ក្នុងឱកាសនៃការប្រារព្ធពិធី អបអរសាទរ ខួបលើកទី១១៣ ទិវាអន្តរជាតិនារី ៨ មីនា ២០២៤ ក្រោមមូលបទ “ស្រ្តី  និងក្មេងស្រីក្នុងបរិវត្តកម្មឌីជីថល” និងជួបសំណេះសំណាលជាមួយសាខាសមាគមនារីកម្ពុជាដើម្បីសន្តិភាព និងអភិវឌ្ឍន៍ក្រសួងអប់រំ យុវជន និងកីឡា សម្តេចកិត្តិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រនៃព្រះរាជាណាចក្រកម្ពុជា បានបង្ហាញការគាំទ្រដល់ក្លឹបសរសេរកូដជាស្រ្តីដំបូងនៅកម្ពុជាដែលបានលេចចេញជារូបរាងឡើង ស្របទៅនឹងការវិវឌ្ឍន៍បច្ចេកវិទ្យានាសម័យបច្ចុប្បន្ន។

សម្តេចកិត្តិសង្គហបណ្ឌិត ម៉ែន សំអន មានប្រសាសន៍ថា រាជរដ្ឋាភិបាលកម្ពុជា កំពុងជំរុញឱ្យមានការលើកកម្ពស់ការចូលរួមរបស់ស្ត្រីនៅក្នុងគ្រប់វិស័យ រួមទាំងការបង្កើនកាលានុវត្តភាពក្នុងការទទួលបាននូវចំណេះដឹង ជំនាញផ្សេងៗ។ ជាលទ្ធផលការចូលរួមរបស់ស្រ្តីទៅក្នុងវិស័យនយោបាយ កិច្ចការសង្គម​ និងសេវាសាធារណៈមានការកើនឡើងជាលំដាប់ពីមួយឆ្នាំទៅមួយឆ្នាំទាំងបរិមាណ និងគុណភាព។

ក្នុងឱកាសនោះ ឯកឧត្ដមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី  រដ្ឋមន្ត្រីក្រសួងអប់រំ  យុវជន  និងកីឡា មានប្រសាសន៍ផងដែរថា  នាពេលបច្ចុប្បន្ននេះ ពិភពលោកកំពុងបោះជំហានចូលទៅក្នុងបដិវត្តន៍ឧស្សាហកម្មជំនាន់ទី៤ ដែលបង្កើតឡើងដោយបរិវត្តកម្មឌីជីថល និងបច្ចេកវិទ្យា ដែលគ្របដណ្តប់លើវិស័យជាច្រើន ជាពិសេសបញ្ញាសិប្បនិម្មិត (AI) មនុស្សយន្ត រថយន្តគ្មានមនុស្សបើក និងបច្ចេកវិទ្យាទំនាក់ទំនង។ល។ ដូចនេះ យើងត្រូវត្រៀមខ្លួនឱ្យបានល្អ ដើម្បីទាញយកអត្ថប្រយោជន៍ជាអតិបរិមាពីការរីកចម្រើនយ៉ាងឆាប់រហ័សផ្នែកបច្ចេកវិទ្យា និងឌីជីថលូបនីយកម្មទាំងក្នុងប្រទេស តំបន់ និងសកល។

រដ្ឋមន្ត្រីក្រសួងអប់រំ បញ្ជាក់បន្ថែមថា ការកសាងសមត្ថភាព និងការបង្កើនភាពអង់អាចរបស់ស្ត្រី និងក្មេងស្រី តាមរយៈការអប់រំ គឺជាមូលដ្ឋានគ្រឹះនៃការលុបបំបាត់ភាពរើសអើង និងអំពើហិង្សាក្នុងគ្រួសារ ការលើកកម្ពស់និរន្តរភាពសេដ្ឋកិច្ចគ្រួសារ សុខភាពមាតានិងទារក សហគ្រិនភាពស្ត្រី និងភាពច្នៃប្រឌិតឆ្ពោះទៅសម្រេចបានសមភាពយេនឌ័រក្នុងសង្គម និងសិទ្ធិពេញលេញក្នុងការចូលរួមអភិវឌ្ឍជាតិលើគ្រប់វិស័យប្រកបដោយប្រសិទ្ធភាព គុណភាព និងចីរភាព។

សូមបញ្ជាក់ដែរថា នៅក្នុងកម្មវិធីនោះ ក៏មានការតាំងពិព័រណ៍ឌីជីថល ដែលបង្ហាញជូនដោយក្រុមសិស្សានុសិស្សនារី  ដែលមកពីសាលាបឋមសិក្សាវត្តបូព៌ អនុវិទ្យាល័យអរញ្ញរង្សី វិទ្យាល័យពាមជីកង  និងក្រុម  Sister of code បានដាក់តាំងពិព័រណ៍។ ប្អូនៗកុមារីបានរៀនពីរបៀបបង្កើតកម្មវិធីទូរសព្ទដៃ  ដើម្បីឈានទៅដោះស្រាយបញ្ហាកើតមានជាក់ស្តែងក្នុងសហគមន៍។

គួរជម្រាបជូនថា បើយោងតាមគេហទំព័រ R&D World គិតត្រឹមឆ្នាំ២០១៩ ការលើកកម្ពស់ការចូលរួមរបស់ស្រ្តីនៅក្នុងវិស័យវិទ្យាសាស្រ្ត, បច្ចេកវិទ្យា, វិស្វកម្ម និងគណិតវិទ្យា (STEM) បានជួយឱ្យមានការកើនឡើងនៃផលិតផលក្នុងស្រុកសរុបសម្រាប់មនុស្សម្នាក់ (GDP per capita) ក្នុងចន្លោះប្រមាណពី ២,២% ទៅ ៣% នៅសហភាពអ៊ឺរ៉ុប៕