ភ្នំពេញ – វិទ្យស្ថាន N-Tech International ប្រកាសជ្រើសរើសនិស្សិតសិក្សាអាហារូបករណ៍ថ្នាក់បរិញ្ញាបត្ររងចំនួន៤០កន្លែង នៅប្រទេសថៃឆ្នាំសិក្សា២០២៣-២០២៤ ។ អាហារូបករណ៍ផ្ដល់ជូនជំនាញ គណនេយ្យ កុំព្យូទ័រធុរកិច្ច និងភាសាអង់គ្លេស ។

លក្ខខណ្ឌដែលបេក្ខជនចង់ស្នើពាក្យអាហារូបករណ៍មានដូចជា មានសញ្ជាតិខ្មែរ អាយុចន្លោះពី១៩-២៥ឆ្នាំ  មានសញ្ញាបត្រមធ្យមសិក្សាទុតិយភូមិ ឬសញ្ញាបត្របច្ចេកទេសនិងវិជ្ជាជីវៈកម្រិត៣ មានលទ្ធផលសិក្សាដែលមានមធ្យមភាគមិនតិចជាង ២.៤ ឬសមមូល ។ ជាមួយគ្នានេះ ជាបុគ្គលដែលមានអាកប្បកិរិយាល្អ មិនមានប្រវត្តិប្រព្រឹត្តទោសកំហុសបទឧក្រិដ្ឋ មានសុខភាពល្អបរិបូរណ៌ទាំងកាយសម្បទា និងស្មារតី ។

ឯកសារចាំបាប់ដែលបេក្ខជនត្រូវបំពេញនឹងភ្ជាប់ជាមួយរួមមាន បង្កាន់ដៃទទួលពាក្យប្រឡង ១ច្បាប់ ពាក្យសុំអាហារូបករណ៍ ១ច្បាប់ ជីវប្រវត្តិសង្ខេប ១ច្បាប់ រូបថត៤គុណ៦ ៤សន្លឹក(ផ្ទៃខាងកក្រោយពណ៌ស ថតថ្មី) ។ លើសពីនេះ ច្បាប់ថតចម្លងនៃសញ្ញាបត្រមធ្យមសិក្សាទុតិយភូមិ ឬសញ្ញាបត្របច្ចេកទេសនិងវិជ្ជាជីវៈកម្រិត៣ ចំនួន១ច្បាប់ (ភ្ជាប់មកជាមួយច្បាប់ដើម) លិខិតបញ្ជាក់ពីគ្រឹះស្ថានសិក្សា(ចំពោះបេក្ខជនជានិស្សិត) និងលិខិតបញ្ជាក់ពីអង្គភាព(ចំពោះមន្ត្រីរាជការ) ។

អាហារូបករណ៍ចាប់បើក និងផ្ដល់ពាក្យពីថ្ងៃទី២៧ ខែមីនា ឆ្នាំ២០២៣ នៅការិយាល័យអាហារូបករណ៍ និងកម្មសិក្សានៃនាយកដ្ឋានទំនាក់ទំនងវប្បធម៌ និងអាហារូបករណ៍ដែលមានអាសយដ្ឋាន អគារលេខ២៣ ផ្លូវលេខ៣៦០ សង្កាត់បឹងកេងកង១ ខណ្ឌបឹងកេងកង រាជធានីភ្នំពេញ ។

ភាគីអាហារូបករណ៍នឹងគាំទ្រលើថ្លៃសិក្សា ការស្នាក់នៅ និងសម្រាប់ចំណាយជាប្រាក់អាហារូបករណ៍ប្រចាំខែ ។ សម្រាប់ព័ត៌មានបន្ថែមអាចចូលទៅកាន់ ៖

https://www.facebook.com/moeys.gov.kh/posts/pfbid031uryzTKWS2wDFCLSDtNVK1hbXeDf4Sw5wGX31qaQNdTt4tCXLvvDZm5fZ5xHktZml ៕