ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
នៅក្នុងការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) ក្រសួងអប់រំ យុវជន និងកីឡា បានកំណត់មុខវិជ្ជាកម្រិតចំណេះដឹងទូទៅសម្រាប់ការប្រឡង ប៉ុន្តែមុខវិជ្ជាភាសាអង់គ្លេស (ក្នុងនោះមុខវិជ្ជាភាសាបារាំងជាភាសាទី២) ក្រសួងក៏បានបញ្ជូលនៅក្នុងចំណោមមុខវិជ្ជាប្រឡងជារៀងរាល់ឆ្នាំ។
លោកជំទាវ ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា មានប្រសាសន៍ថា កន្លងទៅក្រសួងអប់រំ យុវជន និងកីឡា តែងតែយកចិត្តទុកដាក់ចំពោះការអប់រំភាសាអង់គ្លេស ក្នុងនោះភាសាបារាំងជាភាសាបន្ទាប់ទី២ ដែលជាមុខវិជ្ជាមួយបូកពិន្ទុបន្ថែម នៅពេលប្រឡងបាក់ឌុប។
អ្នកនាំពាក្យក្រសួងអប់រំ បន្ថែមថា ការពង្រឹងសមត្ថភាពផ្នែកភាសាបរទេសនេះ ដើម្បីលើកកម្ពស់សិស្សានុសិស្សចេះប្រើប្រាស់ភាសាបរទេសទាំងនេះសម្រាប់ការសិក្សាស្រាវជ្រាវ ការបន្តការសិក្សានៅសាកលវិទ្យាល័យ និងពេលចេញទៅបំពេញការងារ។
ខ្ញុំសូមលើកទឹកចិត្តសិស្សានុសិស្សឱ្យខិតខំប្រឹងប្រែងរៀនសូត្រ មិនមែនគ្រាន់តែជាភាសាអង់គ្លេស អាចជាភាសាផ្សេងៗទៀត ដើម្បីមានចំណេះដឹងគ្រប់គ្រាន់ឆ្លើយតបទៅនឹងតម្រូវការទីផ្សារការងារក្នុងសតវត្សទី២១។
លោកជំទាវ ឃួន វិច្ឆិកា អ្នកនាំពាក្យក្រសួងអប់រំ យុវជន
លោកជំទាវ ឃួន វិច្ឆិកា មានប្រសាសន៍បញ្ជាក់បន្ថែមថា ការរៀនសូត្រនៅសាលាមិនគ្រាន់តែទៅរៀនដើម្បីប្រឡងជាប់នោះទេ ប៉ុន្តែអ្វីដែលសំខាន់ជាងការប្រឡងទៀតនោះ គឺតម្រូវការជាក់ស្ដែងនៅក្នុងការប្រើប្រាស់ចំណេះដឹងដែលរៀនបានទៅក្នុងជីវភាពរស់នៅ ជាពិសេសនៅក្នុងការប្រកបអាជីពនាពេលអនាគត។
បើតាមអ្នកនាំពាក្យក្រសួងអប់រំ ការប្រឡងបាក់ឌុប គឺជាការវាស់ស្ទង់សមត្ថភាពសិក្សារបស់សិស្សានុសិស្សបានរៀនកន្លងមកប៉ុណ្ណោះ ហើយការប្រឡងមិនមែនជាកត្តាកំណត់ជោគវាសនារបស់សិស្សានុសិស្សឡើយ៕
