ខណៈដែលកន្លែងការងារសម័យថ្មី តម្រូវឱ្យអ្នកធ្វើការមានភាពស្វាហាប់ ថាមពល និងគំនិតថ្មីៗ ធ្វើឱ្យបុគ្គលិកជំនាន់ Z (Gen Z) និងបុគ្គលិកវ័យកណ្ដាល មានសម្ពាធ និងបញ្ហាផ្លូវចិត្តកាន់តែច្រើន។ បើយោងតាមការសិក្សាមួយនៅឆ្នាំ២០២២ របស់សាកលវិទ្យាល័យ Harvard បានបង្ហាញថា បុគ្គលិកវ័យក្មេងជាច្រើនមានការពេញចិត្តចំពោះជីវិតខ្លួនឯងទាបជាងបុគ្គលិកស្ថិតក្នុងវ័យផ្សេងទៀត។ យ៉ាងណាមិញ WE Forum បានបង្ហាញវិធីសាស្ត្រសំខាន់ៗចំនួន ៤ ដែលអាចដោះស្រាយបញ្ហានេះបាន ៖

១. ទទួលស្គាល់ពីភាពមមារញឹកនៃជីវិត និងការងារ៖ គំនិតនៃការបង្កើតឱ្យមានតុល្យភាពការងារ និងជីវិតត្រូវបានបុគ្គលិកវ័យក្មេងជាច្រើនចង់បាន។ យ៉ាងណាមិញ ជារឿយៗបញ្ញាតិនេះពិតជាមិនងាយស្រួលអនុវត្តនៅក្នុងជីវិតជាក់ស្ដែងនោះទេ។ ហេតុនេះ ដើម្បីមានផ្លូវចិត្តល្អប្រសើរ បុគ្គលិកត្រូវបើកចិត្តទទួលយកការពិត ថាក្នុងជីវិតការងារគឺមិនអាចមាន តុល្យភាពរវាងការងារ និងជីវិត ស្របទៅតាមអ្វីដែលយើងចង់បាននោះទេ។ ទន្ទឹមនឹងនេះ បុគ្គលិកត្រូវមានសមត្ថភាពគ្រប់គ្រងការងារ និងពេលវេលា មានភាពបត់បែន គំនិតច្នៃប្រឌិត និងឯករាជ្យភាព។ ខណៈបច្ចុប្បន្ន ស្ថាប័នជាច្រើនក៏មានការស្រាវជ្រាវជាបន្តបន្ទាប់ ដើម្បីឈានដល់ការបង្កើតបរិយាកាសការងារអំណោយផលដល់បុគ្គលិក លើកកម្ពស់សុខុមាលភាព និងផលិតភាពការងារជាដើម។

២. សិល្បៈនៃការជ្រើសរើសមិត្តរួមការងារ ៖ សុភាសិតមួយឃ្លាបានលើកឡើងថា ចង់ដឹងថាខ្លួនឯងជាអ្នកណា អ្នកត្រូវសំឡឹងមើលបុគ្គលប្រាំនាក់ ដែលអ្នកបានចំណាយពេលជាមួយច្រើនបំផុត។ សុភាសិតនេះ ក៏អាចយកមកអនុវត្តនៅកន្លែងការងាររបស់អ្នកផងដែរ​​។ ការសេពគប់ និងជ្រើសរើសមិត្តរួមការងារបានត្រឹមត្រូវ នឹងធ្វើឱ្យអ្នកមានមិត្តថ្មីៗ និងអាចជួយបង្ហាត់បង្ហាញការងារអ្នកបានច្រើន។ បើទោះជាយើងម្នាក់ៗមិនអាចគ្រប់គ្រងបរិយាកាសការងាររបស់ខ្លួនបាន ប៉ុន្តែយើងអាចជ្រើសរើសបុគ្គល ដែលយើងអាចវិនិយោគពេលវេលា និងថាមពលជាមួយបាន ព្រោះបុគ្គលដែលអ្នកទាក់ទងអាចក្លាយជា មិត្តភក្តិ អ្នកណែនាំ និងអ្នកលើកទឹកចិត្តយើង។ ដូច្នេះ ពួកគេមានឥទ្ធិពលយ៉ាងខ្លាំងមកលើការគិត សុខុមាលភាព និងសុភមង្គលផ្លូវចិត្តរបស់យើង។

៣. ចំណាយពេលខ្លះលំហែ៖ ការចំណាយពេលខ្លះ ដើម្បីលំហែមិនត្រូវបានគេឱ្យតម្លៃ និងយកចិត្តទុកដាក់នៅក្នុងពិភពការងារដែលចាត់ទុកបុគ្គលិកមានផលិតការងារខ្ពស់ជាជើងឯក និងទទួលស្គាល់តែអ្នកដែលចូលចិត្តធ្វើការងារនោះទេ។ ខណៈការស្រាវជ្រាវមួយបង្ហាញថា មនុស្សវ័យកណ្ដាលត្រឹមតែ ២១ភាគរយប៉ុណ្ណោះ ដែលបានចំណាយពេល ១០ថ្ងៃក្នុងមួយឆ្នាំ ដើម្បីសម្រាក ឬវិស្សមកាល។ យ៉ាងណាមិញ ការចំណាយពេលច្រើន លើសលប់ ដើម្បីធ្វើការក៏មិនមែនជារូបភាពវិជ្ជមាននោះដែរ ព្រោះសកម្មភាពនេះអាចប៉ះពាល់ដល់ទិដ្ឋភាពជាច្រើន នៃជីវិតការងារ។ ទន្ទឹមនឹងនេះ ហានិភ័យដែលត្រូវប្រុងប្រយ័ត្នបំផុតនោះគឺ វិបត្តិ Burn Out ដែលធ្វើឱ្យបុគ្គលិក លែងមានទាំងកម្លាំងកាយ និងកម្លាំងចិត្តធ្វើការ។

ផ្ទុយទៅវិញ នៅក្នុងការសិក្សាបានគូសបញ្ជាក់ថា បុគ្គលដែលបានចំណាយពេលខ្លះ ដើម្បីសម្រាកវិសមកាល គឺមានការពេញចិត្តចំពោះការងាររបស់ខ្លួន និងមានសុខភាពល្អ។ ដូច្នេះ ការចំណាយពេលខ្លះ ដើម្បីសម្រាកគឺជាផ្នែកមួយដ៏សំខាន់ ដើម្បីពង្រឹងសុខភាពទូទៅ និងផលិតភាពការងារ។

៤. បើកចិត្តរៀនសូត្រចំណេះដឹងថ្មីៗ ៖ ការស្រាវជ្រាវបែបវិទ្យាសាស្ត្រជាច្រើនបានគូសបញ្ជាក់ថា បុគ្គលដែលបើកចិត្តរៀនសូត្រចំណេះដឹងថ្មីៗ ជាបុគ្គលដែលមានភាពរីករាយច្រើន និងមានផលិតភាពការងារខ្ពស់។ យ៉ាងណាមិញ គំនិតនេះ គឺជាអាវុធមុខពីរ ព្រោះវាក៏អាចបណ្ដាលបង្កើនភាពតានតឹងដូចគ្នា។ ប៉ុន្តែប្រសិនបើយើងអនុវត្តដោយមានវិធីសាស្ត្រត្រឹមត្រូវ និងទស្សនវិស័យច្បាស់លាស់ សកម្មភាពនេះនឹងក្លាយជាកតាលីករជំរុញឱ្យមានការរីកចម្រើនសមត្ថភាព បង្កើនទំនុកចិត្ត និងធ្វើឱ្យជំនាញទំនាក់ទំនងកាន់តែប្រសើរឡើងផងដែរ៕