ពិន្ទុប្រឡងបាក់ឌុបឆ្នាំនេះ ក្រសួងកំណត់យកត្រឹម២៣៧ពិន្ទុជាប់

ភ្នំពេញ – នៅក្នុងសន្និសីទសារព័ត៌មានកាលពីដើមសប្តាហ៍នេះ ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា បានបញ្ជាក់ថា សម្រាប់ការប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប ឆ្នាំនេះ ក្រសួងបានកំណត់យកពិន្ទុសម្រាប់ការជាប់ដូចឆ្នាំមុនៗដដែល គឺ ២៣៧ពិន្ទុ ។

តាមការលើកឡើងរបស់ឯកឧត្តមបណ្ឌិតសភាចារ្យ របបពិន្ទុអតិបរមាគឺមាន ៥០០ពិន្ទុ ប៉ុន្តែដោយមុខវិជ្ជាភាសាបរទេសជាវិញ្ញាសាតាមស្ម័គ្រចិត្ត ដូច្នេះពិន្ទុប្រឡងជាប់ គឺ៥០០ ដក ២៥ រួចចែកនឹង២ ស្មើនឹង ២៣៧,៥ពិន្ទុ ដូច្នេះយកត្រឹម ២៣៧ពិន្ទុជាប់។

«ពិន្ទុសរុបគឺមានចំនួន ៥០០ពិន្ទុ អញ្ចឹងយើងមានភាសាបរទេសមួយដែលជាមុខវិជ្ជាជម្រើស, …ដូច្នេះយើងយក ៥០០ ដក ២៥ ចែកនឹង២ វាស្មើនឹង ២៣៧,៥ យើងកំណត់យកតែ ២៣៧ទេ ដូច្នេះបេក្ខជនណាដែលបានពិន្ទុទាបជាង ២៣៧ គឺធ្លាក់ហើយ» – ឯកឧត្តម ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា

គួរបញ្ជាក់ដែរថា ការប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប នៅឆ្នាំនេះ មានបេក្ខជនចូលរួមប្រឡងសរុបចំនួន ១១៤ ១៨៣នាក់ ក្នុងនោះមានស្រីចំនួន ៦៣៩៧នាក់ ដោយមានមណ្ឌលសំណេរចំនួន ២០៤មណ្ឌល ត្រូវជា ៤៦១៦បន្ទប់។

តាមការបញ្ជាក់របស់ក្រសួងអប់រំ ការប្រឡងឆ្នាំនេះ ទោះជាប្រទេសកម្ពុជាជួបនូវវិបត្តិជំងឺកូវីដ១៩ ប៉ុន្តែក្រសួងនៅតែគោរពតាមគោលការណ៍ ច្បាប់ យុត្តិធម៌ តម្លាភាព និងលទ្ធផលទទួលយកបាន៕