហាញថា ការញ៉ាំភេសជ្ជៈជាតិស្ករធ្វើឱ្យកោសិការមនុស្សឆាប់ចាស់នោះទេ។ ផ្ទុយទៅវិញ ជាតិស្ករដែលចូលក្នុងឈាមយ៉ាងរហ័សក្រោយពីផឹករួច ជាមូលហេតុបង្ករឱ្យមានភាពតានតឹងអុកស៊ីតកម្ម ហើយនេះជាផលប៉ះពាល់ដែលយើងត្រូវយកចិត្តទុកដាក់។

ទាក់ទងនឹងការស្រាវជ្រាវខាងលើនេះ លោក ដេវីត ចាកុប (Devid Jacob) សាស្ត្រាចារ្យផ្នែកសុខភាពសាធារណៈ និងរោគរាតត្បាត នៃសាកលវិទ្យាល័យ មីនីសូតា បានលើកឡើងថា

“វាជាការផ្ដល់យោបល់ដែលគួរឱ្យចាប់អារម្មណ៍មួយ ដែលលើកឡើងពីការផឹកភេសជ្ជៈដែលមានជាស្ករខ្ពស់ សង្កត់ធ្ងន់លើម៉ូលេគុលតេឡូមែ (Telomere)។ ព្រោះវាជាមូលដ្ឋានទំនាក់ទំនងរវាងស្ករដែលលើសក្នុងរបបអាហារ និងម៉ូលេគុលដែលបង្ករឱ្យកោសិកាឆាប់ចាស់ ប៉ុន្តែវិបត្តិនេះអាចកើតឡើងក្នុងរយៈពេលយូរ ហើយវាមិនមែនជាបញ្ហាធំនោះទេ។ អ្នកស្រាវជ្រាវត្រូវប្រើពេលតាមដានឱ្យបានយូរបន្តិច ដើម្បីតាមដានឱ្យបានកាន់តែច្បាស់ថា តើនឹងមានបញ្ហាអ្វីកើតឡើង។”

ទន្ទឹមនឹងនេះ អ្នកស្រី អេភែល (Epel) ក៏បានបន្ថែមផងដែរថា ក្រុមការងាររបស់អ្នកស្រីគ្រោងនឹងស្រាវជ្រាវបន្ថែមទៀត ដើម្បីឱ្យប្រាកដថា តើអាហារដែលមានជាតិស្ករខ្ពស់ពិតជាបង្ករឱ្យតេឡូមែ(Telomere) រួញមែនដែរឬទេ៕