ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
សីតុណ្ហភាពកើនឡើងខ្ពស់ បានបង្ករជាផលប៉ះពាល់ដល់សុខភាពមនុស្សជាច្រើន ជាពិសេស មនុស្សចាស់ ទារក ស្ត្រីមានផ្ទៃពោះ អ្នកមានជំងឺប្រចាំកាយ អត្តពលិក អ្នកធ្វើការក្រៅការិយាល័យ និងជនគ្មានទីជម្រក។ កម្ដៅអាចបណ្ដាលឱ្យអស់កម្លាំង ឬដាច់សរសៃឈាមខួរក្បាល និងធ្វើឱ្យស្ថានភាពជំងឺ ដែលមានស្រាប់កាន់តែធ្ងន់ធ្ងរ ដែលជំងឺទាំងនោះមានដូចជា ជំងឺសរសៃឈាមបេះដូង ជំងឺផ្លូវដង្ហើម ជំងឺតម្រងនោម និងបញ្ហាសុខភាពផ្លូវចិត្ត។
យោងតាមការវិភាគថ្មីមួយដោយអង្គការមិនរកប្រាក់ចំណេញ Climate Central នៅឆ្នាំ ២០២៣ រកឃើញថា មនុស្សជាង ៣,៨ ពាន់លាននាក់ ត្រូវរងផលប៉ះពាល់ដោយសាររលកកម្ដៅខ្ពស់ ដោយសារការប្រែប្រួលអាកាសធាតុ ដែលចេះតែប្រែប្រួលពីមួយឆ្នាំទៅមួយឆ្នាំ។ ឥទ្ធិពលនេះ បង្ករផលប៉ះពាល់ ទាំងផ្លូវកាយ និងផ្លូវចិត្ត។
ការស្រាវជ្រាវជាច្រើនបានបង្ហាញថា កម្ដៅអាចបណ្ដាលឱ្យអ្នកមានបញ្ហាដាច់សរសៃឈាមខួរក្បាល និងខ្សោះជាតិទឹកក្នុងខ្លួន ហើយបញ្ហាខ្សោះជាតិទឹក អាចមានឥទ្ធិពលដល់សុខភាពផ្លូវចិត្ត ដែលអាចធ្វើឱ្យអ្នកមានអារម្មណ៍ស្ត្រេស និងថប់បារម្ភ។
យោងតាម CNBC បានបង្ហាញអំពីសញ្ញា ៦ ដែលបញ្ជាក់ថា កម្ដៅកំពុងតែធ្វើឱ្យអ្នកមានបញ្ហាផ្លូវចិត្ត ដែលរោគសញ្ញាទាំងនោះមានដូចជា ១. ការកើនឡើងបញ្ហាស្ត្រេស, ២. មានវិបត្តិដំណេក (insomnia), ៣. ភាពអស់កម្លាំង (Fatigue), ៤. ឆាប់ខឹង, ៥. មានអារម្មណ៍ខកចិត្ត និងខូចចិត្តគ្មានមូលហេតុច្បាស់លាស់, និងទី៦ ពិបាកផ្ចង់ និងផ្ដោតអារម្មណ៍។
ទន្ទឹមនឹងនេះ មានវិធីសាស្ត្រមួយចំនួន ដែលអាចជួយអ្នកទប់ទល់នឹង បញ្ហាផ្លូវចិត្តនៅរដូវក្ដៅ ក្នុងនោះមានសកម្មភាពសំខាន់ៗមួយចំនួនដូចជា បរិភោគទឹកគ្រប់គ្រាន់, ជៀសវៀងការទៅកន្លែងមានកម្ដៅក្ដៅខ្លាំង, ឆ្លៀតសម្រាក ប្រសិនបើអ្នកធ្វើការក្នុងការិយាល័យ, ភ្ជាប់ទំនាក់ទំនងជាមួយមនុស្សជាទីស្រឡាញ់, ជៀសវាងការតាមដានព័ត៌មានមិនពិតអំពីអាកាសធាតុ, ធ្វើសកម្មភាព ដែលអ្នកចូលចិត្ត ដើម្បីកម្សាន្ត និងសម្រាកអារម្មណ៍, ចេញក្រៅផ្ទះ ដើម្បីភ្ជាប់ខ្លួនជាមួយធម្មជាតិ, ញ៉ាំអាហារ ដែលមានសារធាតុចិញ្ចឹម និងពិគ្រោះជាមួយអ្នកជំនាញផ្លូវចិត្ត ប្រសិនបើអ្នកកត់សម្គាល់ឃើញថា អាកាសធាតុមានឥទ្ធិពលខ្លាំងមកលើផ្លូវចិត្តរបស់អ្នក៕
