ភ្នំពេញ – នៅក្នុង​សន្និបាតបូកសរុបការងារអប់រំ យុវជន និងកីឡាឆ្នាំសិក្សា ២០២១-២០២២ និងទិសដៅបន្តក្រោមប្រធានបទ “បរិវត្តកម្មនៃវិស័យអប់រំ” មន្ត្រីអប់រំនៃអគ្គនាយកដ្ឋានយុវជន បានលើកឡើងថា បំណិនសតវត្សទី២១ កំពុងក្លាយជាយន្តការពង្រឹងសមត្ថភាពយុវជនកម្ពុជា ។

លោក ម៉ិល ផនសីហា ប្រធាននាយកដ្ឋានយុវជន នៃអគ្គនាយកដ្ឋានយុវជន មានប្រសាសន៍ថា ការលើកកម្ពស់និងការបណ្ដុះបំណិនសតវត្សរ៍ទី២១ជូនដល់យុវជនកម្ពុជា បានក្លាយជាអាទិភាពមួយដ៏សំខាន់សម្រាប់អនុវិស័យអភិវឌ្ឍយុវជនក្នុងបរិបទគន្លងប្រក្រតីថ្មី និងបដិវត្តន៍ឧស្សាហកម្ម៤.០ ។ ការមកដល់នៃបដិវត្តន៍ឧស្សាហកម្ម៤.០ បានធ្វើឱ្យសេដ្ឋកិច្ចសង្គមប្រែប្រួលឆ្ពោះទៅយុគសម័យឌីជីថល ហើយដើម្បីឱ្យមានសេដ្ឋកិច្ចបែបឌីជីថល លុះត្រាតែមានការអប់រំបែបឌីជីថល ។

បន្ថែមលើនេះ លោក ម៉ិល ផនសីហា ប្រធាននាយកដ្ឋានយុវជន នៃក្រសួងអប់រំ យុវជន និងកីឡា បានបញ្ជាក់ថា

“ការអប់រំបែបឌីជីថល ក្នុងបរិបទបដិវត្តន៍ឧស្សាហកម្ម៤.០ ពិតជាមានសារៈសំខាន់ខ្លាំងណាស់សម្រាប់ប្រទេសមួយជាពិសេសប្រទេសកម្ពុជា ក្នុងការបោះជំហានឱ្យក្លាយជាប្រទេស ដែលមានសេដ្ឋកិច្ចបែបឌីជីថល និងរដ្ឋាភិបាលឌីជីថល ព្រោះផ្នែកទាំងអស់នេះ ត្រូវការអ្នកជំនាញជាច្រើន ដើម្បីបំពេញការងារ និងគ្រប់គ្រងបច្ចេកវិទ្យា ព្រមទាំងប្រព័ន្ធវៃឆ្លាតថ្មីៗ។”

ជាមួយគ្នានេះដែរ ប្រធាននាយកដ្ឋានយុវជន នៃក្រសួងអប់រំ យុវជន និងកីឡា បានឱ្យដឹងទៀតថា ដើម្បីឆ្លើយតបទៅនឹងបរិបទបដិវត្តន៍ឧស្សាកម្ម៤.០ និងការប្រែប្រួលឥតឈប់ឈររបស់សង្គម យុវជនត្រូវមានបំណិនសតវត្សរ៍ទី២១ ពោលគឺបំណិនទន់ បំណិនត្រិះរិះពិចារណា ការងារជាក្រុម នវានុវត្តន៍ តស៊ូអត់ធ្មត់ ការដោះស្រាយបញ្ហា ភាពជាអ្នកដឹកនាំ បំណិនប្រាស្រ័យទាក់ទង ចំណេះដឹងភាសា ចំណេះដឹងឌីជីថល បំណិនសារព័ត៌មាន និងសហគ្រិនភាពជាដើម ។

លោក ម៉ិល ផនសីហា បានសង្កត់ធ្ងន់ថា បំណិនសតវត្សរ៍ទី២១ ជួយអភិវឌ្ឍយុវជនកម្ពុជាឱ្យក្លាយជាពលរដ្ឋល្អ និងមូលធនមនុស្ស ដែលមានស្មារតីស្នេហាជាតិ មានការទទួលខុសត្រូវខ្ពស់ ចេះថ្លឹងថ្លែង និងផ្តល់តម្លៃចំពោះគុណបំណាច់ឥតគណនានៃសន្តិភាព និងការអភិវឌ្ឍន៍សង្គមជាតិកម្ពុជា ។

សូមជម្រាបថា បំណិនសតវត្សរ៍ទី២១ សំដៅលើចំណេះដឹង បំណិនជីវិត បំណិនវិជ្ជាជីវៈ ទម្លាប់ និងឥរិយាបទ ដែលមានភាពចាំបាច់សម្រាប់ភាពជោគជ័យរបស់យុវជននៅក្នុងសង្គមបច្ចុប្បន្ន ជាពិសេសគឺការត្រៀមខ្លួនសម្រាប់បន្តការសិក្សានៅថ្នាក់ឧត្តមសិក្សា ការបំពេញការងារ និងការឈានជើងចូលជីវិតជាមនុស្សពេញវ័យ ៕