ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ដើម្បីលើកទឹកចិត្តកុមារឱ្យចេះជ្រើសរើសសៀវភៅ ឬប្រភេទអំណានដោយខ្លួនឯង អាណាព្យាបាលគួរគាំទ្រពួកគេតាមរយៈការឱ្យតម្លៃចំពោះប្រភេទសៀវភៅដែលកុមារជ្រើសរើស។ យោងតាមគេហទំព័រ OXFORDOWL កត្តាដែលអាចបំផុសទឹកចិត្ត និងជាការផ្តល់អំណាចពេញបរិបូរណ៍ទៅកាន់កុមារបាន សូមប្រើប្រាស់គន្លឹះសាមញ្ញ១០ចំណុចក្នុងការយកទៅសាកល្បងអនុវត្តន៍។
១. ជ្រើសពេលដែលល្អ ៖ មានន័យថា គ្រាន់តែប្រើប្រាស់ពេលវេលាខ្លីៗ ចន្លោះពី១៥ ទៅ៣០នាទីក៏បាន ក្នុងការបង្កើតនិងរក្សាទម្លាប់អាន តាមរយៈការអនុញ្ញាតឱ្យកុមារជាអ្នកជ្រើសរើសអានសៀវភៅ ឬអត្ថបទអ្វីក៏បាន និងសង្កេតថា តើពេលណាមានប្រសិទ្ធភាពសម្រាប់កុមារ ហើយអ្វីដែលសំខាន់នោះគឺ ធ្វើយ៉ាងណាឱ្យពួកគេអានបានជាប្រចាំ។
២. អានដោយខ្លួនឯង ៖ បង្ហាញឱ្យកុមារឃើញថា អ្នកក៏មានទម្លាប់អានដូចគ្នា ហើយអានដោយមិនមានសម្ពាធ អានដោយរីករាយ ដោយមិនមែនអានដើម្បីតែបំពេញកាតព្វកិច្ចជាគំរូសម្រាប់កុមារនោះទេ។
៣. អានឱ្យគ្នាស្តាប់ទៅវិញទៅមក ៖ ប្រសិនបើកុមារមិនចង់អានដោយខ្លួនឯងនោះទេ ដូច្នេះគឺបង្កើតបរិយាកាសមួយ គឺអានឱ្យគ្នាស្តាប់ទៅវិញទៅមក។ ប្រសិនបើលោកអ្នកអានមួយទំព័រចប់ សូមទុកឱ្យពួកគេអានមួយទំព័រដែរ ឬក៏អានសាច់រឿងនិងការសន្ទនាណាមួយឱ្យចប់ចុងចប់ដើមតែម្តង។ ហើយដើម្បីអង្រួនចិត្តកុមារឱ្យកាន់តែចង់អាន អាណាព្យាបាលក៏ត្រូវមានសិល្បៈ និងភាពក្លាហានគ្រប់គ្រាន់ទៅអានបែបជាសំឡេងដែលមានភាពខុសប្លែកពីធម្មជាតិនៃខ្លួនឯង ធ្វើយ៉ាងណាបង្កភាពរីករាយ និងភាពខុសប្លែកគ្នា។
៤. ឱ្យតម្លៃចំពោះប្រភេទសៀវភៅដែលកុមារជ្រើសរើស ៖ មូលហេតុដែលយើងត្រូវឱ្យតម្លៃទៅកាន់ការជ្រើសសៀវភៅគ្រប់ប្រភេទរបស់ក្មេងៗ គឺជាការជំរុញទឹកចិត្តក្មេងៗឱ្យមោះមុតជ្រើសអ្វីដែលពួកគេពេញចិត្ត ហើយរាល់សៀវភៅនីមួយៗ គឺតែងតែបង្កប់នូវគុណតម្លៃរបស់វា គ្រាន់តែមានលក្ខណៈខុសគ្នា។
៥. កំណត់កត្តាប្រឈម និងការរំពឹងទុក ៖ មុនពេលកុមារឈានផុតអាយុ១០ឆ្នាំ តើកូន ឬក្មេងក្នុងបន្ទុករបស់អ្នកអាចអានបញ្ចប់សៀវភៅបានយ៉ាងច្រើនប៉ុន្មានក្បាលដែរ ? តើប្រភេទសៀវភៅដែលពួកគេអាចអានបានមានប្រភេទអ្វីខ្លះ? មិនថា សៀវភៅកម្សាន្ត ចំណេះទូទៅ ព័ត៌មាន កំប្លែង វិទ្យាសាស្ត្រ វប្បធម៌ឬបុរាណ ឬសៀវភៅផ្សេងៗទៀតនោះទេ អាណាព្យាបាលត្រូវដឹងអំពីប្រភេទសៀវភៅ និងកម្រិតនៃការអានរបស់ក្មេងៗ។
៦. អានជាមួយបងប្អូនដែលមានវ័យស្របាលគ្នា ៖ មិនថា អានជាមួយកូនបង ឬកូនប្អូននោះទេ ឱ្យតែមានសមាជិកក្នុងផ្ទះដែលមានវ័យប្រហាក់ប្រហែកគ្នាក្នុងការកំដរគ្នាអាន គឺជាចំណែកដើម្បីពង្រឹងទៅដល់ការកសាងទំនុកចិត្ត ភាពកក់ក្តៅ រួមទាំងបង្កើនជំនាញទំនាក់ទំនងយ៉ាងសំខាន់ក្នុងគ្រួសារ។
៧. សៀវភៅសំឡេង ៖ ការអនុញ្ញាតឱ្យកុមារទទួលបានបទពិសោធន៍នៃការពង្រឹងស្មារតីតាមរយៈការស្តាប់សៀវភៅជាសម្លេង ឬការជ្រើសរើសដោយខ្លួនឯង វាឆ្លើយតបនឹងកម្រិតសមត្ថភាពរបស់ពួកគេ ហើយក៏ផ្តល់ភាពងាយស្រួលក្នុងការចែករំលែកសៀវភៅ ចំពោះគ្នាទៅវិញទៅមក ដែលជាដំណើរមួយមានភាពទំនើបនិងងាយស្រួល។ ការស្តាប់ទៅកាន់សាច់រឿងម្តងហើយម្តងទៀត ធ្វើឱ្យកុមារវិវឌ្ឍន៍នូវការប្រើប្រាស់ពាក្យពេចន៍ និងយល់ដឹងកាន់តែស៊ីជម្រៅទៅៗ ចំពោះអំណាន។
៨. អានក្នុងកម្មវិធីប្រកួត ឬកម្មវិធីសប្បុរសធម៌ ៖ ការជំរុញ ឬនាំកុមារឱ្យចូលរួមក្នុងព្រឹត្តិកាណ៍ណាមួយដើម្បីរៃអង្គាសថវិកា ឬក៏ការប្រកួតប្រជែងគ្នាជាក្រុម ដើម្បីបណ្តុះភាពក្លាហាន និងស្មារតីក្នុងការអាន។
៩. ប្រើប្រាស់ផ្ទាំងទស្សនីយភាព ៖ ប្រើប្រាស់ប្រភេទកម្មវិធីវីដេអូ ដែលពាក់ព័ន្ធនឹងការអាន ឬក៏រឿងកុនទាំងឡាយណាដែលមានផ្ទាំងទស្សនីយភាពនាំផ្លូវកុមារឱ្យខិតទៅរកការអាន គឺជាចំណែកមួយជួយឱ្យពួកគេរកឃើញសៀវភៅដែលខ្លួនពេញចិត្ត ។
១០. នាំកុមារចូលរួមក្លឹបសៀវភៅ ៖ បង្រៀនកុមារឱ្យស្រឡាញ់ការអាន និងចេះជ្រើសអ្វីដែលគេចង់បាន គឺចាំបាច់ណាស់ក្នុងការនាំកុមារឱ្យចូលរួមក្លឹបសៀវភៅទាំងក្នុងតំបន់ដែលខ្លួនរស់នៅ និងក្រៅតំបន់ ពីព្រោះវាជាកត្តាក្នុងការនាំស្មារតីកុមារភ្ជាប់ទៅនឹងសៀវភៅ៕
