ការត្រៀមខ្លួនប្រឡងអាហារូបករណ៍ចូលសាកលវិទ្យាល័យនីមួយៗជាអ្វីដែលសិស្សត្រូវមានមុនការប្រឡងមកដល់ ហើយការសាកសួរព័ត៌មានពីសិស្សច្បងនៅសាលា ក៏ជាគន្លឹះមួយជួយឱ្យសិស្សត្រៀមខ្លួនត្រូវសម្រាប់ការប្រឡងផងដែរ នេះជាការលើឡើងរបស់កញ្ញា ហែម ចាន់ធីតា និស្សិតឆ្នាំទី១ នៅ​​​​​​​​​​​​​​​ដេប៉ាតឺម៉ង់ប្រព័ន្ធផ្សព្វផ្សាយ និងសារគមនាគមន៍ (DMC) នៃសាកលវិទ្យាល័យភូមិន្ទភ្នំពេញ(RUPP)។

កញ្ញា ហែម ចាន់ធីតា ជានិស្សិតអាហារូបករណ៍១០០% ម្នាក់ក្នុងចំណោមនិស្សិតអាហារូបករណ៍១០០%ចំនួន០៩នាក់ ដែលបានឆ្លងកាត់ការប្រឡងប្រជែងជាមួយសិស្សជាងមួយរយនាក់ ហើយ ធីតា នឹងចែករំលែកអំពីបទពិសោធន៍ដែលនាងបានឆ្លងកាត់ដើម្បីទទួលបានអាហារូបករណ៍នេះ។

កញ្ញា ហែម ចាន់ធីតា បានប្រាប់ឱ្យដឹងថា នៅឆមាសទី២ នៃថ្នាក់ទី១២ ពេលដែលនាងរៀននៅវិទ្យាល័យ ខាងសាលាបានឱ្យសិស្សបំពេញពាក្យស្នើសុំអាហារូបករណ៍នៅសាកលវិទ្យាល័យក្រោយបញ្ចប់ថ្នាក់វិទ្យាល័យ ពេលនោះ កញ្ញាបានជ្រើសរើសបំពេញពាក្យអាហារូបករណ៍នៅដេប៉ាតឺម៉ងប្រព័ន្ធផ្សព្វផ្សាយ នៃសាកលវិទ្យាល័យភូមិន្ទភ្នំពេញជាជម្រើសទី១ ព្រោះកញ្ញាមានចំណាប់អារម្មណ៍ក្នុងផ្នែកផលិតវីដេអូឯកសារ។ យុវតី ចាន់ធីតា បានបន្តថា បន្ទាប់ពីមានឈ្មោះទៅប្រឡងនៅក្នុងវគ្គសំណេរជាមួយបេក្ខជនជាច្រើនទៀត កញ្ញាបានតាំងចិត្តក្នុងការប្រឡង និងត្រៀមខ្លួនដូចជា សួរនាំទៅកាន់សិស្សច្បងឆ្នាំមុនៗ តាមដានព័ត៌មានប្រចាំថ្ងៃ សិក្សាពីវប្បធម៌ទូទៅ ប្រវិត្តវិទ្យា និងភាសាអង់គ្លេសជាដើម។

ក្រោយចេញលទ្ធផលទៅកាន់វគ្គសម្ភាសន៍ កញ្ញា ហែម ចាន់ធីតា បានលើកឡើងថា យុវជនត្រូវស្គាល់ពីខ្លួនឯងឱ្យបានគ្រប់គ្រាន់ដើម្បីត្រៀមខ្លួនទៅសម្ភាសន៍ មានទាំងការនិយាយស្ដី និងធ្វើទំនាក់ទំនងជាមួយលោកគ្រូអ្នកគ្រូដូចនេះនឹងធ្វើឱ្យខ្លួនមិនសូវមានភាពភ័យខ្លាចក្នុងការនិយាយជាមួយគណៈកម្មការសម្ភាសន៍។ លើសពីនេះ កញ្ញាបានស្វែងយល់អំពីព័ត៌មានសាលានៅក្នុង website របស់សាលាឱ្យកាន់តែច្បាស់ ដឹងពីដៃគូរសហការណ៍របស់សាលា និងដឹងពីខ្លួនឯងអំពីមូលហេតុដែលចង់សិក្សានៅ DMC ផងដែរ។

ដំបូន្មានពីសិស្សច្បងជាចំណែកមួយជួយឱ្យយើងត្រៀមខ្លួនបានត្រឹមត្រូវមុនពេលប្រឡងអាហារូបករណ៍មកដល់ បូករួមជាមួយនឹងការសំលៀងសមត្ថភាពខ្លួនឯងឱ្យជឿជាក់បានថាអាចយកធ្វើវាបាន

កញ្ញា ហែម ចាន់ធីតា។

បេក្ខជនជ័យលាភីអាហារូបករណ៍រូបនេះបានបន្តថា ដើម្បីអាចទទួលបានអាហារូបករណ៍សិក្សានៅសាលារៀនណាមួយ បេក្ខជនគួរតែស្វែងរកខ្លួនឯងស្គាល់ពីឬសគល់របស់ខ្លួនឯងសិនថា ស្រឡាញ់ ឬចង់សិក្សាជំនាញអ្វី បន្ទាប់មកត្រូវស្វែងយល់ពីសាលាដែលចង់ទៅសិក្សាដោយស្រាវជ្រាវអំពីហេតុផលមួយចំនួនដែលសាលាណាត្រូវជាមួយអ្វីដែលខ្លួនចង់បាន ជៀសវាងរើសសាលា ឬជំនាញរៀនខុស។

សម្រាប់កញ្ញា ហែម ចាន់ធីតា អាហារូបករណ៍ដែលកញ្ញាទទួលបាននេះ គឺបានចូលរួមជាចំណែកយ៉ាងធំមួយដើម្បីសម្រួលដល់ការចំណាយរបស់គ្រួសារលើការសិក្សារបស់ខ្លួន និងជាឱកាសផ្ដល់ឱ្យកញ្ញាសិក្សានូវអ្វីដែលខ្លួនឯងធ្លាប់ប៉ងរៀនផងដែរ៕