ឱកាសសិក្សាអាហារូបករណ៍ថ្នាក់បរិញ្ញាបត្រនៅសាកលវិទ្យាល័យឌីជីថលកម្ពុជាចំនួន៣០០កន្លែង ពីសហភាពសហព័ន្ធយុវជនកម្ពុជារាជធានីភ្នំពេញសម្រាប់ឆ្នាំសិក្សា២០២៣-២០២៤។ អាហារូបករណ៍ផ្ដល់ជូនដល់និស្សិត យុវជន និងមន្ត្រីរាជការកម្ពុជាដែលមានបំណងសិក្សា និងអភិវឌ្ឍន៍សមត្ថភាព។

ជំនាញឯកទេសដែលអាហារូបករណ៍ផ្ដល់ជូនសិក្សារួមមានថ្នាក់បរិញ្ញាបត្រផ្នែក បច្ចេកវិទ្យាឌីជីថល, ទីផ្សារឌីជីថល, សេដ្ឋកិច្ចឌីជីថល, នីតិសាស្ត្រ និងវិទ្យាសាស្ត្រ, នយោបាយឌីជីថល, កសិកម្មឌីជីថល, សំណង់ស៊ីវិល, ស្ថាបត្យកម្មឌីជីថល, អក្សរសាស្ត្រអង់គ្លេស។ បេក្ខជនជ័យលាភីអាហារូបករណ៍ទទួលបានការសិក្សាឥតគិតលុយ កន្លែងស្នាក់នៅ និងអាហារបីពេល។

លក្ខខណ្ឌនៃការជ្រើសរើស បេក្ខជនត្រូវមានឆន្ទៈពិតប្រាកដក្នុងការសិក្សា មានសញ្ញាបត្រមធ្យមសិក្សាទុតិយភូមិ ឬឯកសារបញ្ជាក់ដែលមានតម្លៃស្មើ។ ជាមួយគ្នានេះ បេក្ខជនត្រូវឆ្លងកាត់ការប្រឡងប្រកួតជ្រើសរើសដែលរៀបចំដោយក្រុមការងារកម្មវិធីសាបព្រោះគ្រាប់ពូជនៃសហភាពសហព័ន្ធយុវជនកម្ពុជា រាជធានីភ្នំពេញ និងត្រូវគោរពតាមលក្ខខណ្ឌរបស់សាកលវិទ្យាល័យនៅពេលចុះឈ្មោះចូលរៀន។

បេក្ខជនដែលមានចំណាប់អារម្មណ៍ក្នុងការដាក់ពាក្យស្នើសុំអាហារូបករណ៍សូមភ្ជាប់ឯកសារចាំបាច់មួយចំនួនដូចជា ពាក្យសុំអាហារូបករណ៍១ច្បាប់ បង្កាន់ដែទទួលពាក្យស្នើសុំអាហារូបករណ៍១ច្បាប់ ជីវប្រវត្តិសង្ខេបដែលមានបិទរូបថតថ្មី(៤x៦)១ច្បាប់ សញ្ញាបត្រមធ្យមសិក្សាទុតិយភូមិ ឬឯកសារបញ្ជាក់ដែលមានតម្លៃស្មើ១ច្បាប់ ថតចម្លងអត្តសញ្ញាណប័ណ្ណ ឬសេចក្ដីចម្លងសំបុត្របញ្ជាក់កំណើត១ច្បាប់ រូបថតក្នុងពេលថ្មីៗទំហំ៤x៦ ថតពីមុខគ្មានវែនតា និងមានផ្ទៃក្រោយពណ៌សចំនួន៣សន្លឹក។

សម្រាប់ព័ត៌មានបន្ថែមបេក្ខជនអាចទាក់ទងទៅកាន់ក្រុមការងារកម្មវិធីសាបព្រោះគ្រាប់ពូជតាមរយៈ ០១៦ ៨៣ ១៣ ៩៧។ បេក្ខជនត្រូវធ្វើការស្នើពាក្យសុំ និងបំពេញទម្រង់បែបបទចាប់ពីថ្ងៃជូនដំណឹងរហូតដល់ថ្ងៃទី២២ ខែមករា ឆ្នាំ២០២៤ ៕