ភ្នំពេញ – បន្ទាប់ពីការឈប់សម្រាកដ៏យូរក្នុងអំឡុងចូលឆ្នាំខ្មែរកន្លងទៅនេះ មនុស្សជាច្រើនមានទំនោរទៅរកភាពខ្ជិលដែលធ្វើឱ្យខ្លួនឯងគ្មានកម្លាំង អស់ថាមពល និងមានអារម្មណ៍ថាដូចមិនចង់ធ្វើការ។ ជាពិសេសនៅពេលដែលនឹកឃើញដល់ថ្ងៃចូលធ្វើការ និងថ្ងៃចូលរៀន ហើយចង់តែបន្តការឈប់សម្រាកបន្ថែមទៀត។ អ្នកស្រី គីម ស៊ីដដាវីស គ្រូបង្រៀនមុខវិជ្ជាជំនាញនៃការគ្រប់គ្រង នៅសាកលវិទ្យាល័យភូមិន្ទភ្នំពេញ និយាយថា តាមពិតទៅវាមិនមែនជារឿងចម្លែកទេ បើសិនជាបងប្អូនមានអារម្មណ៍បែបនេះ ហើយក៏មិនបាច់បារម្ភដែរព្រោះវាកើតក្នុងរយៈពេលខ្លីទេ ក៏ប៉ុន្តែ​ក៏មិនគួរទុក​រោគសញ្ញា​នេះ​ឱ្យ​យូរពេកដែរ ព្រោះវាអាចធ្វើឱ្យយើងមានអារម្មណ៍ក្រៀមក្រំ ធុញថប់ គ្មានថាមពលដើម្បីធ្វើការ និងរៀនសូត្រ ដែលអាចធ្វើឱ្យប៉ះពាល់ដល់ប្រសិទ្ធិភាពការងារ និងការសិក្សារបស់យើងទាំងអស់គ្នា។

ខាងក្រោមនេះ ជាគន្លឹះមួយចំនួនបង្កើតថាមពលកម្ចាត់ភាពខ្ជិលច្រអូសក្រោយពេលឈប់សម្រាក ដោយរួមមាន៖

ទី១- ផ្តល់ថាមពលដល់រាងកាយ ៖ ក្នុងអំឡុងពេលឈប់សម្រាកដ៏យូរនេះ មិន​ថា​ចេញ​ទៅ​ដើរ​លេង ទៅស្រុកកំណើត ជប់លៀង​ជាមួយ​មិត្តភ័ក្ដិ ឬសម្រាកនៅផ្ទះជួបជុំគ្រួសារនោះទេ ទោះបីជាវាល្អសម្រាប់ផ្លូវចិត្តយើងក៏ដោយ ក៏ប៉ុន្តែវាអាចធ្វើឱ្យរាងកាយរបស់យើងនឿយហត់ ដូច្នេះហើយ១ឬ២ថ្ងៃមុនពេលចាប់ផ្តើមការងារ យើងគួរតែហាត់ប្រាណស្រាលៗ ដើម្បីជំរុញដំណើរការនៃប្រព័ន្ធផ្សេងៗក្នុងរាងកាយរបស់យើងឱ្យរស់រវើកវិញ។ លើសពីនេះ ញ៉ាំអាហារឱ្យគ្រប់ទាំង ៥ក្រុម ហើយចូលគេងឱ្យលឿន ដើម្បីសម្រាកឱ្យបានពេញលេញ ដើម្បីផ្តល់នូវថាមពលសម្រាប់ថ្ងៃយើងចាប់ផ្តើមធ្វើការ។

ទី២- ត្រៀមលក្ខណៈមុនចូលធ្វើការ ៖ ដើម្បីចាប់ផ្តើមថ្ងៃធ្វើការដំបូងក្រោយពេលឈប់សម្រាកឱ្យបានល្អ និងមិនឱ្យរញ៉េរញ៉ៃ យើងត្រូវតែត្រៀមលក្ខណៈឱ្យគ្រប់ជ្រុងជ្រោយ មិនថាសម្ភារៈធ្វើការ សម្លៀកបំពាក់ដែលត្រូវស្លៀកពាក់ទៅធ្វើការ ម្ហូបអាហារដែលត្រូវញ៉ាំពេលព្រឹក ឬអាហារដែលយើងត្រូវខ្ចប់ទៅជាដើម គ្រប់យ៉ាងត្រូវតែត្រៀមទុកឱ្យរួចជាស្រេច។

ទី៣- សម្អាតតុធ្វើការមុនចាប់ផ្តើមធ្វើការ ៖ ជាវិធីមួយទៀតដើម្បីឱ្យការធ្វើការងាររបស់យើងចាប់ផ្តើមដោយល្អ បន្ទាប់ពីថ្ងៃឈប់សម្រាកដ៏យូរនោះ យើងគួរព្យាយាមផ្លាស់ប្តូរបរិយាកាសតុធ្វើការថ្មី អាចផ្លាស់ប្តូរមុំថ្មី ឬអាចបន្ថែមជាមួយរូបថតអនុស្សារីយ៍ពេលដែលយើងដើរកំសាន្ត និងតាំងនូវរបស់អនុស្សារីយ៍ថ្មីៗណាមួយក៏បាន ដើម្បីបង្កើននូវសោភ័ណ្ឌភាព ក៏ដូចជាបន្ថែមនូវថាមពលសម្រាប់យើងក្នុងការធ្វើការងារឱ្យបានពេញទំហឹង។

៤- រៀបចំផែនការ និងរៀបចំការងារមុនពេលចាប់ផ្តើមការងារ ៖ កំណត់នូវគោលដៅការងារ និងកំណត់អាទិភាពការងារឱ្យបានល្អទៅតាមភាពសំខាន់ និងថ្ងៃផុតកំណត់របស់វា ព្រោះ​នៅ​មុន​ថ្ងៃ​ឈប់​សម្រាក​យូរបែបនេះអាច​នឹង​មាន​ការងារគរ ដូច្នេះពិនិត្យមើលថា តើការងារណាយើងត្រូវធ្វើមុនគេ? ហេតុអ្វី? ហើយរាយបញ្ជីការងារទាំងអស់នោះចេញមកក្រៅ ដើម្បីកុំឱ្យខកខាននូវការងារណាមួយ ហើយលើសពីនេះទៅទៀតវាជួយកុំឱ្យយើងស្ត្រេសថែមទៀតផង។

ទី៥- ជជែកគ្នា ឬការប្រាស្រ័យទាក់ទងជាមួយមិត្តរួមការងារ ៖ បន្ទាប់ពីសម្រាកដ៏យូរបែបនេះ គ្រប់គ្នាសុទ្ធតែមានអ្វីយកមកនិយាយច្រើន អាចចំណាយពេលជជែកមុនចូលធ្វើការ ឬពេលសម្រាកអាហារថ្ងៃត្រង់ជាមួយមិត្តរួមការងារក៏បាន ដោយអាចជាការផ្លាស់ប្តូរបទពិសោធន៍របស់យើងដែលបានធ្វើដំណើរទៅកាន់កន្លែងណាមួយ ឬអ្វីដែលយើងបានធ្វើក្នុងអំឡុងពេលឈប់សម្រាក ឬក៏អាចចែករំលែកនូវរូបថត ដែលយើងបានថត ឬចែករបស់បញ្ញើរដល់គ្នាទៅវិញទៅមកជាដើម ដើម្បីបង្កើននូវបរិយាកាសល្អនៅកន្លែងធ្វើការឱ្យកាន់តែរស់រវើក៕