ក្រោយបញ្ចប់ថ្នាក់ទី៩ ជនជាតិដើមភាគតិច រស់នៅ​ខេត្តរតនគិរីមួយចំនួន ពួកគេមិនបន្តការសិក្សាឡើយ ដោយ​ទៅប្រកបរបរធ្វើចំការ ឬស៊ីឈ្នួលគេវិញ។ សម្រាប់ នួន ដែលជាយុវតីជនជាតិដើមភាគតិចលុន ពេលនេះ នាងកំពុងសិក្សាជំនាញរចនាក្រាហ្វិក នៅមជ្ឈមណ្ឌលបណ្ដុះបណ្ដាលវិជ្ជាជីវៈខេត្តរតនគិរី (PTC) ព្រោះតែចង់មានការងារសមរម្យ និង​ជីវភាពល្អប្រសើរ។

នួន និយាយថា នាងពិតជាសប្បាយចិត្តដែលបានសិក្សាជំនាញរចនាក្រាហ្វិក ដោយកម្មវិធីសិក្សានេះមានរយៈពេលខ្លី ត្រឹមតែ៦ខែនៅ PTC ។ នាងបន្តថា ការចេះជំនាញមួយនេះអាចជួយអោយកញ្ញារួចផុតពីការធ្វើស្រែចំការ ឬស៊ីឈ្នួលធ្វើចំការឱ្យ​គេ។

តែជាមួយគ្នានេះ ការជ្រើសរើសសិក្សាជំនាញរចនាក្រាហ្វិក ក៏មានកត្តាមួយ​ចំនួនផងដែរ ដូចជាការស្រលាញ់ជំនាញនេះផ្ទាល់ ហើយ​ក៏​មើលឃើញថា ជំនាញ​មួយ​នេះអាចឱ្យ​ខ្លួនមានការងារសមរម្យ និងអាចជួយផ្គត់ផ្គង់ជីវភាពគ្រួសារនាថ្ងៃអនាគត។

« ក្រោយសិក្សាបានពីរខែ ខ្ញុំយល់ឃើញថា ជំនាញរចនាក្រាហ្វិក(Graphic Design) នេះពិតជាមានសារៈសំខាន់ខ្លាំងណាស់ ព្រោះបច្ចុប្បន្នជាសម័យបច្ចេកវិទ្យា ចំពោះជំនាញ Graphic Design ទៀតសោតគឺទីផ្សារកាន់តែត្រូវការជាសំខាន់ដូច្នេះហើយនៅពេលដែលខ្ញុំរៀន ខ្ញុំមានអារម្មណ៍ថាសប្បាយចិត្ត និងរីករាយជាខ្លាំង»

កញ្ញា នួន យុវតីជនជាតិ លុន​។

កញ្ញា នួន បានបន្ថែមថា ក្នុងការសិក្សាជំនាញនេះ ក៏មានផលលំបាកមួយចំនួនសម្រាប់នាងផងដែរ ព្រោះនាងបានបោះបង់ការសិក្សាជាច្រើនឆ្នាំ មិនសូវចេះភាសាអង់គ្លេស និងមិនធ្លាប់ប្រើប្រាស់កុំព្យូទ័រពីមុនមក។ ប៉ុន្តែបញ្ហាទាំងអស់នេះមិនបានបង្អាក់ឱ្យ នួន បោះបង់ការសិក្សាជំនាញនេះឡើយ ព្រោះតែកត្តាជីវភាព តម្រូវឱ្យនាងខាតបង់ការសិក្សាម្ដងហើយ ដូចនេះការខិតខំព្យាយាម និងស្វះស្វែងទើបអាចជួយនាងជោគជ័យសម្រាប់ខ្លួនឯង និងជួយមនុស្សក្នុងសហគមន៍បាន។

ជាមួយគ្នានេះ យុវតី នួន ក៏លើកទឹកចិត្តដល់ក្មេងស្រីជនជាតិដើមភាគតិចឯទៀតកុំបញ្ឈប់ ឬបោះបង់ការសិក្សា និងឆាប់រៀបការនៅវ័យកុមារ ព្រោះការដែលមានចំណេះជំនាញដោយខ្លួនឯងនឹងជួយឱ្យ​អ្នកកាន់តែប្រសើរដើម្បីជួយខ្លួន និងគ្រួសារ។

ជាចុងក្រោយ កញ្ញា នួន សូមថ្លែងអំណរគុណដល់អង្គការភ្លែនអន្តរជាតិកម្ពុជា និងភាពជាដៃគូជាមួយក្រសួងការងារ និងបណ្ដុះបណ្ដាលវិជ្ជាជីវៈ ជាពិសេស មជ្ឈមណ្ដលបណ្ដាលវិជ្ជាជីវៈខេត្តរតនគិរីដែលបានគិតគូយកចិត្តទុកដាក់ និងផ្ដល់ឱកាសសិក្សាជំនាញដល់រូបនាង៕