បច្ចុប្បន្នមនុស្សម្នាក់ៗតែងជួបនិងមានរឿងរ៉ាវជាច្រើននៅក្នុងដំណើរជីវិត ។ រឿងទាំងនោះអាចជារឿងល្អ និងរឿងមិនល្អ ប៉ុន្តែថា តើយើងគួរបង្ហាញរឿងរ៉ាវទាំងនោះទៅដល់អ្នកដទៃឱ្យបានដឹងដែរឬទេ? ចម្លើយដ៏សមស្របមួយគឺយើងគួរបង្ហាញរឿងដែលគួរបង្ហាញ និងមិនគួរបង្ហាញរឿងដែលមិនត្រូវបង្ហាញ ។ សម្រាប់បរិបទនៃសម័យទំនាក់ទំនងជាអាទិភាពនេះ AMS អប់រំ សូមបង្ហាញអំពីរឿងហេតុទាំង៥ ដែលមនុស្សគួររក្សាភាពស្ងៀមស្ងាត់ ដើម្បីរក្សានិងកសាងសុភមង្គលផ្ទាល់ខ្លួន។

១. ភាពភ័យខ្លាចរបស់ខ្លួន ៖ នេះជារឿងរ៉ាវដែលត្រូវតែរក្សាការសម្ងាត់ផ្ទាល់ខ្លួនឱ្យបានល្អបំផុត ។ ប្រសិនបើមានបុគ្គលណាម្នាក់បើកចិត្តពុំទូលាយ ឬចង់ប្រកួតប្រជែងកិច្ចការផ្សេងៗជាមួយអ្នក នោះគេនឹងព្យាយាមឈ្វេងយល់ពីចំណុចខ្សោយរបស់អ្នក ឬចាប់យកភាពភ័យខ្លាចរបស់អ្នកជាទឡ្ហីករណ៍វាយបកដោយប្រការណាមួយ ។ ភាពភ័យខ្លាចជាចំណុចខ្សោយរបស់បុគ្គល ។ បុគ្គលដែលរក្សាភាពស្ងៀមស្ងាត់បានល្អបំផុត រមែងយកឈ្នះលើក្តីបារម្ភរបស់ខ្លួន ឈ្នះអ្នកដទៃ និងឈ្នះភាពភ័យខ្លាចរបស់ខ្លួន ។

២. ចំណូល និងហិរញ្ញវត្ថុផ្ទាល់ខ្លួន ៖ ប្រាក់ចំណូលផ្ទាល់ខ្លួនជាស្ថេរភាពនៃការរស់នៅប្រចាំថ្ងៃ និងរក្សាលំនឹងផ្លួវចិត្ត ។ ការបង្ហាញពីប្រភពចំណូលផ្ទាល់ខ្លួនដោយចំហ ឬបង្ហាញចំណូលផ្ទាល់ខ្លួនឱ្យអ្នកដទៃដឹងមិនមែនជារឿងចំណេញសម្រាប់ខ្លួនឡើយ ។ គេអាចវាយតម្លៃពីកម្រិតនៃការគិត ឥរិយាបថរស់នៅ របៀបធ្វើការរបស់បុគ្គលតាមរយៈព័ត៌មានចំណូល ។ សម្រាប់ប្រជាជនក្នុងប្រទេសអភិវឌ្ឍន៍ ពួកគេចៀសដាច់ខាតបង្ហាញពីព័ត៌មានចំណូល ឬចំណាយឱ្យអ្នកដទៃបានដឹង លើកលែងពេលវេលាសំខាន់បំផុតដែលពួកគេត្រូវការជំនួយចាំបាច់ណាមួយ ។

៣. ជីវិតស្នេហា ៖ ការបង្ហាញត្រឹមទំនាក់ទំនង ឬមូលហេតុទំនាក់ទំនងស្នេហាផ្ទាល់ខ្លួនដែលមិនទាន់មានភាពច្បាស់លាស់ គួរកុំបង្ហាញទោះក្នុងរូបភាពណាក៏ដោយ ។ ស្នេហាមិនទាន់មានភាពច្បាស់លាស់ រមែងជួបឧបសគ្គមនោសញ្ចេតនា ព្រមទាំងងាយរងឥទ្ធិពលផ្សេងៗ ។ ភាគីទាំងសងខាងគួរឱ្យតម្លៃគ្នា តាមរយៈការកសាងភាពច្បាស់លាស់ ដោយយកស្នេហាមកពិសោធន៍ចិត្តគ្នា ហើយបង្ហាញឱ្យមនុស្សជុំវិញខ្លួនដឹង ឬអ្នកដទៃបានដឹងរឿងស្នេហាមិនច្បាស់លាស់របស់ខ្លួន ។ ភាពមិនច្បាស់លាស់នេះ អាចឱ្យបុគ្គលបាត់បង់តម្លៃផ្ទាល់ខ្លួន ហើយភាគីម្ខាងៗអាចទទួលរងនូវអារម្មណ៍ខ្មាស់អៀន ។

៤. គោលបំណងធំសម្រាប់ជីវិត ៖ គ្មាននរណាម្នាក់អាចហាមឃាត់គោលដៅជីវិត ឬក្តីស្រមៃនៅថ្ងៃអនាគតរបស់អ្នកបានឡើយ ប្រសិនបើអ្នកមានវារួចហើយ ព្រមទាំងព្យាយាមធ្វើសកម្មភាពជាច្រើនគាំទ្រឱ្យសម្រេចគោលដៅនោះ ។ ផ្ទុយទៅវិញប្រសិនបើបុគ្គលយកគោលដៅទាំងនោះទៅបង្ហើបបង្ហាញប្រាប់គេឯងទាំងមិនទាន់ត្រៀមខ្លួនជាមុន នោះវានឹងក្លាយជារឿងបាក់ទឹកចិត្តនៅពេលបុគ្គលជួបការលំបាកដែលកើតឡើងដោយប្រការណាមួយ ។ ពេលខ្លះគោលបំណងធំផ្ទាល់ខ្លួន បើមិនប្រាប់គេឯង ក៏មិនមែនជារឿងដែលខាតចំណេញដែរ ។ សំខាន់បំផុតក្នុងដំណាក់កាលអនុវត្តគោលដៅ ត្រូវបំពេញគោលដៅតូចៗជាជំហ៊ានៗឱ្យបានល្អបំផុត ។

៥. បញ្ហាគ្រួសារ ៖ ទំនាក់ទំនងនៅក្នុងគ្រួសារមួយ គឺគ្រួសារដទៃ និងអ្នកដទៃមិនអាចដឹងច្បាស់ឡើយ ។ បញ្ហាទំនាស់គ្រួសារមិនមែនជារឿងដែលអ្នកដទៃចង់ដឹងចង់លឺ ឬចង់ស្តាប់រឿងហេតុរបស់អ្នកនោះទេ ។ ការបែកបាក់ទំនាក់ទំនងស្នេហា ព្រោះតែរឿងតិចតួចក្នុងគ្រួសារ វាជារឿងរំខានដល់អ្នកដទៃ ហើយការលើកយករឿងរ៉ាវរបស់ខ្លួនទាំងក្នុងទាំងក្រៅឱ្យអ្នកដទៃបានដឹងទាំងអស់ខ្លាំងពេក គឺជាចំណុចខ្សោយរបស់គ្រួសារ ។ ជំនួសឱ្យការជជែកហែកបង្ហាញរឿងផ្ទាល់ខ្លួនឱ្យអ្នកដទៃដឹង ការប្រឹក្សាជាមួយអ្នកជំនាញ ដើម្បីស្វែងរកដំណោះស្រាយជាវិធីសាស្ត្រផ្សះផ្សា និងដោះស្រាយបញ្ហាដោយគុណភាព៕