ភ្នំពេញ – បើយោង​តាម​ការ​ជូនដំណឹងរបស់ក្រសួងធនធានទឹក និង​ឧតុនិយម រដូវប្រាំងឆ្នាំ​២០២៣នេះ នឹងអូសបន្លាយ​ដល់សប្តាហ៍​ទី២ នៃខែឧសភា ខណៈតាមការជូនដំណឹងជាសកលស្តីពីស្ថានភាព​សីតុណ្ហភាពបានបង្ហាញថា នៅ​ក្នុងឆ្នាំ​២០២៣នេះ ចាប់ពីខែឧសភា រហូត​ដល់ខែសីហា ព្រះរាជាណាចក្រ​កម្ពុជា ទទួលរងនូវ​ឥទ្ធិពល​ពីបាតុភូត​អែលនីណូ ក្តៅ មានរហូត​ដល់​៦០ភាគរយ និង​បាតុភូតអែនសូ មាន ៤០ភាគរយ ហើយ​ចាប់ពី​ខែកញ្ញាដល់​ខែវិច្ឆិកា បាតុភូតអែលនីណូ អាចនឹង​កើន​ឡើង​ដល់​៧០ភាគរយ ទៅ​៨០ភាគរយ និង​បាតុភូតអែនសូ (Neutral) ថយមក​នៅ​ ២០ភាគរយ ទៅ​៣០ភាគរយ។

ខណៈអាកាសធាតុក្តៅនេះ ​ដើម្បីការពារសុខភាពផ្ទាល់ខ្លួន និងក្រុមគ្រួសារលោកអ្នកឱ្យបានល្អ និងចៀសផុតពីបញ្ហាសុខភាពដែលអាចកើតមានជាយថាហេតុ ក្រសួងសុខាភិបាលបានណែនាំដល់ប្រជាពលរដ្ឋទូទាំងអស់ ជាពិសេសប្រជាជនដែលរស់នៅតាមតំបន់ដែលមានអាកាសធាតុក្តៅខ្លាំងអនុវត្ត ចំនួន៦ចំណុច រួមមាន៖

១. ត្រូវរក្សាជាតិទឹកនៅក្នុងរាង្គកាយឱ្យបានគ្រប់គ្រាន់ ដោយពិសារទឹកសុទ្ធ ទឹកស្អាតល្អ (ឬទឹកដាំពុះតែទុកឱ្យត្រជាក់ចៀសវាងប្រើទឹកក្ដៅ) ឬទឹកច្រោះល្អ ឱ្យបានច្រើន និងញឹកញាប់ លើសពី ២លីត្រ ក្នុងមួយថ្ងៃ បើទោះបីជាអ្នកមិនមានអារម្មណ៍ស្រេកទឹកក៏ដោយ។ ចៀសវាងការរាគរូស និងជំងឺផ្សេងៗ ដោយរក្សាអនាម័យខ្លួនប្រាណ និងអនាម័យចំណីអាហារល្អផងដែរ។ លើសពីនេះ ចៀសវាងការពិសារភេសជ្ជៈដែលបណ្ដាលឱ្យជាតិទឹកនៅក្នុងរាងកាយថយចុះ មានដូចជា ពិសារគ្រឿងស្រវឹង ឬជាតិអាល់កុល កាហ្វេ តែ ភេសជ្ជៈដែលមានជាតិកាហ្វេអ៊ីន និងមានជាតិស្ករ។

២. ស្លៀកសម្លៀកបំពាក់ជួយការពារកំដៅ និងការពារការរលាកស្បែកដោយពន្លឺព្រះអាទិត្យ ដូចជាស្លៀកសម្លៀកបំពាក់រលុង ស្រាល មានពណ៌ស្រាល អាចប្រើឡេលាបស្បែកការពារកំដៅថ្ងៃជាជំនួយ និងពាក់មួកដែលមានគែមធំទូលាយ ឬប្រើឆ័ត្រ ធ្វើជារបាំងការពារកម្ដៅថ្ងៃ ហើយឱស្សាហ៍ផ្លាស់ប្តូរសម្លៀកបំពាក់ ប្រសិនបើវាសើមខ្លាំង។ ចៀសវាងការស្លៀកពាក់ឱ្យទារក ឬកុមារតូចៗ នូវសម្លៀកបំពាក់ក្រាស់ៗពេក ឬរុំពួកគេក្នុងភួយធ្វើឱ្យមានកំដៅឡើងបន្ថែម។

៣. ងូតទឹកត្រជាក់ ឬទឹកធម្មតាឱ្យបានញឹកញាប់ ប៉ុន្តែត្រូវជៀសវាងការធ្វើឱ្យមានការផ្លាស់ប្តូរសីតុណ្ហភាពខ្លាំង គឺចៀសវាងការងូតទឹកត្រជាក់ភ្លាមៗ បន្ទាប់ពីត្រឡប់មកពីសីតុណ្ហភាពក្ដៅ ដែលអាចបណ្តាលឱ្យមានការថយចុះកំដៅហួសនិងអាចមានគ្រោះថ្នាក់ ជាពិសេសចំពោះមនុស្សវ័យចាស់ ឬកុមារ។

៤. ចំណាយពេលសម្រាក និងជ្រកនៅកន្លែងដែលមានម្លប់ កន្លែងដែលត្រជាក់ ឬម៉ាស៊ីនត្រជាក់ ឬស្នាក់នៅក្នុងផ្ទះ ឬទីតាំងដែលត្រជាក់ តាមដែលអាចធ្វើទៅបាន លុះត្រាតែអ្នកប្រាកដថា រាង្គកាយរបស់លោកអ្នក មានភាពធន់ខ្ពស់អាចទប់ទល់ចំពោះកំដៅក្នុងកម្រិតណាមួយ។ ពឹងផ្អែកតែលើកង្ហារជាឧបករណ៍ធ្វើឱ្យត្រជាក់ជាចម្បងរបស់លោកអ្នក អំឡុងពេលមានកំដៅខ្លាំង ត្រូវប្រើមធ្យោបាយផ្សេងៗ ដើម្បីបន្ថយកំដៅ។

៥. សមាជិកគ្រួសារ ត្រូវឧស្សាហ៍តាមដាន និងត្រួតពិនិត្យមើលឱ្យបានញឹកញាប់ លើអ្នកងាយរងគ្រោះដោយសារអាកាសធាតុក្តៅ រួមមាន មនុស្សវ័យចាស់អាយុចាប់ពី៦៥ឆ្នាំឡើង អ្នកកំពុងមានជំងឺ កុមារអាយុតិចជាង ៥ឆ្នាំ អ្នកមានជំងឺរ៉ាំរ៉ៃ និងអ្នកមានជំងឺផ្លូវចិត្ត ពីព្រោះពួកគេអាចត្រូវការជំនួយយ៉ាងតិចណាស់ ២ដងក្នុងមួយថ្ងៃក្នុងអំឡុងពេលអាកាសធាតុក្តៅ សូមកុំទុកពួកគាត់ចោលដោយមិនបានអើតមើលពួកគាត់។

៦. ប្រសិនបើមានរោគសញ្ញាដូចជា វិលមុខ ចង្អោរ ឬក្អួត ឈឺក្បាល រមួលសាច់ដុំ (រមួលក្រពើ) ជាដំបូងនៃផលប៉ះពាល់នៃកំដៅ ត្រូវផ្លាស់ទីទៅកាន់កន្លែងត្រជាក់ ត្រូវសម្រាកពី ២-៥នាទី ហើយពិសារទឹកត្រជាក់យឺតៗ កុំបន្តសកម្មភាពពីព្រោះអាចមានហានិភ័យខ្ពស់។ ចៀសវាងដាច់ខាតនូវការចោមរោមជុំជិតអ្នកដែលមានបញ្ហាសុខភាពត្រូវស្វែងរកការព្យាបាលភ្លាមៗ ប្រសិនបើអ្នកមិនមានអារម្មណ៍ធូរស្រាល។

គួរ​បញ្ជាក់ថា បើយោង​តាមអង្គការសុខភាពពិភពលោក ករណីកំដៅក្ដៅខ្លាំងពេក គឺអាចធ្វើឱ្យប៉ះពាល់សុខភាព ដោយ​ធ្វើឱ្យឈឺ និងអាចស្លាប់បាន។ បុគ្គលអាចធ្លាក់ខ្លួនឈឺដោយសារទទួលរងនូវកំដៅខ្លាំងពេក ប្រសិនបើរាងកាយមិនអាចទប់ទល់បាន និងប្រសិនបើអ្នកមិនបានធ្វើឱ្យខ្លួនប្រាណត្រជាក់បានត្រឹមត្រូវទាន់ពេលវេលា។ ក្នុងនោះ បុគ្គលដែលប្រឈមខ្លាំង គឺមានអាយុតិច និងមនុស្សចាស់ បុគ្គលធាត់ មានជំងឺបេះដូង ជំងឺផ្លូវចិត្ត និងបុគ្គលដែល​ប្រើប្រាស់គ្រឿងស្រវឹងជាដើម។

តាមឯកសាររបស់អង្គការសុខភាពពិភពលោក យ៉ាងហោចណាស់ក៏មានមនុស្ស ១ម៉ឺន៥ពាន់នាក់ បានស្លាប់ដោយសារអាកាសធាតុក្ដៅពេកនៅអឺរ៉ុបនៅក្នុងឆ្នាំ២០២២កន្លងទៅនេះ៕