ការផ្ដោតអារម្មណ៍ មិនខុសពីការប្រើប្រាស់សាច់ដុំប៉ុន្មាននោះទេ ។ កាលណាយើងប្រើវាកាន់តែខ្លាំង វានឹងកាន់តែមានភាពរឹងមាំតាមនោះដែរ។ ដូច្នេះ យើងមិនអាចអនុវត្តទម្លាប់ដដែលៗ ហើយរំពឹងថា សមត្ថភាពផ្ដោតអារម្មណ៍នឹងមានភាពល្អប្រសើរដោយខ្លួនឯងនោះទេ។

យោងតាម BetterUp ប្រសិនបើអ្នក ចង់ពង្រឹងសមត្ថភាពផ្ដោតអារម្មណ៍ អ្នកគួរមានទម្លាប់ចំនួន ៥ ដូចជា៖

១. ថែសុខភាពឱ្យបានល្អ ៖ ការអនុវត្តទម្លាប់រស់នៅ ដែលនាំឱ្យមានសុខភាពល្អ ពិតជាសំខាន់ណាស់ ព្រោះវាជួយពង្រឹងមុខងារយល់ដឹងរបស់អ្នកឱ្យធ្វើការបានល្អ។ ការគេងគ្រប់គ្រាន់ ទទួលទានអាហារគ្រប់ក្រុម និងមានរបៀបរបបត្រឹមត្រូវ ជាពិសេសអាហារដែលសម្បូរទៅដោយ អូមេហ្គា-3 សារធាតុប្រឆាំងអុកស៊ីតកម្ម និងគ្រាប់ធុញ្ញជាតិ រួមចំណែកយ៉ាងសកម្មដល់ការពង្រឹងមុខងារយល់ដឹង។ ម្យ៉ាងទៀត ការធ្វើចលនារាងកាយជាប្រចាំ ក៏អាចសម្រួលលំហូរឈាមទៅកាន់កោសិកាខួរក្បាលផងដែរ។

២. ព្យាយាមធ្វើរឿងអ្វីមួយក្នុ្ងងរយៈពេលវែង ៖ ការព្យាយាមផ្ដោតអារម្មណ៍ធ្វើរឿងមួយក្នុងរយៈពេលវែង គឺជាមធ្យោបាយដ៏ល្អបំផុតមួយសម្រាប់ការពង្រឹងសមត្ថភាពខួរក្បាល។ ដូច្នេះ អ្នកអាចចំណាយពេលទំនេរ ដើម្បីលេងហ្គេម ឬសកម្មភាពអ្វីមួយ ដែលត្រូវឱ្យប្រើការគិត និងផ្ចង់អារម្មណ៍ខ្ពស់ ដូចជា លេងហ្គេម Sudoku ឬហ្គេមតម្រៀបពាក្យ (Crossword puzzles) ជាដើម ព្រោះហ្គេមទាំងនេះ សុទ្ធតែតម្រូវឱ្យប្រើស្មារតីផ្ចង់អារម្មណ៍ខ្ពស់។ ហេតុនេះ អ្នកអាចហ្វឹកហាត់ និងពង្រឹងការផ្ដោតអារម្មណ៍បន្ថែមបាន។

៣. រៀនជំនាញ ឬភាសាថ្មី ៖ ការរៀនអ្វីដែលថ្មី គឺជាសកម្មភាពមួយ ដែលអាចធ្វើឱ្យប្រសើរឡើងនូវសមត្ថភាពផ្ដោតអារម្មណ៍ និងមុខងារចងចាំ។ ម្យ៉ាងទៀត ការអនុវត្តទម្លាប់បែបនេះ ក៏ជាផ្នែកមួយ ដែលនាំឱ្យខួរក្បាលរបស់អ្នក មានភាពរហ័សរហួន និងស្រស់ថ្លាជាងមុនផងដែរ។

៤. ស្ដាប់តន្រ្តី ៖ ការស្ដាប់តន្ត្រីដែលធ្វើឱ្យអ្នកមានអារម្មណ៍ល្អ អាចជួយពង្រឹងសមត្ថភាពក្នុងការគិតបែបត្រិះរិះ និងដោះស្រាយបញ្ហាប្រកបដោយភាពច្នៃប្រឌិត។ យោងតាម គេហទំព័រ BetterUp បានណែនាំ ឱ្យស្ដាប់តន្រ្តី Mozart ប្រសិនបើអ្នកចង់ផ្ដោតអារម្មណ៍ធ្វើការបានល្អ។

៥. ធ្វើរឿងតែមួយ ៖ ដើម្បីផ្ដោតអារម្មណ៍បានល្អ អ្នកត្រូវជៀសវាងការធ្វើកិច្ចការច្រើន ក្នុងពេលតែមួយ។ ម្យ៉ាងទៀត ការផ្ដោតអារម្មណ៍ឱ្យបានយ៉ាងតិច ២៥នាទី ក្នុងការធ្វើរឿងអ្វីមួយ គឺល្អបំផុត។ ការធ្វើដូច្នេះ អាចជួយបង្កើតប្រសិទ្ធភាព និងផលិតភាពការងារបស់អ្នកឱ្យកាន់តែប្រសើរឡើង៕