ការពង្រឹងសមត្ថភាពផ្ទាល់ខ្លួន ឬអាជីពវិជ្ជាជីវៈ ឬអាចនិយាយបានថា ជាការវិនិយោគចំពោះខ្លួនឯងជារឿងទីមួយ ដែលត្រូវធ្វើ ។ ក្នុងស្ថានភាពខ្លះមនុស្សបានគិតថា ការរកលុយបន្ថែមឱ្យបានច្រើន ឬទិញឡានថ្មី វានឹងជួយឱ្យពួកគាត់មានភាពរីករាយជាងមុន ប៉ុន្តែវាមិនមែនបែបនោះទាំងស្រុងឡើយ។ ជាធម្មជាតិបានបង្កើតឱ្យមនុស្សមានសក្តានុពលទៅធ្វើរឿងរ៉ាវជាច្រើន ហើយនៅពេលដែលលោកអ្នកវិនិយោគចំពោះខ្លួនឯង វាធ្វើឱ្យយើងកាន់តែស្គាល់ខ្លួនឯងបានច្រើនជាងមុនថា អ្នកមានសមត្ថភាពចម្រុះទៅបំពេញរាល់កិច្ចការនានា ទាំងពេលខ្លះនឹកស្មានមិនដល់ក៏មាន។ ការរកឃើញអត្ថន័យជីវិត និងភាពរីករាយក្នុងការរស់នៅប្រចាំថ្ងៃ វាកាន់តែជួយជំរុញគុណភាព នៃការរស់នៅ ហើយ​បើ​តាម​គេហទំព័រ hackspirit បានបង្ហាញ១១គន្លឹះ ដើម្បីវិនិយោគចំពោះខ្លួនឯងឱ្យប្រសើរជាងមុន។

១. រៀនសូត្រជានិរន្ដរ៍ ៖ កុំគ្រាន់តែបញ្ចប់មធ្យមសិក្សាទុតិយភូមិ បរិញ្ញាបត្រ ឬកម្រិតសិក្សាពីសាសាណាមួយភ្លាម ក៏បោះចោលប៊ិកសៀវភៅភ្លាមឱ្យសោះ។ គួររក្សាវាទុកនឹងបន្តរៀនសូត្រជាប្រចាំ តាមរយៈរូបភាពថ្មីៗ ពីព្រោះនៅលើលោកនេះ មានរឿងរ៉ាវច្រើនណាស់ត្រូវសិក្សាស្វែងយល់បន្ថែម ហើយសៀវភៅប៊ិកនេះហើយជាចំណែកជួយទៅដល់ការផ្តោត និងការចងចាំ។ គ្រប់សម័យកាលសុទ្ធតែមានមេរៀនថ្មីៗដែលត្រូវក្រេបជញ្ជក់ ដូច្នេះគួរពង្រីកវិសាលភាពចំណេះដឹង ដើម្បីជួយឱ្យខ្លួនឯងប្រសើរជាងមុន។

សូមកុំភ្លេចអរគុណទៅកាន់ប្រព័ន្ធអនឡាញ ដែលជាកន្លែងអាចឱ្យអ្នកសម្រួចខ្លួនឯង ក៏ដូចជារៀនបានមេរៀនជីវិតជាច្រើនរៀងរាល់ថ្ងៃ។ ហើយក៏ មានរឿងមួយទៀតដែលអ្នកគួរមោទកភាពដែរនោះ គឺ ការរៀនសូត្រពីបទពិសោធន៍ចាស់ៗ ។ ប្រសិនអ្វីដែលអ្នកកំពុងធ្វើប្រចាំថ្ងៃជាកិច្ចការដែលជំរុញដល់ការអភិវឌ្ឍចំណេះដឹង វាគឺជាគុណតម្លៃមួយដែលមិនអាចកាត់ថ្លៃបានក្នុងការធ្វើឱ្យខ្លួនឯងប្រសើរឡើងនាពេលអនាគត។

២. ស្វែងយល់បន្ថែមអំពីជំនាញថ្មីៗ ៖ ពេលខ្លះអ្នកអាចរកឃើញសក្តានុពលនៅក្នុងខ្លួនឯង ដឹងថាខ្លួនឯងមានជំនាញស្រាប់ តែយ៉ាងណាជំនាញដែលមានស្រាប់ពីធម្មជាតិ ឬកំពុងមានបច្ចុប្បន្នមិនប្រាកដថា វានឹងនៅជាតម្រូវការរហូតនោះទេ។ វាតែងតែមានឱកាសថ្មីៗហូរចូលមក ហើយដើម្បីធ្វើឱ្យការងាររបស់អ្នកមានភាពប្រសើរជាងមុន ក៏ដូចជាដើម្បីពង្រឹកសក្តានុពលឱ្យកាន់តែមានភាពលេចធ្លោជាងមុន ការរៀនជំនាញថ្មីៗ គឺជាការបើកឱកាសឱ្យខ្លួនឯង ឬបំពេញបន្ថែមនូវចំណុចដែលខ្វះចន្លោះណាមួយ ។ មួយវិញទៀត កុំរួញរាក្នុងការសាកល្បងថ្នាក់រៀនថ្មីៗបន្ថែម ហើយអ្នកអាចនឹងភ្ញាក់ផ្អើលចំពោះខ្លួនឯង ក៏ថាបាន នៅពេលដឹងថា ខ្លួនងាយសម្រប និងយល់ពីស្ថានការណ៍ថ្មីៗបានលឿន។

៣. បង្កើតគោលដៅផ្ទាល់ខ្លួន ៖ ជាដំបូងត្រូវកំណត់ថា តើនិយមន័យជោគជ័យមានន័យយ៉ាងណាចំពោះខ្លួនឯង? អ្នកនឹងមិនអាចស្គាល់ភាពជោគជ័យបាននោះទេ ដរាបណាមិនបានកំណត់និយមន័យផ្ទាល់ខ្លួនឱ្យបានជាមុនសិន។ ការមានក្ដីស្រមៃធំជារឿងដែលល្អហើយ ប៉ុន្តែការធ្វើទៅតាមស្ថានភាពជាក់ស្តែងជាចំណែកសំខាន់។ ប្រសិនបើគោលដៅពិបាកសម្រេចពេក នោះអារម្មណ៍ខកចិត្តក៏នឹងកើតមាន។

៤. ជ្រើសយកនរណាម្នាក់មកធ្វើជាគំរូ ៖ ការវិនិយាគលើខ្លួនឯង មិនមែនមានន័យថា កុំផ្តោតលើនរណាម្នាក់នោះទេ ក្រឡេកមើលនរណាម្នាក់ ដែលអាចជំរុញឱ្យការបញ្ចេញសមត្ថភាពរបស់អ្នកកាន់តែប្រសើរជាងមុន? ការនៅក្បែរ ឬស្វែងរកមនុស្សដែលធ្វើឱ្យអ្នកមានអារម្មណ៍ថា​ មានថាមពលធ្វើការខ្លាំងជាងមុន អភិវឌ្ឍន៍ខ្លួនឯងល្អជាងមុន ប្រឹងជាងមុន ជាពិសេសនោះគឺមនុស្សដែលធ្វើឱ្យអ្នកមានស្មារតីផុសផុលចង់ប្រសើរជាងមុនជាលំដាប់។ មនុស្សគំរូ ពួកគាត់អាចជាឪពុកម្តាយ គ្រូ រៀមច្បង អ្នករួមអាជីព ឬអ្នកក្បែរខ្លួនដែលផ្តល់នូវសុវត្ថិភាព និងផាសុកភាពជាដើម។ ស្វែងរកចំណុចសំខាន់ដែលអាចរៀនសូត្រពីពួកគាត់ ព្រោះកាលដែលមានជនគំរូ បានធ្វើឱ្យទស្សនៈការគិតវិជ្ជមានកាន់តែកើនឡើង។

៥. ស្គាល់ស្ថានភាពហិរញ្ញវត្ថុផ្ទាល់ខ្លួន ៖ គ្មាននរណាម្នាក់ចង់រស់នៅក្នុងសភាពដែលមានបំណុលជាប់ខ្លួននោះទេ ដែលជាហេតុធ្វើឱ្យចំណេះដឹងខាងហិរញ្ញវត្ថុ កាន់តែមានភាពសំខាន់ក្នុងការពង្រឹងសេរីភាពការរស់នៅ។ នៅពេលដែលអ្នកចេះគ្រប់គ្រងថវិកាផ្ទាល់ខ្លួន នោះវានាំឱ្យអ្នកកាន់តែមា​នភាពឯករាជ្យក្នុងសម្រេចចិត្តលើហិរញ្ញវត្ថុ។

មូលដ្ឋានគ្រឹះចំណេះដឹងហិរញ្ញវត្ថុ ជួយអ្នកឱ្យមានយុទ្ធសាស្រ្តក្នុងការវិនិយោគ ព្រោះមិនមែនប្រាក់ចំណូលគ្រប់ប្រភេទ សុទ្ធសឹងតែពឹងផ្អែកលើការប្រើរយៈពេលវែងទៅធ្វើនោះទេ  ប្រើការខិតខំប្រឹងប្រែងដោយគ្មានភាពឈ្លាសវៃឡើយ ព្រោះនៅពេលខ្លះចំណូលអសកម្ម ធ្វើឱ្យអ្នកអាចទាញចំណូលបានគ្រប់ពេល ដូចជាការវិនិយោគទ្រព្យធនបានត្រឹមត្រូវ។

មួយវិញទៀត ការចេះពីរបៀបសន្សំថវិកា ការកំណត់គោលដៅហិរញ្ញវត្ថុ និងប្រើប្រាស់ធានារ៉ាប់រងដែលឆ្លើយតបនឹងការរស់នៅ ជាវិថីនាំអនាគតឱ្យរស់នៅប្រកបដោយសេរីភាព ឬផាសុកភាព។

៦. សរសេរកំណត់ហេតុជាប្រចាំ ៖ ការបង្ហាញអារម្មណ៍ ឬបង្ហាញកាគិត នៅទីកន្លែងមួយដែលគ្មានការវិនិច្ឆ័យ វាជាការវិនិយោគចំពោះខ្លួនឯងយ៉ាងមានប្រសិទ្ធភាព។ ព្រោះវាជួយឱ្យខួរក្បាលស្រឡះ កាត់បន្ថយស្រ្តេស រួមទាំងអាចគ្រប់គ្រងការថប់បារម្ភ។ ហើយការសេរ កំណត់ហេតុ មិនចាំបាច់មានច្បាប់ទម្លាប់ក្នុងការសរសេរនោះទេ គ្រាន់តែសរសេរអ្វីដែលបានគិត សរសេរតាមអារម្មណ៍ក៏បាន ដែលធ្វើយ៉ាងណាឱ្យបានធូរស្បើយក្នុងចិត្ត។

ការសរសេរចុះអំពីបញ្ហា ក៏អាចឱ្យអ្នករកឃើញអំពីដំណោះស្រាយបានភ្លាមៗផងដែរ។ ហើយនៅពេលដែលអ្នកសរសេរអំពីអារម្មណ៍ ឬក៏ការគិត វាក៏ជាចំណែកនាំឱ្យអ្នកមានកម្លាំងចិត្ត និងការជំរុញចិត្ត។ សរសេរកំណត់ត្រា ប្រៀបដូចជារក្សាកម្លាំងមួយទៅជំរុញអនាគតឱ្យកាន់តែត្រចះត្រចង់។

៧. បង្កើតទំនាក់ទំនងបែបគុណភាពជាមួយខ្លួនឯង ៖ យើងបានចំណាយពេលជាច្រើនទៅបង្កើតទំនាក់ទំនងជាមួយអ្នកដទៃ មិនថាជាដៃគូ គ្រួសារ មិត្តភាព ប៉ុន្តែបែរជាមានពេលតិចតួចណាស់ ដែលចំណាយទៅលើការបង្កើតទំនាក់ទំនងពង្រឹងគុណភាពជាមួយខ្លួនឯង។ ការបង្កើតទំនាក់ទំនងមួយខ្លួនឯងបានល្អ នាំឱ្យការទំនាក់ទំនងជាមួយអ្នកដទៃបានល្អដែរ ហើយការផ្លាស់ប្តូរជីវិតទៅរកភាពវិជ្ជមាន គឺត្រូវការមានទំនាក់ទំនងគ្រប់រូបភាពទាំងអស់មានផាសុកភាព ​មិនថាស្នេហា គ្រួសារ និងការងារ។

៨. ធ្វើលំហាត់ប្រាណឱ្យបានទៀងទាត់ ៖ មនុស្ស មិនមែនបង្កើត ឬកំណត់ឱ្យកើតមកដើម្បីអង្គុយលើកៅអីលើសពីប្រាំបីម៉ោង ជាមួយនឹងកុំព្យូទ័រនោះទេ គឺត្រូវការផ្លាស់ចុះឡើង ស្វែងរកអាហារ និងសម្ភារៈផ្សេងៗមកបំពេញតម្រូវការ។ ការធ្វើសកម្មភាពរាងកាយឱ្យបានទៀងទាត់ គឺជាការណែនាំបែបសកលមួយដើម្បីឱ្យសុខភាពរឹងមាំ និងការរស់នៅប្រសើជាងមុន។ លំហាត់ប្រាណទៀតទាត់ មិនត្រឹមតែ បង្កើនការចងចាំ និងសមត្ថភាពការគិតប៉ុណ្ណោះទេ ប៉ុន្តែជួយឱ្យជៀសចាកពីបញ្ហាសុខភាពនានា។ ហើយការចាប់ផ្តើម គឺពីសកម្មភាពតូចៗទៅ តាមរយៈការដើរ រត់ ឬលោតជាដើម។

៩. បរិភោគអាហារសុខភាព ៖ ចំពោះរបបអាហារដែលមានសុខភាព ដូចជាមិនអាថ៌កំបាំងពេកនោះទេ គឺមានបន្លែបង្ការ សាច់ជាដើម គឺជាចំណែកមិនអាចខ្វះបាន។ ការជ្រើសអាហារល្អសម្រាប់សុខភាព រាងកាយ និងខួក្បាល គឺជាការវិនិយោគចំពោះខ្លួនឯង។

១០. អានបែបសកម្ម ៖ ជាទូទៅយើងសុទ្ធតែបានដឹងថាសៀវភៅគឺជាប្រភពចំណេះដឹងដែលមិនអាចកាត់ថ្លៃបាន។  ហើយការអានវិញ គឺមានច្រើនបែបបទ អានកម្សាន្ត អានយកចំណេះ និងអានកំដរពេលវេលា ជាដើម តែយ៉ាងណាការអានដែលមានភាពសកម្ម គឺជាចំណែកជួយឱ្យបង្កើនសមត្ថភាព និងភាពប្រសើរឡើងនៃចំណេះជំនាញផ្ទាល់ខ្លួន។ អានសកម្ម ជាការជជែក ចរចារ ជាមួយអ្នកនិពន្ធ ចោទជាសំណួរ ហើយមិនបាច់យល់ស្របជាមួយអ្នកនិពន្ធរហូតទេ។ ការមានទម្លាប់អានយ៉ាងសកម្ម ជាកត្តាចំរុញឱ្យបណ្តុះជំនាញគិតបែបត្រិះរិះ មានគំនិតថ្មីៗ និងបង្កើនភាពច្នៃប្រតិដ្ឋជាដើម។

១១. ទុកពេលធ្វើអ្វីមួយៗ និងមានពេលសម្រាក ៖ តុល្យភាពការងារ និងជីវិតបុគ្គល រាងកាយត្រូវការសម្រាក ចំណែកខួរក្បាល ក៏ត្រូវការសម្រាកដូចគ្នា។ នៅពេលដែលអ្នកមិនអាចផ្តោតលើកិច្ចការអ្វីមួយបាន មានការបារម្ភច្រើន នោះសុខភាពនៃរាងកាយក៏ត្រូវការពិនិត្យមើលដូចគ្នា ដើម្បីប៉ះប៉ូវបន្ថែម។ ដូច្នេះ ការដកឃ្លាធ្វើអ្វីមួយ ឬសម្រាកខ្លះ ជាចំណែកក្នុងផ្តល់ថាមពលទៅកាន់ខ្លួនឯងវិញ៕