កាលពីសប្តាហ៍កន្លងទៅនេះ ក្រសួងវប្បធម៌ និង​វិចិត្រសិល្បៈ បានប្រកាស​ពីការជ្រើសរើស​សិក្ខាកាម ចូលរួម​ក្នុងការ​បណ្តុះបណ្តាល​ជំនាញវិជ្ជាជីវៈដូនតា សម្រាប់ឆ្នាំ២០២៤ ដែលគ្រោងនឹងចាប់ផ្តើម​ចាប់ពីខែកុម្ភៈ ខាងមុខ។

បើតាម​សេចក្តីប្រកាស​របស់ក្រសួង ការ​បណ្តុះបណ្តាលជំនាញវិជ្ជាជីវៈដូនតា នឹងធ្វើ​ឡើង​នៅទីតាំង​ចំនួន ១៣ ក្នុង៨រាជធានីខេត្ត ដោយធ្វើការ​បណ្តុះបណ្តាល​ទៅលើជំនាញដូចជា ៖ ខ្មុកស្មាច់, ចម្លាក់ប្រាក់/ស្ពាន់, ចម្លាក់ស្បែក, ចម្លាក់ថ្ម, តម្បាញក្រមាត្រុំ, ស្មូនឆ្នាំង, ផលិតឧបករណ៍ភ្លេង, តម្បាញសូត្រ, គំនូរពណ៌, គំនូរបុរាណ និង​ចម្លាក់ស្មិត។

ឯកឧត្តម ស៊ីយ៉ុន សុភារិទ្ធ អគ្គនាយកនៃអគ្គនាយកដ្ឋានបច្ចេកទេសវប្បធម៌ នៃក្រសួងវប្បធម៌ និង​វិចិត្រសិល្បៈ មានប្រសាសន៍ថា សម្រាប់ឆ្នាំ២០២៤នេះ ជាគម្រោងសាកល្បង ក្រសួងនឹងធ្វើការជ្រើសរើស​សិក្ខា​ប្រមាណ ៣០០នាក់​ដើម្បីចូលរៀនជំនាញវិជ្ជាជីវៈដូនតា ដែល​មានរយៈនៃការ​បណ្តុះបណ្តាល​យ៉ាង​ហោចណាស់១ឆ្នាំ។

បើតាម​ប្រសាសន៍បញ្ជាក់របស់ ឯកឧត្តម ស៊ីយ៉ុន សុភារិទ្ធ ការបណ្តុះបណ្តាលជំនាញវិជ្ជាជីវៈដូនតា នឹងត្រូវធ្វើ​ឡើង​នៅ​តាម​សហគមន៍ ជាមួយ​គ្រូនៅតាមសហគមន៍​ដែលមានជំនាញច្បាស់លាស់ ដោយការបង្រៀន​ត្រូវ​ធ្វើ​ឡើង​តាមលក្ខណៈវិទ្យាសាស្រ្ត មានម៉ោង មានកាលវិភាគ មានមេរៀន ដែលក្រុមការងារក្រសួងវប្បធម៌​បានជួយចងក្រង។ ចំណែកសិក្ខាកាមដែលអាចចុះឈ្មោះចូលសិក្សាបាន ជាគោលការណ៍​ត្រូវ​បានកំណត់អាយុពី១៥ឆ្នាំឡើងទៅ ហើយ​ផ្តល់អាទិភាពទៅលើ អ្នក​មក​ពី​គ្រួសារក្រីក្រ, ស្រ្តីមេម៉ាយ, កុមារកំព្រា និង​អ្នក​ដែលមានទេពកោសល្យ ហើយចង់សិក្សា។

គួរជំរាបជូនថា រាជរដ្ឋាភិបាល​កម្ពុជា​កាលពីខែវិច្ឆិកា ឆ្នាំ២០២៣ បានប្រកាស​ពីការ​អនុវត្ត​កម្មវិធីបណ្តុះបណ្តាល​ជំនាញវិជ្ជាជីវៈ និងបច្ចេកទេស ដល់យុវជន​ចំនួន១,៥លាននាក់ មក​ពី​គ្រួសារក្រីក្រ និង​គ្រួសារងាយរងហានិភ័យ ដោយ​ក្នុងនោះយ៉ាងហោចណាស់ ២ ទៅ៤ភាគរយ សម្រាប់​ការ​បណ្តុះបណ្តាល​ជំនាញវិជ្ជាជីវៈដូនតា។

តាមប្រកាស របស់លេខាធិការដ្ឋានបណ្តុះបណ្តាល​ជំនាញវិជ្ជាជីៈដូនតា នៃក្រសួងវប្បធម៌ និង​វិចិត្រសិល្បៈ សម្រាប់សិស្ស​ដែលមក​ពី​គ្រួសារក្រីក្រ មានបណ្ណសមធម៌ និង​គ្រួសារងាយរងហានិភ័យ​ដែលមានបណ្ណគ្រួសារងាយរងហានិភ័យ នឹងទទួលបានប្រាក់​ឧបត្ថម្ភ​ចំនួន ២៨០ ០០០ (ម្ពៃប្រាំបីម៉ឺន) រៀល​ក្នុងមួយខែ តែត្រូវ​បំពេញ​លក្ខខណ្ឌ​សិក្សា​ឱ្យ​បាន​ត្រឹមត្រូវ។

យ៉ាងណាក៏ដោយ ឯកឧត្តម ស៊ីយ៉ុន សុភារិទ្ធ ធ្វើការ​អំពាវនាវ​ដល់ប្រជាពលរដ្ឋ​ខ្មែរទាំងអស់ សូម​ជួយ​គាំទ្រផលិតផលខ្មែរ ផលិតផលធ្វើដោយដៃ​នៅ​ក្នុងស្រុក ដោយ​ការ​គាំទ្រផលិតផលខ្មែរនេះ គឺ​ដូច​ជាការ​គាំទ្រ​ដល់ការ​បណ្តុះបណ្តាល​ជំនាញ​វិជ្ជាជីវៈដូនតាដែរ។ «ជួយគាំទ្រផលិតផលខ្មែរ ផលិតផលដែលផលិតនៅក្នុងស្រុក ហើយ​ធ្វើដោយដៃ… ដូចគាំទ្រជំនាញហ្នឹងដែរ»៕