ក្នុងបរិបទពោរពេញដោយភាពមមាញឹកនេះ ដំណើរជីវិតពិតជាមានរឿងរ៉ាវកើតឡើងចម្រុះប្លែកៗ និងបណ្តាលឱ្យថាមពលចុះខ្សោយដោយសារភាពលើសចំណុះ នៃការងារ ឬការគិតច្រើនពេក។ ជាធម្មតា ជីវិតមានឡើងនិងចុះ ហើយបើអ្នកមានអារម្មណ៍បែបនេះជាប្រចាំ ការផ្តោតចំពោះខ្លួនឯង ជាចំណុចសំខាន់មួយដែលត្រូវយកចិត្តទុកដាក់។

យោងតាមគេហទំព័រ verywellmind បានឱ្យដឹងអំពីមូលហេតុដែលនាំឱ្យយើងមានអារម្មណ៍ថា មានរឿងរ៉ាវជុំវិញខ្លួនជាច្រើន បណ្តាលឱ្យចិត្តគិតថា វាមានភាពស្មុគស្មាញ និងពិបាកក្នុងការរស់នៅ។ ជារឿយៗ អ្នកអាចនឹងមានមន្ទិលថា ហេតុអ្វីក៏ជិវិតនេះពិបាកម៉្លេះ? ក្នុងករណីខ្លះ អ្នកថែមទាំងប្រៀបធៀបខ្លួនឯងទៅនឹងមជ្ឈដ្ឋាននានា ជាពិសេសមនុស្សដែលមានវ័យប្រហាក់ប្រហែលគ្នា និងអ្នកដែលមានកម្រិតតស៊ូស្រដៀងៗគ្នា ហើយនៅមានកត្តាជាច្រើនទៀត ដែលនាំឱ្យមនុស្សទទួលបានអារម្មណ៍ដ៏ចាក់កណ្ដាញ់ទាំងនេះ។

តាមរយៈគេហទំព័រដដែល បានឱ្យដឹងបន្ថែមថា យើងគួរតែទទួលស្គាល់ថា ដំណើរជីវិតរបស់មនុស្សម្នាក់ៗ មិនដូចគ្នានោះទេ ដោយគ្រាន់តែមិត្ត ឬមនុស្សក្បែរខ្លួនរបស់អ្នកមិនទាន់ចួបបញ្ហាក្នុងពេលបច្ចុប្បន្ននេះក៏ពិតមែន ប៉ុន្តែគេអាចនឹងជួបបញ្ហានៅពេលខាងមុខ ឬក៏គេកំពុងសំងំដោះស្រាយរឿងរ៉ាវយ៉ាងច្រើនដោយភាពស្ងប់ស្ងាត់ក៏ថាបាន ហើយនៅក្នុងកាលៈទេសៈដទៃទៀត គេមានទំនួលខុសត្រូវជាច្រើនដែលត្រូវបំពេញកាតព្វកិច្ច ។ ដូច្នេះ ការប្រៀបធៀប ខ្សែជីវិតពីបុគ្គលម្នាក់ ទៅបុគ្គលម្នាក់ទៀត វាហាក់ពុំផ្តល់ផលចំណេញអ្វីសោះឡើយ ជាជម្រើសនៃការគិតដែលសមប្រកបបំផុតនោះ គឺ ផ្តោតទៅលើការពង្រឹងគុណភាពជីវិត ឬការស្វែងរកដំណោះស្រាយទៅកាន់ខ្លួនឯង។ បន្ទាប់ពីលោកអ្នកបានដឹងអំពីរឿងរ៉ាវដែលនាំឱ្យមានអារម្មណ៍ថាពិបាកសព្វគ្រប់អស់ហើយ អ្វីដែលត្រូវធ្វើបន្ទាប់នោះ គឺស្វែងរកវិធីបន្ថែមដើម្បីដោះស្រាយនឹងកត្តាប្រឈមទាំងនេះ ដែលមានរៀបរាប់លម្អិតដូច​ខាងក្រោម ៖

១. សម្រាក  ៖ នៅពេលដែលស្ថិតក្នុងស្ថានភាពច្របូកច្របល់អ្វីមួយ អ្នកជំនាញផ្នែកចិត្តសាស្រ្តតែងតែលើកទឹកចិត្តឱ្យផ្តល់ឱកាសទៅកាន់ខ្លួនឯងបានសម្រាកសិន សឹមបន្តអនុវត្តន៍កិច្ចការបន្តទៀត! ការសម្រាក មិនត្រឹមតែជាវិធីដែលយើងគួរតែធ្វើឱ្យបានទៀងទាត់នោះទេ ប៉ុន្តែវាជាភាពចាំបាច់មួយរបស់មនុស្សដែលត្រូវការសម្រាក ឬត្រូវការរក្សាតុល្យភាព ព្រោះវាជាចំណែកមួយជួយពង្រឹងសុខភាពផ្លូវចិត្ត។ នៅពេលខួរក្បាលបានសម្រាកគ្រប់គ្រាន់ នោះគំនិតច្នៃប្រឌិតក៏នឹងលេចឡើងដូចគ្នា រួមទាំងបង្កឱ្យមានភាពស្រស់ស្រាយ នៃការគិតបានមួយកម្រិតទៀត។

២. ទទួលយកជំនួយគាំទ្រពីមជ្ឈដ្ឋានខាងក្រៅ ៖ ការរកជំនួយពីអ្នកមានបទពិសោធន៍ ឬអ្នកជំនាញ ដើម្បីសុំឱ្យផ្តល់ជាយោបល់បន្ថែម គឺជាកត្តាចូលរួមមួយ ដែលជំរុញឱ្យកាត់បន្ថយអារម្មណ៍ពិបាកតានតឹងក្នុងជីវិតរបស់អ្នក ឬកំឡុងពេលស្ថានភាពជីវិតហាក់ធ្លាក់ចុះ សូមកុំនៅម្នាក់ឯងពេក។

៣. អង្កេតអំពីតម្រូវការខ្លួនឯង ៖ នៅពេលដែលលោកអ្នកកំពុងមានភាពជាប់គាំជាមួយនឹងតម្រូវការចាំបាច់ប្រចាំថ្ងៃ នោះការរកជំជួយជាកិច្ចអាទិភាព។ ចំពោះតម្រូវការចាំបាច់ មានដូចជាខ្វះខាតអាហារ ខ្វះសម្លៀកបំពាក់ និងចំណេះជំនាញជាដើម បើស្ថិតក្នុងករណីនេះ ការរកជំនួយពីខាងក្រៅ គឺជារឿងដែលចាំបាច់ត្រូវសុំឱ្យជួយ ឬសុំឱ្យមានការប្រឹក្សា ប៉ុន្តែក្រៅពីការប្រឹក្សាជាមួយបុគ្គលដទៃ អ្វីដែលចាំបាច់បន្ថែមនោះ គឺការសង្កេត និងការផ្ទៀងផ្ទាត់យ៉ាងយកចិត្តទុកដាក់អំពីស្ថានភាពជាក់ស្ដែងនៃដំណើរជីវិតប្រចាំថ្ងៃ។

៤. ធ្វើអ្វីដែលអាចធ្វើបានភ្លាមៗក្នុងពេលបច្ចុប្បន្ន ៖ មានគន្លឹះជាច្រើនដែលជំរុញ និងចូលរួមចំណែកក្នុងការស្ដារស្ថានភាពមិនល្អនៅក្នុងជីវិត មិនថាក្នុងរយៈពេលវែង និងក្នុងរយៈពេលខ្លី។ យ៉ាងណាមិញ ការគិតអំពីអ្វីដែលយើងអាចធ្វើបាននៅពេលបច្ចុប្បន្ននេះ ក៏ជាចំណែកមួយឆ្លើយតបនឹងដំណោះស្រាយនៃការប្រឈមនឹងបញ្ហាទាំងនេះដែរ ។ សកម្មភាពសាមញ្ញៗ និងអ្វីដែលអាចធ្វើបានភ្លាមៗ មានដូចជា ហៅទូរស័ព្ទនិយាយទៅកាន់មនុស្សស្និទ្ធស្នាលណាម្នាក់ ដូចជាមិត្ត សមាជិកគ្រួសារ មនុស្សជាទីស្រឡាញ់ ឬក៏អ្នកចេញទៅក្រៅជួបមនុស្សម្នាដែលអាចជជែកគ្នាលេងបាន ឬញ៉ាំអាហារ ពិសាភេសជ្ជៈ និងសកម្មភាពដទៃទៀត។ ចំពោះសកម្មភាពខ្លះទៀត មិនត្រឹមតែសាមញ្ញនោះទេ ប៉ុន្តែលោកអ្នក មិនចាំបាច់ត្រូវរំខានដល់អ្នកដទៃទៀតផងដែលមានដូចជា ធ្វើលំហាត់ប្រាណ ហាត់យូហ្គា សមាធិ ដោយជារួម គឺប្រព្រឹត្តសកម្មភាពទាំងឡាយណា ដែលជំរុញដល់សុខភាពផ្លូវកាយ និងផ្លូវចិត្តឱ្យរឹងប៉ឹង៕